Josué 24 - CHUYA QELLQA La Biblia en Quechua de Ayacucho 2012

Josueypa despedikusqanmanta

¹ Josueymi Israelpa mirayninkunata Siquem llaqtaman qayachispan llapa ancianokunata, kamachikuqkunata, juezkunata chaynataq capitankunatapas Tayta Diospa qayllanman huñururqa.

² Hinaspanmi llapallan runata nirqa: Israelpa yupaychasqan Tayta Diosmi nin: “Ñawpaqtam Taytaykichik Taré, Abraham hinaspa Nacor, Eufrates mayupa waklaw chimpanpi yachaspanku rikchaqmana idolokunata yupaycharqaku.

³ Ñoqa Tayta Diosmi taytaykichik Abrahamta mayupa waklaw chimpanmanta pusamuspay Canaán law allpakunapi purichirqani. Chaymantam payta mirachirqani churin Isaacta qospay.

⁴ Isaacmanmi churin Jacobtawan churin Esauta qorqani. Esaumanmi yachananpaq Seir law orqokunata qorqani. Jacobñataqmi mirayninkunapiwan Egipto nacionman ripukurqaku.

⁵ Chaymantam Moisestawan Aaronta kacharqani, hinaspam Egipto nacionpi runakunata castigaspay chay nacionmanta taytaykichikkunata hurqomurqani.

⁶ Egipto nacionmanta ñawpaq taytaykichikkunata hurqomuptiymi, Egipto tropakuna carretankunawan chaynataq silladakunawanpas Puka lamar qochakama qatimurqaku.

⁷ Chaymi ñawpaq taytaykichikkuna qayakamuwaptinku hatun tutayaywan Egipto runakunamanta rakirqani. Lamar qochatam Egipto runakunapa hawanman kutiykachispay chaywan pamparachirqani. Qamkunaqa rikurqankichikmi Egipto runakunawan imam ruwasqaytaqa. Unay watam chunniqpi karqankichik.

⁸ Chaymantam Jordán mayupa wak-lawninpi yachaq amorreokunapa allpanman pusarqaykichik. Paykunam qamkunapa contraykichikpi pelearqaku, ichaqa ñoqam vencechirqaykichik, chaymi allpankutapas hapikuykurqankichik. Qayllaykichikmantam paykunata chinkachirqani.

⁹ Chaymantam Ziporpa churin Moabpa reynin Balac qamkunapa con-traykichikpi peleaspan Beorpa chu-rin Balaamta ñakasunaykichikpaq qaya-chimurqa.

¹⁰ Aswanqa manam Balaamta uyarirqanichu, chayraykum achka kutikama bendecisurqankichik, chaynatam rey Balacpa makinmanta librarqaykichik.

¹¹ Chaymantam Jordán mayuta chimpamuspa Jericó llaqtaman chayamurqankichik. Hinaptinmi chay llaqtapi yachaq amorreokuna, ferezeokuna, cananeokuna, heteokuna, gergeseokuna, heveokuna chaynataq jebuseokunapas qamkunawan pelearqaku. Ñoqam ichaqa paykunata makikichikman churarqani.

¹² Ñawpaqnikichiktam wayliskunata kacharqani, hinaptinmi qayllaykichikmanta amorreokunapa iskaynin reyninkuta qarqorqaku. Chaynaqa, manam espadaykichikwanchu nitaqmi flechaykichikwanchu paykunataqa qarqorqankichik.

¹³ Mana llamkasqaykichik chakrakunatawan mana hatarichisqaykichik llaqtakunatam qorqaykichik. Chaykunapi kunan yachaspaykichikmi mana plantasqaykichik uvaskunatawan aceitunaskunata mikuchkankichik”, nispa.

¹⁴ Chaynaqa, Tayta Diosta kasukus-payá cheqap sonqowan payta serviy-chik. Eufrates mayupa waklaw chim-panpi chaynataq Egipto nacionpi kachkaspanku ñawpaq taytaykichikkunapa yupaychasqanku idolokunatayá qamkunamanta wischuychik, hinaspayá Tayta Diosllata serviychik.

¹⁵ Sichum Tayta Dios serviyta mana munaspaykichikqa, kunanpuni akllakuychik pim servinaykichikta: ¿Eufrates mayupa waklaw chimpanpi kachkaspankuraq taytaykichikkunapa yupaychasqan idolokunatachu icha kay yachasqaykichik allpapi kaq amorreokunapa yupaychasqanku idolokunatachu servinkichik? Ñoqam ichaqa aylluykunawan kuska Tayta Diosllata servisaqku, nispa.

¹⁶ Chaymi llapa runakunañataq nirqaku: Tayta Diospas amayá munachunchu payta saqeruspa idolokunataña servinaykutaqa.

¹⁷ Señorninchik Tayta Diosmi ñawpaq taytanchikkunatapas ñoqanchiktapas esclavo kachkaptinchik Egipto nacionmanta hurqomuwarqanchik. Paymi qayllanchikpi admirakuypaq kaqkunata ruwaspa hamusqanchik ñanpipas chaynataq pasamusqanchik allpapi runakunamantapas waqaychawarqanchik.

¹⁸ Tayta Diosmi llapa llaqtakunata chaynataq amorreokunatapas qayllanchikmanta qarqorqa. Chayraykum ñoqaykuqa Tayta Diosllata servisaqku. Payllam ñoqaykupa Diosniykuqa, nispanku.

¹⁹ Hinaptinmi paykunata Josué nirqa: Tayta Diosta serviytaqa manam atiwaqchikchu, payqa Chuya hinaspa celoso Diosmi, manam pampachasunkichikmanchu mana kasukuynikichiktawan huchallikuynikichiktaqa.

²⁰ Sichum Tayta Diosta saqeruspa idolokunataña serviptikichikqa contraykichikpi kaspanmi castigasunkichik, hinaspam qamkunapaq allinkunata ruwachkaspapas chinkarachisunkichik, nispa.

²¹ Chaymi Josueyta runakuna nirqaku: Manam, ñoqaykuqa Tayta Diosllatam servikusaqku, nispanku.

²² Hinaptinmi runakunata Josué nirqa: Chaynaqa, kikikichikmi testigo kankichik Tayta Diosllata servinaykichikpaq akllakusqaykichikmanta, nispa. Chaymi paykunañataq nirqaku: Arí, testigom kaniku, nispanku.

²³ Hinaptinmi paykunata Josué nirqa: Kunanyá hatallisqaykichik idolokunata qamkunamanta wischuychik, hinaspayá tukuy sonqoykichikwan Israelpa yupaychasqan Tayta Diosman kutirikuychik, nispa.

²⁴ Chaymi runakunañataq nirqaku: Ñoqaykuqa Señorninchik Tayta Diostam servisaqku hinaspam niwasqaykikuta kasukusaqku, nispanku.

²⁵ Hinaptinmi huñunakusqanku Si-quem llaqtapi, chay punchaw llapa runakunawan contratota Josué ruwarqa, hinaspam paykunaman kamachikuykunatawan yachachikuykunata qorqa.

²⁶ Kaykunatam Diospa yacha-chikuyninkunamanta willakuq libropi Josué qellqarqa. Chaymantam hatun rumita hapispan Tayta Diospa santuarionpa hichpan encina sachapa sikinpi sayachirqa,

²⁷ hinaspam llapallan runa-kunata nirqa: Kay rumim testigo kanqa Tayta Dios-pa niwasqanchik palabrakunata uyaris-qanrayku. Kay rumim qamkunapa contraykichikpi testigo kanqa, chaynapi Diosninchikpa contranpi ama llullakunaykichikpaq, nispa.

²⁸ Chaymantam Josueyqa runakunata aviarurqa allpankuman sapakama kutikunankupaq.

Josueypa wañukusqanmanta

²⁹ Manapas unaymantam Tayta Diospa serviqnin Nunpa churin Josué, pachak chunka watanpi kachkaspan wañukurqa.

³⁰ Hinaptinmi Timnat-sera llaqta law allpanpi pamparurqaku. Timnat-sera llaqtaqa Efraín law orqokunapim kachkan, Gaas orqopa norte lawninpi.

³¹ Josueypa kawsanankamaqa chaynataq wiñaymasin ancianonkunapas kawsanankamaqa, Israelpa mirayninkunam Tayta Diosta servirqaku; chay ancianokunaqa rikurqakum Israelpa mirayninkunapaq Tayta Diospa tukuy ima ruwasqanta.

Joseypa tullunkunata pampasqankumanta

³² Israelpa mirayninkunam Egipto nacionmanta Joseypa tullunkuna apamusqankuta Siquem llaqtapi Joseyman tupaqnin chakrapi pamparqaku. Chay allpatam Jacob rantirqa Hamorpa churinkunamanta tawa kilo parten qollqewan. Hamorqa karqa Siquem sutiyuq runapa taytanmi. Chay chakram karqa Joseypa mirayninkunapaq herencia.

Eleazarpa wañukusqanmanta

³³ Aaronpa churin Eleazarpas wañu-kuptinmi churin Fineespa allpanpi pamparurqaku, Fineespa allpanqa karqa Efraín law orqokunapim, chay allpatam Fineesman Josué qorqa.