Jueces 20 - CHUYA QELLQA La Biblia en Quechua de Ayacucho 2012

Gabaa llaqtayuqkunata vengakusqankumanta

¹ Israelpa llapallan mirayninkunam Mizpa llaqtaman rispanku huk runa hinalla Tayta Diospa qayllanpi huñunakururqaku; huñunakururqakuqa Dan llaqtamanta qallaykuspa Beerseba llaqtakama hinaspa Galaad lawkamam.

² Israel ayllukunapa llapallan kamachiqninkunam chaypi tarikurqaku. Tayta Diospa llaqtanmantam tawa pachak waranqa soldadokuna espadantinkama huñunakururqaku.

³ Benjamín ayllukunam Israelpa mirayninkuna Mizpa llaqtaman risqankuta yacharurqaku. Israelpa mirayninkunam chay Leví ayllu runata tapurqaku imaynam chay warminta wañuchisqankumanta.

⁴ Chaymi wañuq warmipa qosan kaynata nirqa: Benjamín lawpi Gabaa llaqtamanmi samapakunaykupaq warmiypiwan chayarurqaniku.

⁵ Hinaptinmi Gabaa llaqtapi runakuna contraypi hatarispanku wañuchiwanankupaq wasita tuta muyururqaku, hinaspam wañuchinankukama warmiyta abusarurqaku.

⁶ Chaymi warmiypa ayanta kuchuparuspay lliw Israel ayllukunaman aparachirqani, chaynapi chay mana allin ruwasqankumanta hinaspa Israel nacionpi millakuypaq kaqta ruwasqankumanta llapallaykichik yachanaykichikpaq.

⁷ Chaynaqa, Israelpa mirayninkuna, kunanyá imam ruwanaykichikta tanteanakuychik, nispa.

⁸ Hinaptinmi llapallanku, huk runa hinalla hatarispanku nirqaku: Manam mayqanninchikpas carpanchikmanqa nitaq wasinchikmanpas kutisunchu.

⁹ Chaynaqa, kunanpunim sorteasunchik, Gabaa llaqtapi kaqkunawan pikunam peleaq rinanta yachananchikpaq.

¹⁰ Israelpa mirayninkunamantam raki-sunchik sapa pachakmanta chunka qarikunata, waranqamantañataqmi pa-chak qarikunata, chunka waranqaman-tañataqmi waranqa qarikunata; chay qarikunam tropakunapaq mikuyta apanqaku, wakinñataqmi Benjamín lawpi Gabaa llaqtaman rispa Israel nacionpi millakuypaq kaqta ruwasqankumanta vengakamunqaku, nispanku.

¹¹ Chaymi Israel casta runakunaqa Gabaa llaqtapa contranpi peleanankupaq huk runa hinallaña huñunakururqaku.

¹² Hinaspankum runakunata kacharqaku Benjamín ayllukunaman kaynata nimunankupaq: ¿Imanasqataq qamkuna ukupi kay millakuypaq kaqta ruwarunkichik?

¹³ Kunanyá Gabaa llaqtapi chay millakuypaq ruwaq runakunata makiykuman churamuychik, wañuchispa Israel nacionmanta chay mana allin ruwayta chinkachinanchikpaq, nispanku. Benjamín ayllukunam ichaqa Israelpa mirayninkunapa nisqanta mana kasurqakuchu

¹⁴ Aswanqa Gabaa llaqtamanmi lliw llaqtankumanta huñunakururqaku Israel castamasinkupa contranpi peleanankupaq.

¹⁵ Chay tiempopim llapallan llaqtankunamanta Benjaminpa mirayninkuna, iskay chunka soqtayuq waranqa peleaqkuna karurqaku, Gabaa llaqtapi yachaq qanchis pachak akllasqa qarikunam ichaqa mana yupasqachu karqaku.

¹⁶ Benjamín ayllumantam ichoqwan warakaq akllasqa qarikuna qanchis pachak karqaku. Paykunaqa chukchata warakaspapas hapi-chiqkupunim.

¹⁷ Israel castakunamanta wakin ayllukunañataqmi tawa pachak waranqa peleaqkuna karqaku.

Benjamín ayllupa contranpi peleasqankumanta

¹⁸ Israelpa mirayninkunam Diosta tapukunankupaq Bet-el llaqtaman rirqaku: ¿Mayqanniykutaq Benjaminpa mirayninkunawan peleaq puntata rinqa? nispanku. Chaymi Tayta Dios nirqa: Judá castakunam rinqaku, nispa.

¹⁹ Chaynapim Israel castakunaqa tutapayta hatariruspanku Gabaa llaqtapa chimpanpi campamentonkuta sayarachirqaku.

²⁰ Benjamín ayllupa contranpi peleaq rispankum Gabaa llaqtapa hichpanpi kinrayninman churakuykurqaku.

²¹ Hinaptinmi Benjaminpa mirayninkuna, Gabaa llaqtamanta lloqsiramuspanku chay punchawpi Israelpa mirayninkunamanta iskay chunka iskayniyuq waranqa qarikunata wañurachirqaku.

²² Aswanqa Israel castakunam kallpanchakuspanku peleanankupaq yapamanta kinrayninman churakurqaku, hina punta kaq punchawpi peleasqanku sitiollapi.

²³ Chaynataqa ruwarqaku Israelpa mirayninkuna tutaykuqkama Tayta Diospa qayllanpi waqasqankuraykum, chaypim Tayta Diosta kaynata tapurqaku: ¿Huktawanchu castamasiyku Benjamín aylluwan peleaq risaqku? nispanku. Hinaptinmi Tayta Dios nirqa: Riychik, nispa.

²⁴ Chaymi Israelpa mirayninkunaqa iskay kaq punchawpi kasqallan Benjamín ayllukunawan peleaq rirqaku.

²⁵ Benjamín castakunaqa iskay kaq punchawpipas Gabaa llaqtamanta lloqsiramuspankum Israelpa mirayninkunamanta espadawan peleaq qarikunata chunka pusaqniyuq waranqata wañurachirqaku.

²⁶ Chaymi Israelpa llapallan mirayninkunaqa Tayta Diospa qayllanpi waqaspa mañakunankupaq Bet-el llaqtaman rirqaku, hinaspam chay punchaw tutaykunankama ayunarqaku, ofrecerqakutaqmi lliw kañanapaq animalkunatawan allinlla kasqankumanta ofrendakunatapas.

^27-28 Chay tiempopim Dioswan pacto ruwasqanku Arca, Bet-el llaqtapi kachkarqa, Aaronpa willkan hinaspa Eleazarpa churin Fineesñataqmi sacerdote karqa. Israelpa mirayninkunam huktawan Tayta Diosta tapurqaku: ¿Huktawanchu aylluyku Benjaminwan peleamusaqku icha manañachu? nispanku. Chaymi Tayta Dios nirqa: Rispa peleamuychik, paqarinmi makikichikman churamusaq, nispa.

²⁹ Hinaptinmi Israel castakunaqa Gabaa llaqtapa muyuriqninpi wateqaqkunata churarurqaku.

³⁰ Kimsa kaq punchawpim wakin kutipi hina Israelpa mirayninkuna Benjaminpa mirayninkunawan peleanankupaq Gabaa llaqtapa contranpi churakururqaku.

³¹ Benjaminpa mirayninkunañataqmi Israel tropakunawan peleanankupaq llaqtamanta karunchakururqaku, hinaspam wakin kutipi hina wañuchiyta qallarirqaku. Bet-el llaqtaman hinaspa Gabaa llaqtaman riq ñankunapipas chaynataq campokunapipas yaqa kimsa chunka qarikunatam wañurachirqaku;

³² hinaspam nirqaku: Kunanpas ñawpaqta hinam vencerunchik, nispanku. Israelpa mirayninkunañataqmi ninakurqaku: Ayqespanchik llaqtamanta ñankunakama karuncharachisunchik, nispanku.

³³ Ichaqa llapallan Israel castakunam maymi kasqankumanta lloqsiykamuspanku Baal-tamar lawpi peleanankupaq kinrayninman churakururqaku. Chaynataqmi Israel castamanta wateqaqkunapas Gabaa llaqtapa muyuriqninpi pakakusqankumanta lloqsiykamurqaku.

³⁴ Chaynapim Israelpa llapallan mirayninkunamanta Gabaa llaqtapa contranpi chunka waranqa allinnin qari-qari runakuna ñawpaqman rirqaku. Llumpayta peleasqankuraykum Benjamín casta-kunaqa pierdesqankuta mana musyakurqakuchu.

³⁵ Tayta Dios yanapaptinmi Benjamín castakunata Israelpa mirayninkuna vencerurqaku, hinaspam chay punchawpi Benjamín castakunamanta espadawan peleaq qarikunata iskay chunka pichqayuq waranqa pachaknin runakunata wañurachirqaku.

³⁶ Benjaminpa mirayninkunam vencesqa kasqankuta qawakuykurqaku. Benjamín castakuna qatiptinkum Israelpa mirayninkuna ayqeq tukurqaku. Chaynataqa ruwarqaku Gabaa llaqtapa muyuriqninpi wateqaqkuna churasqankupi hapipakusqankuraykum.

³⁷ Chay wateqaqkunam qonqaymanta Gabaa llaqtaman yaykuruspanku chaypi yachaqkunata espadawan wañurachirqaku.

³⁸ Chay wateqaqkunawanmi Israel castakuna yachachinakurqaku, llaqtata yaykuruspankuqa sinchi qosnita ruwaspanku willakamunankupaq,

³⁹ chaynapi chay qosnita qawaspanku Israelpa mirayninkunamanta lluptiqkuna kutiriykamuspa Benjamín castakunata atacanankupaq. Benjamín castakunam peleayta qallaykuspanku Israelpa mirayninkunata yaqa kimsa chunka runakuta wañurachirqaku, chaywanmi piensarqaku: Ñawpaqta hinam vencerunchik, nispanku.

⁴⁰ Ichaqa llaqtamanta sinchi qosni lloqsimuyta qallaykuptinmi Benjamín castakuna qepankuta qawarispanku wichayman hoqarikuchkaq qosnita rikuramurqaku.

⁴¹ Israel castakuna kutiriykuptinkum Benjamín castakunaqa llumpayta mancharikururqaku, paykunapa hawanman hatun sasachakuy chayaramusqanta qawakuykuspanku.

⁴² Benjamín castakunaqa Israelpa mirayninkunamantam chunniqman lluptirqaku, ichaqa manam guerramanta lluptiyta atirqakuchu, lluptiptinkupas llaqtamanta lloqsimuqkunam hayparuspanku wañuchirqaku.

⁴³ Israelpa mirayninkunam Benjamín castakunapa ñanninta wichqaruspanku, Menúha lawmanta qallaykuspa Gabaa llaqtapa chimpan intipa qespimunan lawkama wañurachirqaku.

⁴⁴ Benjamín castakunamantam espa-dawan peleaq qarikuna chunka pusaq-niyuq waranqa wañururqaku.

⁴⁵ Puchuq-kunañataqmi chunniqpi Rimón qaqa lawman lluptirqaku, hinaptinmi ñanpi pichqa waranqa qarikunata wañurachirqaku. Gidom lawkama qatispankum iskay waranqa qarikunatawanraq wañurachirqaku.

⁴⁶ Chay punchawpim Benjamín castakunamanta iskay chunka pichqayuq waranqa qarikuna wañururqaku, paykunam karqaku espadawan peleaq allinnin qari-qari runakuna.

⁴⁷ Ichaqa Benjamín castamantam soqta pachak qarikuna chunniq lawpi Rimón qaqa lawman lluptikurqaku, chaypim tawa killa yacharqaku.

⁴⁸ Chaymantam Israelpa mirayninkuna kutimuspanku sapa llaqtapi Benjamín castakunata espadawan wañuchirqaku, wañurachirqakutaqmi animalkunatapas chaynataq llapa ima tarisqankutapas. Llapa llaqtakunatapas kañaykurqakum.