Jueces 18 - CHUYA QELLQA La Biblia en Quechua de Ayacucho 2012

Dan ayllumantawan Micaiamanta

¹ Chay punchawkunapiqa manam Israel nacionpi rey karqachu. Dan ayllukunapapas manataqmi Israel ukupiqa allpanku karqaraqchu, chaymi maypim yachanankupaq allpata maskachkarqaku.

² Chayraykum Danpa mirayninkunaqa Zora llaqtamantawan Estaol llaqtamanta pichqa allinnin qari-qari runakunata kacharqaku, chaynapi allpata allinta qawamunankupaq, paykunatam nirqaku: Rispa allpata qawamuychik, nispanku. Chay pichqa runakunam Efraín orqokunaman chayarurqaku, hinaspam samapakunankupaq Micaiapa wasinman rirqaku.

³ Micaiapa wasinpa hichpanpiña kachkaspankum Leví casta jovenpa rimasqanta musyaruspanku yaykuruspa tapurqaku: ¿Pitaq kayman pusamusurqanki? ¿Imatataq kaypi ruwachkanki? ¿Imanas-qataq kaypi kachkanki? nispanku.

⁴ Hinaptinmi Micaiapa paywan imam ruwasqanmanta chaynataq sacerdoten kananpaqña churasqanmanta willakurqa.

⁵ Chaymi paykuna nirqaku: Kunanyá Diosta tapuykapuwayku kay risqaykupi imaynas karamusaqku, nispanku.

⁶ Hinaptinmi Leví casta sacerdoteñataq nirqa: Hawkallayá pasakuychik, Tayta Diosmi risqaykichikpi yanapamusunkichik, nispa.

⁷ Chaymantam chay pichqa qarikunaqa Lais llaqtaman pasarqaku. Chay llaqtapi yachaq runakunaqa sidoniokunapa costumbrenman hinam hawkalla yachakuqku, chay allpapiqa mana pipapas imanasqanmi hawka kakuqku, chaypiqa manam pipas munaychakurqachu. Paykunaqa Sidón runakunamanta karupi kasqankuraykum mana piwanpas hukllawakuqkuchu.

⁸ Chay pichqa wateqamuqkuna Zora llaqtapi hinaspa Estaol llaqtapi kaq ayllunkuman kutimuptinkum paykuna tapurqaku: ¿Imaynataq karamunkichik? nispanku.

⁹ Hinaptinmi paykunañataq nirqaku: Allinmi karamuniku chaynaqa hakuchikyá peleamusunchik. Chay qawamusqayku allpaqa allinsum kasqa, amayá qellakuychikchu, apurawman chay allpata munaychakamusunchik.

¹⁰ Rispaykichikmi hawka yachakuq runakunata hinaspa mana imapa pisinan hatun allpata tarimunkichik. Chay allpataqa Diosmi qoykusunkichik, nispa.

¹¹ Chaymi Dan ayllumanta soqta pachak qarikuna guerrapaq allin armasqakama Zora llaqtamantawan Estaol llaqtamanta lloqsirqaku.

¹² Judá lawman chayaruspankum Quiriat-jearim llaqtapa hichpanpi otaq intipa seqaykunan lawpim campamentonkuta sayarachirqaku, hinaspam chaypi “Danpa Campamentonwan” suticharqaku, kunankamapas hina chaynam sutin.

¹³ Chaymanta pasaspankum Efraín law orqokunapi yachaq Micaiapa wasinman chayarurqaku.

¹⁴ Hinaptinmi Lais allpa reqsimuq pichqa runakuna ayllunkunaman willarqaku: Kay wasipiqa kachkanmi efodpas chaynataq llaqllaspa hinaspa qollqeta chulluchispa ruwasqa idolonkunawan terafinkunapas. Chaynaqa, ¿ima ruwaytataq munankichik? nispanku.

¹⁵ Chaymi Leví casta jovenpa wasinman otaq Micaiapa wasinman yaykuruspanku nirqaku: ¿Imaynallataq kachkanki? nispanku.

¹⁶ Dan ayllumanta kaq guerrapaq allin armasqa soqta pachak qarikunañataqmi punkupi suyachkarqaku.

¹⁷ Hinaptinmi allpa wateqamuq pichqa qarikunaqa, wasiman yaykuruspanku llaqllaspa chaynataq chulluchispa ruwasqa idolokunata apakunankupaq hapirqaku, hapirqakutaqmi efodtapas chaynataq wasiyuqpa idolonkunatapas. Sacerdotewan guerrapaq allin armasqa soqta pachak qarikunañataqmi punkupi kachkarqaku.

¹⁸ Chay runakunam Micaiapa wasinman yaykuruspanku, llaqllaspa chaynataq chulluchispa ruwasqa idolokunata hurqomurqaku, hurqomurqakutaqmi efodtawan wasiyuqpa idolonkunatapas. Chayta rikuruspanmi sacerdote nirqa: ¿Imapaqtaq chaykunata hurqochkankichik? nispa.

¹⁹ Hinaptinmi paykunañataq nirqaku: Upallay, ama imatapas rimarispa ñoqaykuwan riy, chaynapi sacerdoteyku kaspa taytayku hinaña kanaykipaq. Huk runallapa sacerdoten kanaykimantaqa, ¿manachum Israel miraykunamanta kaq ayllupa sacerdoten kayniki aswan allinqa kanman? nispanku.

²⁰ Chay nisqanku sonqonpaq hinakaptinmi sacerdoteqa efodtawan wasiyuqpa idolonkunata, llaqllasqa idolokunata aparikuspan chay runakuna-taña qatikurqa.

²¹ Dan ayllukunañataqmi wawa-churinkutawan animalninkuta hinaspa kapuqninkuta ñawpachispanku pasakurqaku.

²² Micaiapa wasinmanta allin karutaña richkaptinkum, Micaiawan vecinonkuna huñunakuruspanku Dan ayllukunata qatirqaku.

²³ Qayaykachakusqankuta uyariruspankum, Dan ayllukunaqa muyuriykamuspanku Micaiata nirqaku: ¿Imataq pasasunki qayaykachamuwanaykikupaq? nispanku.

²⁴ Micaiañataqmi nirqa: Ruwachikusqay diosniykunatam apakuchkankichik, pusakuchkankichiktaqmi sacerdoteytapas, ¿mana imayuqta saqeruwachkaspaykichikchu “imataq pasasunki” nisparaq tapuwankichik?

²⁵ Hinaptinmi Danpa mirayninkuna nirqaku: Ama qayaykachamuwaykuchu, yanqañataq hukkaqniyku piñakuruspa qamtapas chaynataq aylluykikunatapas wañurachikikuman, nispa.

²⁶ Chaymi Micaiaqa achka kasqankuta qawaykuspa wasinman kutikurqa, Danpa mirayninkunañataqmi maymi rinankuta pasakurqaku;

²⁷ hinaspam Micaiapa idolonkunata apaspanku chaynataq sacerdotentapas pusaspanku Lais llaqtaman chayarurqaku. Chaypi runakunaqa mana pipapas imanasqanmi hawkalla yachakuqku; Danpa mirayninkunañataqmi chayaruspanku espadawan wañuchispanku llaqtatapas kañaykurqaku.

²⁸ Paykunaqa Sidón nacionmanta karupi kasqankuraykum wakin runakunawanpas mana hukllawakuqkuchu, chayraykum yanapaqninkutapas mana tarirqakuchu. Lais llaqtaqa Bet-rehob law qechwapim tarikurqa. Hinaspam Danpa mirayninkunaña llaqtata musoqmanta hatarichispanku chaypi yacharqaku.

²⁹ Chay llaqtatam ñawpaq taytanku Danpa sutinwan suticharurqaku, Israelpa churin Danpa sutinman hina. Chay llaqtapa ñawpaq sutinqa Laismi karqa.

³⁰ Chay llaqtapim Danpa mirayninkuna, llaqllasqa idolota yupaychanankupaq churarqaku, sacerdotenku kananpaqñataqmi Gersonpa churinta otaq Moisespa willkan Jonatanta churarqaku. Jonatanpa mirayninkunapas sacerdotekunam karqaku Israel nacionninkumanta preso apasqa rinankukama.

³¹ Diospa santuarion Silo llaqtapi kanankamaqa Micaiapa llaqllachisqan idolokunapas chaypim karqa.