Jueces 10 - CHUYA QELLQA La Biblia en Quechua de Ayacucho 2012

Tolamantawan Jairmanta

¹ Abimelecpa qepantam, Israel ayllukunata librananpaq Fuapa churin Tola hatarimurqa, Tolaqa karqa Isacar ayllumanta kaq Dodopa willkanmi. Tolaqa Efraín law orqokunapi tarikuq Samir llaqtapim yacharqa.

² Paymi Israel castakunata iskay chunka kimsayuq wata kamachirqa; wañuruptinñataqmi Samir llaqtapi pamparurqaku.

³ Tola wañuruptinmi Galaad lawmanta kaq Jair sutiyuq runa hatarimurqa, paymi Israel castakunata iskay chunka iskayniyuq wata kamachirqa.

⁴ Jairpam kimsa chunka churinkuna karqa, paykunam kimsa chunka asnokunapi sillakuqku, kimsa chunkataqmi llaqtankupas karqa. Chay llaqtakunaqa kunankamam “Jairpa llaqtankuna” nispa sutichasqa, chay llaqtakunaqa Galaad lawpim kachkan.

⁵ Jair wañuruptinmi Camón llaqtapi pamparurqaku.

Israel miraykunata Amón castakuna ñakarichisqanmanta

⁶ Israelpa mirayninkunam kaqllamanta Tayta Diospa qayllanpi huchallikuyta qallaykurqaku. Baal idolokunata, Astarot idolokunata, arameokunapa, sidoniokunapa, moabitakunapa, amonitakunapa hinaspa filisteokunapa diosninkunataña yupaychaspankum Tayta Diostaqa manaña servirqakuñachu.

⁷ Chaymi Israel castakunapa contranpi Tayta Dios piñakuspan, filisteokunamanwan amonitakunamanña qoykurqa.

⁸ Paykunam Jordán mayupa chimpan amorreokunapa allpanpi tarikuq Galaadpi yachaq Israelpa mirayninkunata chunka pusaqniyuq wata ñakarichirqaku.

⁹ Amonitakunaqa Jordán mayutapas chimparuspankum, Judá ayllupa, Benjamín ayllupa hinaspa Efraín ayllupa contranpi pelearqaku. Chaynapim Israel miraykunaqa hatun sasachakuypi tarikurqaku.

¹⁰ Chaymi Israelpa mirayninkuna, Tayta Diosta kaynata qayakurqaku: Qampa contraykipim huchallikuruniku. Qam Diosniykuta qepanchakuruspaykum Baal idolokunataña yupaycharqaniku, nispanku.

¹¹ Hinaptinmi Israelpa mirayninkunata Tayta Dios nirqa: Qamkunataqa Egipto nacionniyuq runakunapas amorreokunapas, amonitakunapas, filisteokunapas,

¹² sidoniokunapas, amalecitakunapas chaynataq madianitakunapas ñakarichisurqankichikmi. Ñakarichisqa kaspa qayakuwaptikichikmi paykunamanta librarqaykichik.

¹³ Aswanqa qamkunam qepanchakuruwaspaykichik idolokunataña yupaycharqankichik, chayraykum qamkunataqa manaña librasqaykichikñachu.

¹⁴ Chaynaqa, rispayá akllakusqaykichik dioskunata qayakamuychik, ñakarichisqa kasqaykichik tiempopi paykuna librasunaykichikpaq, nispa.

¹⁵ Chaymi Tayta Diosta Israelpa mirayninkuna nirqaku: Huchallikurunikum, qamyá ñoqaykuwan munasqaykita ruway; ama hina kaspa kunan libraykullawayku, nispanku.

¹⁶ Hinaspam huklaw nacionkunapa diosninkunata chawpinkumanta wischuruspanku Tayta Diostaña servirqaku, chaymi Israelpa mirayninkunapa ñakariyninta qawarispan Tayta Dios llakipayariykurqa.

¹⁷ Amonitakunam guerrapaq huñunakuruspanku Galaad lawpi campamentonkuta sayachirqaku, Israelpa mirayninkunapas huñunakuruspankum Mizpa llaqtapa hichpanpi campamentonkuta sayachirqaku.

¹⁸ Hinaptinmi Galaad lawpi runakuna kamachiqninkunapiwan ninakurqaku: Pipas amonitakunapa contranpi peleayta qallariqmi Galaad lawpi yachaqkunapa kamachiqnin kanqa, nispanku.