Josué 23 - CHUYA QELLQA La Biblia en Quechua de Ayacucho 2012

Israelpa mirayninkunata Josué kunasqanmanta

¹ Israelpa mirayninkunata muyuriqninkupi enemigonkuwan Tayta Dios hawkayayta qoykuptinmi, Josueypas llumpaytaña machuyaruspanmi,

² Israelpa mirayninkunata, ancianonkunata, kamachiqninkunata, juezninkunata chaynataq capitanninkunatapas qayachispan nirqa: Ñoqaqa llumpay yuyaqñam kani.

³ Qamkunaqa rikurqankichikmi Señor-ninchik Tayta Diospa llapallan chay nacionkunata qamkunarayku tukuy ima ruwasqantaqa. Señorninchik Tayta Diosmi qamkunarayku pelearqa.

⁴ Ñoqam sorteaspay kay allpakunata sapa ayllukunaman qorqaykichik. Manam vencesqanchik kaqkunallatachu qorqaykichikqa aswanqa manaraq vencesqanchik kaqkunatawanmi, Jordán mayumanta qallarispa intipa seqaykunan lawpi Mediterráneo lamar qochakama.

⁵ Señorninchik Tayta Dios-mi chay allpapi runakunata qayllaykichikmanta qarqonqa, hinaptinmi allpan-kupas qamkunapaña kanqa, chaynataqa ruwankichik Tayta Diospa prometesusqaykichikman hinam.

⁶ Moisespa qellqasqan libropi yacha-chikuykunata kasukuypi kallpancha-kuychik ama ichoqmanpas nitaq alleq-manpas rakikuspa;

⁷ amataqyá qam-kuna ukupi puchuq nacionkunapi runa-kunawanqa hukllawakuychikchu. Idolonkunatapas ama yupaychaychikchu nitaq sutinpipas juraychikchu.

⁸ Aswanqa Señorninchik Tayta Diosllatam qatinkichik kunankama ruwasqaykichikta hina.

⁹ Tayta Diosmi hatun hinaspa atiyniyuq nacionkunata qayllaykichikmanta qarqorqa.

¹⁰ Nisusqaykichikman hinam qamkunamanta chulla runalla waranqa runakunata qatikacharunqa, Señorninchik Tayta Diosmi qamkunarayku peleanqa.

¹¹ Chaynaqa, mana allinkunamanta waqaychakuspayá Señorninchik Tayta Diosta kuyaychik.

¹² Sichum Tayta Diosmanta rakikuspaykichik qamkuna ukupi yachaq huklaw nacionniyuq runakunawan hukllawakuspa paykunawan casarakuptikichikqa,

¹³ Señorninchik Tayta Diospas manam qamkuna ukumanta chay nacionkunata qarqonqachu, aswanqa paykunam qamkunapaq kanqa wichinaykichikpaq toqlla hina, malla hina, wasaykichikpaq azote hina, ñawikichikpaq kichka hina. Chaynaqa, kanqaku Señornikichik Tayta Diospa qosusqaykichik allin allpamanta chinkanaykichikkamam.

¹⁴ Ñoqaqa wañukusaqñam. Chaynaqa, tukuy sonqoykichikwan chaynataq tukuy vidaykichikwanyá yachaychik, Señorninchik Tayta Diosqa lliw pro-metesusqaykichiktam cumplirun, prometekusqankunaqa manam chullallapas mana cumplisqaqa karqachu.

¹⁵ Ichaqa imaynam lliw prometesusqaykichikta cumplirqa, chay hinataqmi Señorninchik Tayta Diosqa castigasunaykichikpaq ñakariykunatapas apa-musunkichik, qosusqaykichik allin allpamanta chinkachisunaykichikkama.

¹⁶ Sichum Señornikichik Tayta Diospa kamachisusqaykichik pactonta mana kasukuspa idolokunataña qonqorakuspa yupaychanaykichikpaq pasakuptikichikqa, Tayta Diosmi contraykichikpi piñakuspan kay qosusqaykichik sumaq allpamanta chaylla chinkarachisunkichik, nispa.