Jueces 6 - CHUYA QELLQA La Biblia en Quechua de Ayacucho 2012

Gedeonmanta

¹ Israelpa mirayninkuna Tayta Diospa qayllanpi mana allinkunata ruwaptinkum madianitakunaman qanchis watapaq qoykurqa.

² Madianitakunam Israelpa mirayninkunata ñakarichirqaku, hinaptinmi Israelpa mirayninkunaqa orqokunapi machaykunapi, qaqakunapi pakakunanku uchkukunata ruwarqaku.

³ Israelpa mirayninkuna tarpuptinkum, madianitakuna, amalecitakuna chaynataq intipa qespimunan lawmanta kaqkunapas paykunapa contranpi hamuqku.

⁴ Hinaspam carpankuta chaypi sayarachispanku Gaza llaqtaman chayanakama chakrapi kawsayninkutapas tukuqku. Manam kawsaykunatapas, ovejakunatapas, torokunatapas nitaq asnokunatapas escapachiqkuchu.

⁵ Chay runakunaqa animalnintinmi hinaspa carpantinmi yaqa aqaruway uru hinaña hamuqku. Camellonkupas chaynataq paykunapas mana yupay atinam karqaku, chay allpapi kaqkunata tukunankupaqmi hamuqku.

⁶ Madianitakunaraykum Israelpa mirayninkuna llumpayta wakchayarurqaku, hinaspam qaparispanku Tayta Diospa yanapakuyninta mañakurqaku.

⁷ Madianitakunarayku Israelpa miray-ninkuna qaparispa Tayta Diosta mañakuptinkum,

⁸ Diosñataq huk profetata kachamurqa, chay profetam kaynata nirqa: Israelpa yupaychasqan Tayta Diosmi kaynata nin: Ñoqam Egipto nacionpi esclavo kasqay-kichikmanta hurqomurqaykichik.

⁹ Egipto runakunamantam libramur-qaykichik, librarqaykichiktaqmi ñakari-chisuqnikichik runakunamantapas, qayllaykichikmanta chay nacionkuna-ta qarqoruspaymi allpankutapas qam-kunamanña qorqaykichik.

¹⁰ Nirqayki-chiktaqmi: “Ñoqam qamkunapa Dios-nikichik kani, amorreokunapa diosninkutaqa amam manchakunkichikchu, paykunapa allpanpim kunan yacha-chkankichik”, nispay. Qamkunam ichaqa mana kasukurqankichikchu, nispa.

¹¹ Hinaptinmi Tayta Diospa angelnin Ofra llaqtaman hamuspan, chaypi kaq encina sachapa sikinpi tiyaykurqa, chay sachaqa Abiezer casta Joaspam karqa. Joaspa churin Gedeonñataqmi uvas saruna uchkupi trigota wayrachichkarqa, Madián castakuna mana rikurunanpaq.

¹² Chaypim Tayta Diospa angelnin rikuriykuspan Gedeonta nirqa: ¡Kallpasapa qari, Tayta Diosmi qanwan kachkan! nispa.

¹³ Hinaptinmi Gedeón nirqa: Señorlláy, Tayta Dios ñoqaykuwan kaptinqa, ¿imanasqataq tukuy kaykunaqa pasawachkanku? ¿Maytaq ñawpaq taytaykupa admirakuypaq kaqkuna willawasqankuqa? Paykunam willakuqku “Tayta Diosmi Egipto nacionmanta hurqomuwarqanchik”, nispanku. Kunanñataqmi Tayta Diosqa saqeruwaspanku Madián castakunaman qoykuwanku, nispa.

¹⁴ Chaymi Gedeonta Tayta Dios nirqa: Kallpaykiman hinayá Israelpa mirayninkunata madianitakunamanta libramuy. Ñoqam qamta kamachiki, nispa.

¹⁵ Hinaptinmi Gedeón nirqa: Señorlláy, ¿imawantaq Israelpa mirayninkunata librasaq? Manasés ayllu ukupiqa llapanmanta wakcham kaniku, aylluy ukupipas mana kaqpaq hapisqam kallani, nispa.

¹⁶ Chaymi Tayta Dios nirqa: Yanapaptiymi chulla runata hinalla madianitakunata vencenki, nispa.

¹⁷ Hinaptinmi Gedeón nirqa: Ama hina kaspaykiyá kaykuna niwasqaykimanta señalta qoykuway.

¹⁸ Amataqyá pasakuyraqchu ofrendayta apamuspa ofrecenaykama, nispa. Chaymi Tayta Dios nirqa: Kutimunaykikamam suyasqayki, nispa.

¹⁹ Gedeonmi rispan huk cabrachata yanuramurqa, ruwarurqataqmi iskay chunka kilo harinamanta mana levadurayuq tantatapas, hinaspam aychata canastapi churarqa, caldontañataqmi mankapi; chaykunata apaspanmi chay encina sachapa sikinpi ofrecerqa.

²⁰ Chaymi Gedeonta Diospa angelnin nirqa: Aychatawan mana levadurayuq tantata kay rumipa hawanman churaspa caldontañataq talliy, nispa. Chaymi Gedeón chaynata ruwarqa.

²¹ Tayta Diospa angelninñataqmi hapisqan tawnata haywarispan puntanwan aychata hinaspa mana levadurayuq tantata tupaykurqa, hinaptinmi rumimanta nina lloqsiramuspan aychatawan mana levadurayuq tantata ruparurqa. Chaymantam Tayta Diospa angelnin chinkarurqa.

²² Tayta Diospa angelnin kasqanta yacharuspanmi Gedeón nirqa: ¡Ay Señorlláy! ¡Ay Diosnilláy! Tayta Diospa angelnintam rikurullani, nispa.

²³ Ichaqa Tayta Diosmi nirqa: Ama manchakuychu, hawkalla kay, manam wañunkichu, nispa.

²⁴ Chaymi Tayta Diospaq chaypi altarta ruwaruspan Gedeón suticharqa: “Tayta Diosmi hawkayayqa”, nispa. Kunankamapas chay altarqa hinallam Abiezer castakunapa kasqan Ofra llaqtapi kachkan.

²⁵ Chay tutallam Gedeonta Tayta Dios nirqa: Taytaykipa animalninkunamanta qan-chis watayuq allinnin toronta hapiy hinaspa taytaykipa Baal idolonpa altarninta tuñichimuy, altarpa ladonpi Asera idolotapas kuchumuytaq.

²⁶ Wak moqopa hawanpi, ñoqa Tayta Diospaq altarta ruwapamuway hinaspa allinnin torota wañuchipuwaspayki kullumanta Asera idolotapas yantaspayki chaywan lliw kañana sacrificiota ofrecemuway, nispa.

²⁷ Gedeonmi chunka criadonkunawan Tayta Diospa kamachisqanta ruwarqa, ichaqa taytanpa ayllunkunatawan llaqtapi runakunata manchakusqanraykum tutallan ruwarqa.

²⁸ Paqarinnintin tutapaytam llaqtapi runakuna hatarimuspanku Baalpa altarninta tuñisqataña tariykurqaku, kullumanta Asera idolotapas kuchusqatañam tariykurqaku, altarta ruwaspa allinnin toro kañasqantapas tariykurqakum.

²⁹ Chaymi runakuna tapunakurqaku: ¿Pitaq kayta ruwarun? nispanku. Tapukachakuspankum Joaspa churin Gedeonpa ruwarusqanta yacharurqaku.

³⁰ Chaymi Joasta nirqaku: Wañuchinaykupaq churikita hurqomuy, Baalpa altarnintam tuñirachisqa, chay altarpa waqtanpi kullumanta Aseratapas kuchurusqam, nispanku.

³¹ Hinaptinmi contranpi kaq runakunata Joás nirqa: ¿Baal idolota nanachikuspachu pay-rayku peleankichik? Pipas payrayku peleaqqa manaraq achikyachkaptin wañuchun. Sichum Baal dios kaspaqa kikinyá altarnin tuñichiqwan peleachun, nispa.

³² Chay punchawmantam Gedeonta Jerobaalwan suticharqaku, Jerobaal ninanqa “Baal paywan peleachun”, ninanmi; chaynataqa suticharqaku Baalpa altarninta tuñirachisqanraykum.

³³ Chaymantam Madián castakunawan Amalec castakuna chaynataq intipa qespimunan lawmanta kaqkunapiwan huklla huñunakuruspanku Jordán mayuta chimparuspa Jezreel pampapi carpankuta sayarachirqaku.

³⁴ Hinaptinmi Tayta Diospa Espiritun Gedeonta huntaykuptin trompetata tocarqa, chaymi Abiezer castakuna payman hukllawakuykurqaku.

³⁵ Gedeonqa Manasés ayllukunamanpas willakuqkunatam kacharqa, hinaptinmi Manasés ayllukuna payman hukllawakaramurqaku. Willachimurqataqmi Aser ayllumanpas, Zabulón ayllumanpas chaynataq Neftalí ayllumanpas, chaymi Manasés ayllukunawan tupanankupaq rirqaku.

³⁶ Hinaptinmi Tayta Diosta Gedeón nirqa: Sichum Israelpa mirayninkunata nisqaykiman hina ñoqantakama libranayki kaptinqa,

³⁷ kunan tutam oveja millwata erapi churasaq; sichum millwallata sulla nuyuruptin allpañataq chakilla kaptinqa, niwasqaykiman hina Israelpa mirayninkunata ñoqantakama libranaykitam yachasaq, nispa.

³⁸ Chay nisqanman hinam pasakurqa. Gedeonmi tutapayta hatariruspan millwapi sullata huk tazón huntata qapirurqa.

³⁹ Chaywanpas huktawanmi Tayta Diosta Gedeón nirqa: Yapatawan niykuptiyqa amayá piñakuychu, kunanñataqyá millwa chakilla kaptin lliw allpañataq nuyusqa kachun, nispa.

⁴⁰ Chay tutam Dios chaynata ruwarqa, hinaptinmi millwa chakilla kaptin allpañataq nuyusqa karqa.