Jueces 11 - CHUYA QELLQA La Biblia en Quechua de Ayacucho 2012

Jefteymanta

¹ Galaadmanta kaq Jefteyqa allinnin qari-qari soldadom karqa. Payqa Galaadpa churin chuchumika warmipa wawanmi karqa.

² Galaadpaqa karqataqmi warminpi qari churinkunapas, chay churinkunam wiñaruspanku wasinkumanta Jefteyta kaynata nispa qarqorurqaku: Huk warmipa wawanmi qamqa kanki, taytanchikpa herenciantaqa manam chaskiwaqchu, nispanku.

³ Chaymi Jefteyqa wawqenkunamanta ayqekuspan Tob lawpiña yacharqa, chaypim qella runakunaman hukllawakuykuspan mana allinkunata ruwarqa.

⁴ Punchawkuna pasasqanman hinam, llapa amonitakuna Israel miraykunawan pelearqaku.

⁵ Chayraykum Galaad lawpi ancianokuna rirqaku Jefteyta Tobmanta pusamunankupaq.

⁶ Paytam nirqaku: Amonitakunapa contranpi peleaptiyku, capitanniyku kanaykipaq hakuchik, nispanku.

⁷ Hinaptinmi Galaad lawpi ancianokunata Jefté nirqa: ¿Manachum qamkunaqa cheqniwaspaykichik taytaypa wasinmanta qarqomuwarqankichik? ¿Llakipi kaspaykichikñataqchu kunan hamuwachkankichik? nispa.

⁸ Chaymi paykuna nirqaku: Sasachakuypi kasqaykuraykum hamuniku ñoqaykuwan kunan rinaykipaq, chaynapi amonitakunapa contranpi peleaspa Galaad lawpi llapallan yachaq-kunapa kamachiqninña kanaykipaq, nispanku.

⁹ Hinaptinmi Jefté nirqa: Sichum Amonpa mirayninkunapa contranpi peleaq kutichiwaptikichik Tayta Dios vencechiwaptinqa qamkunapa kamachiqnikichikmi kasaq, nispa.

¹⁰ Chaymi Galaad lawpi ancianokuna nirqaku: Tayta Diosyá testigonchik kachun, nisqaykiman hinam ruwasaqku, nispanku.

¹¹ Paykunawan Jefté riptinmi llapa runakuna kamachiqninkupaq churarurqaku; Mizpa llaqtaman chayaruptinkum Jefteyqa tukuy ima rimasqanta Tayta Diospa qayllanpi huktawan rimarirqa.

¹² Chaymantam willakuqkunata Jefté kacharqa Amonpa mirayninkunapa reyninman kaynata nispa: ¿Imanarqaykitaq ñoqaqa nacionniypa contranpi hamunaykipaq? nispa.

¹³ Chaymi Jefteypa kachasqankunata Amonpa mirayninkunapa reynin nirqa: Ñoqaqa qamkunawan peleaqmi hamuchkani, Israel castakunam Egipto nacionmanta lloqsimuspa Arnón mayumanta Jaboc mayukama hinaspa Jordán mayukama allpaykuta hapikuykurqaku, chaynaqa kunanyá mana guerrallawan kutiykachipuwayku, nispa.

¹⁴ Hinaptinmi amonitakunapa reyninman Jefté huktawan willakuqkunata kacharqa,

¹⁵ kaynata nimunankupaq: Israel castakunaqa manam moabitakunapa nitaq amonitakunapa allpantapas hapikuykurqanikuchu.

¹⁶ Israel miraykunaqa Egiptomanta lloqsimuspaqa, chunniqnintam hamurqaku Puka lamar qochakama, hinaspam Cades lawman chayamurqaku.

¹⁷ Chaymi Israel castakunaqa willakuqkunata kacharqaku edomitakunapa reyninta “allpayki ukuntayá pasarullasaqku” nispa nimunankupaq. Ichaqa edomitakunapa reyninmi mana munarqachu. Moabitakunapa reyninmanpas kacharqakum, ichaqa paypas manataqmi munarqachu, chayraykum Israel castakunaqa Cades lawllapi qeparurqaku.

¹⁸ Chaymantam chunniqninta hamuspanku edomitakunapa chaynataq moabitakunapa allpanta muyumurqaku; moabitakunapa allpanpa intipa qespimunan lawninman chayaramuspankum Arnón mayupa chimpanpi samarurqaku, moabitakunapa linderontaqa manam pasarqakuchu, Arnón mayu Moab nacionpa linderon kasqanrayku.

¹⁹ Israel miraykunam willakuqkunata kacharqaku Hesbón llaqtapi kamachikuq amorreokunapa reynin Sehonman, “allpayki ukuntayá pasarullasaqku maymi rinaykuman chayarunaykupaq” nispa nimunankupaq.

²⁰ Rey Sehonmi ichaqa mana munarqachu llapa Israel miraykuna paypa allpan ukunta pasanankuta, aswanqa runankunata Jahaza llaqta lawpi huñuruspanmi Israel castakunapa contranpi pelearqa.

²¹ Ichaqa Israelpa Diosninmi, rey Sehonta llapallan runankunatawan Israel miraykunaman qoykurqa, hinaptinmi paykunata wañurachispanku chay nacionpi yachaq llapallan amorreokunapa allpanta hapikuykurqaku.

²² Hapikuykurqakuqa Arnón mayumanta Jaboc mayukamam chaynataq chunniqmanta Jordán mayukamam.

²³ Chaynaqa, ¿Israelpa yupaychasqan Tayta Diospa qowasqankutachu qechuruwaykuta munachkanki? Chaytaqa Tayta Diosmi amorreokunamanta qechururqa.

²⁴ Quemos diosnikipa qosusqaykiqa, ¿manachum qampaña? Chaynam ñoqaykuman Tayta Diospa qowasqankupas ñoqaykupaña.

²⁵ ¿Moab nacionpa reynin Ziporpa churin Balacmantapas aswan allinpaqchu hapikunki? Payqa manam Israel castakunapa contranpiqa pelearqachu.

²⁶ Israel miraykunaqa yaqa kimsa pachak watañam Hesbón hinaspa Aroer llaqtakunapiqa yachachkaniku chaynataq taksa llaqtakunapiwan Arnón mayupa patan llaqtakunapipas. ¿Imanasqataq mana chay tiempopichu kutichikurqankichik?

²⁷ Ñoqaqa manam imanarqaykichu, contraypi peleaspaqa mana allintam ruwachkanki. Tayta Diosmi juezqa, kunanqa paymi juzgawasunchik Israelpa mirayninkunatapas chaynataq amonitakunatapas, nispa.

²⁸ Amonitakunapa reyninmi ichaqa, Jefteypa willachisqanta mana kaqpaqpas hapirqachu.

Jefteypa prometekusqanmanta

²⁹ Tayta Diospa Espiritun Jefteyta yanapaptinmi Galaad hinaspa Manasés lawninta pasarqa. Chaymantam Galaad lawpi Mizpa llaqtaman chayarurqa. Mizpa llaqtamantañataqmi Amonpa mirayninkunapa kasqanman rirqa.

³⁰ Chaypim Tayta Diosman Jefté kaynata prometekurqa: Sichum amonitakunata makiyman churaykuptikiqa,

³¹ vencesqaymanta kutimuptiy chaskiwananpaq wasiymanta puntata lloqsimuqtam qampaq lliw kañana sacrificiota ofrecemusqayki, nispa.

³² Jefteymi mayuta chimparqa amonitakunawan peleananpaq, chaymi Jefteypa makinman Tayta Dios churaykurqa.

³³ Iskay chunka llaqtakunatam vencerurqa, Aroer llaqtamanta qallarispa Minit llaqtakama hinaspa Abel-keramim llaqtakama. Chaynatam Israelpa mirayninkuna llapa amonitakunapi munaychakururqaku.

³⁴ Mizpa llaqtapi wasinman Jefté kutimuptinmi, sapallan warmi churin lloqsiramurqa, paymi taytanta chaskinanpaq panderetawan tusustin lloqsimurqa. Jefteypaqa manam huk churinqa karqachu.

³⁵ Churinta Jefté qawaykuspanmi, pachankunata llikipakuspan kaynata nirqa: ¡Ay, churilláy! Hatun llakimanmi churaruwanki, qamraqtaq lloqsiramunkipas kay hatun llakiman churaykuwanaykipaq, Tayta Diosmanmi prometekurqani, chay prometekusqaytaqa ruwanaypunim, nispa.

³⁶ Hinaptinmi churin nirqa: Taytay, sichu Tayta Diosman prometekuspaqa, ñoqawanyá prometekusqaykiman hina ruway, enemigoyki Amonpa mirayninkunataqa Tayta Diospunim vengakurun.

³⁷ Ichaqa taytáy, iskay killatayá suyaykuway, sipas masiykunawan orqokunaman rispay, manaraq casarakuchkaspay wañukunaymanta waqamunaypaq, nispa.

³⁸ Taytanñataqmi nirqa: Churilláy riruyá, nispan. Iskay killa suyaykuptinmi, manaraq casarakuchkaspa wañunanmanta sipasmasinkunawan orqokunapi waqamurqa.

³⁹ Iskay killa pasaruptinmi taytanman kutimurqa, chaymi taytanñataq prometekusqanman hina paywan ruwarqa. Chaynapim payqa manaraq casarakuchkaspa wañukurqa.

⁴⁰ Chaymantapunim Israelpi kay costumbre qallaykurqa: Watan-watanmi llapa sipaskuna lloqsiqku Galaad llaqtayuq Jefteypa warmi churinmanta tawa punchawpuni waqamunankupaq.