Josué 3 - CHUYA QELLQA La Biblia en Quechua de Ayacucho 2012

Jordán mayuta chimpasqankumanta

¹ Paqarinnintin tutapaytam Josueywan Israelpa llapallan mirayninkuna, Sitim lawmanta lloqsispanku Jordán mayukama chayarurqaku, ichaqa manaraq chimpachkaspam chaypi samarurqaku.

² Kimsa punchawmantam llapa kamachikuqkuna campamenton-campamenton rispanku,

³ Israelpa mirayninkunata kaynata kamachirqaku: Tayta Diospa pacto ruwasqan Arcata Leví ayllu sacerdotekunapa apasqanta rikuspaykichikmi qamkunapas maymi kasqaykichikmanta lloqsispa qatinkichik,

⁴ chaynapi maynintam rinaykichikta yachanaykichikpaq. Qamkunaqa manam haykapipas chay ñannintaqa purirqankichikchu. Amam Arcamanqa asuykunkichikchu, huk kilómetro qepallatam rinkichik, nispa.

⁵ Hinaptinmi runakunata Josué nirqa: Chuyanchakuychik, paqarinmi qayllaykichikpi admirakuypaq kaqkunata Tayta Dios ruwanqa, nispa.

⁶ Sacerdotekunatapas kaynatam kamachirqa: Diospa pacto ruwasqan Arcata hoqarispa runakunapa ñawpaqninta chimpaychik, nispa. Chaymi paykuna, Diospa pacto ruwas-qan Arcata hoqarispanku runakunapa ñawpaqninta rirqaku.

⁷ Hinaptinmi Josueyta Tayta Dios nirqa: Kunan punchawmanta qepamanmi, Israelpa mirayninkuna qawanankupaq anchata hatunchasqayki, chaynapim Moiseswan kasqayta hina qanwanpas kasqayta yachanqaku.

⁸ Qanmi pacto ruwasqay Arca apaq sacerdotekunata kaynata kamachinki: Jordán mayupa patanman chayaruspaykichikmi yaku ukupi sayankichik, nispa.

⁹ Chaymi Israelpa mirayninkunata Josué nirqa: Asuykamuspa Tayta Diospa nisqankunata uyariychik.

¹⁰ Kunanmi kawsaq Diospa ñoqanchikwan kasqanta yachankichik. Paymi qayllaykichikmanta cananeokunata, heteokunata, heveokunata, ferezeokunata, amorreokunata chaynataq jebuseokunatapas qarqonqa.

¹¹ Tukuy Atiyniyuq Diospa pacto ruwasqan Arcam ñawpaqnikichikta Jordán mayuta chimpanqa.

¹² Chaynaqa, kunanyá Israelpa mirayninkunamanta chunka iskayniyuq runakunata akllaychik sapa ayllumanta huktakama.

¹³ Tukuy Atiyniyuq Diospa Arcanta apaq sacerdotekuna Jordán mayuta saruykuptinkum hinallapi takyarunqa. Hanaymanta kallpamuq yakukunam qocharuspan perqa hina churakurunqa, nispa.

¹⁴ Chaymi Jordán mayuta chimpanankupaq carpankumanta lloqsiptinku, Diospa Arcan apaq sacerdotekunañataq ñawpaqninkuta rirqaku.

¹⁵ Cosecha tiempopiqa, Jordán mayuqa tukuy patanman llimpanankamam huntan. Ichaqa Diospa Arcan apaq sacerdotekuna Jordán mayuman yaykuykuspa yakuta saruykuptinkum

¹⁶ hanaymanta kallpamuq yakukuna qocharurqa chimpanankumanta allin karu hanaypi, Saretán llaqtapa waqtanpi tarikuq Adam llaqtapa hichpanpi. Arabá lawpi Puchqo lamar qochaman riq yakuñataqmi chakinankama hina kallparqa. Chaynapim mayu hanayman urayman rakikururqa. Hinaptinmi Israelpa mirayninkuna Jericó lawman chimparurqaku.

¹⁷ Tayta Diospa Arcanta apaq sacerdotekunañataqmi, Jordán mayupa chawpinpi, chaki allpapi hina sayarqaku, Israelpa mirayninkuna mayuta chimpay tukunankukama.