Josué 22 - CHUYA QELLQA La Biblia en Quechua de Ayacucho 2012

Wakin ayllukuna Jordán mayupa waklaw chimpanman kutisqankumanta

¹ Josueymi Rubén aylluta, Gad aylluta chaynataq Manasespa wakin ayllunta qayaspan

² nirqa: Qamkunaqa Tayta Diospa serviqnin Moisespa kamachisusqaykichikta ruway-man churaspam kamachisqaykunatapas kasukurqankichik.

³ Kunan punchaw-kamaqa manam wakin aylluykichikkunata saqerurqankichikchu, aswanqa Tayta Diosta kasukuspam imam kamachisusqaykichikman hina ruwarqankichik.

⁴ Kayqaya Tayta Diosqa prometesqanman hina wakin aylluykichikmanpas hawkayayta qoykunña. Kunanqa Jordán mayupa intipa qespimunan lawninpi, Tayta Diospa serviqnin Moisespa qosusqaykichik allpaykichikman chaynataq carpaykichikmanñayá kutikuychik.

⁵ Ichaqa Tayta Diospa serviqnin Moisespa qosusqaykichik kamachikuykunata hinaspa yachachikuykunata ama qonqaspa kasukuychik. Señornikichik Tayta Diosta kuyaychik, paypa munasqanman hinayá kawsaychik, kamachikuyninkunata waqaychaychik, tukuy sonqoykichikwan chaynataq tukuy almaykichikwan qatispa payta serviychik, nispa.

⁶ Chaynata nispanmi Josueyqa bendeciykuspan paykunata wasinkuman aviarurqa.

⁷ Manasespa wakin ayllumanmi Basán lawpi allpata Moisés qorqa; wakiqninkumanñataqmi Josué qorqa, Jordán mayupa intipa seqaykunan lawninpi. Paykunatapas bendeciykuspanmi wasinkuman aviaspan

⁸ kaynata nirqa: Wasikichikman kutikuychik hinaspa enemigoykichikmanta qechumusqaykichik animalkunata, qorikunata, qollqekunata, broncekunata, fierrokunata chaynataq pachakunata apaspa wakin aylluykichikmanpas rakimuychik, nispa.

⁹ Chaynatam Manasespa wakin ayllu-manta, Rubén ayllumanta, Gad ayllumanta kaqkuna, wakin ayllumasinkumanta Canaán lawpi kaq Silo llaqtapi rakikuykuspanku Galaad lawpi allpankuman kutikurqaku. Chaypim paykunapa allpan karqa Moisesman Tayta Diospa kamachisqanman hina.

¹⁰ Manasespa wakin ayllumanta, Rubén ayllumanta, Gad ayllumanta kaqkunam, Canaán lawpi Jordán mayupa patanman chayaruspanku hatun altarta hatarichirqaku.

¹¹ Israelpa wakin mirayninkunam yacharurqaku, Manasespa wakin ayllupa, Rubén ayllupa, Gad ayllupa, Jordán mayupa patanpi, allpanku ukupi hatun altarta hatarirachisqankuta.

¹² Chay ruwasqankuta yacharuspankum Canaán lawpi kaq Israelpa wakin mirayninkuna, paykunawan peleanankupaq Silo llaqtapi huñunakururqaku.

¹³ Ichaqa manaraq richkaspankum Israelpa mirayninkunaqa, Galaad lawpi kaq Rubén aylluman, Gad aylluman chaynataq Manasespa wakin aylluman, sacerdote Eleazarpa churin Fineesta ñawpachirqaku.

¹⁴ Fineeswan kuskam rirqaku chunka kamachikuqkuna, paykunaqa sapa ayllupi kamachikuqkunam karqaku.

¹⁵ Paykunam Galaad lawpi kaq Rubén aylluman, Gad aylluman hinaspa Manasespa wakin aylluman chayaruspanku nirqaku:

¹⁶ Tayta Diospa llapallan runankunam kaynata nin: ¿Imanasqataq kaykunata ruwaspa Israelpa Diosninpa contranpi hatarirunkichik? ¿Imanasqataq Tayta Diosta qepanchaspa kay hatun altarta ruwakuruspa Tayta Diospa contranpi hatarirunkichik?

¹⁷ ¿Manachu yuyankichik Peor lawpi huchallikusqanchikta? Chayraykum Tayta Diosqa ayllunchikkunata wañurachirqa, ñoqanchikpas hinallaraqmi chay huchanchikmanta ñakarichkanchik.

¹⁸ ¿Allinpaqchu hapinkichik Tayta Diosmanta rakikuruyta? Sichum kunan Tayta Diospa contranpi hatariptikichikqa, paypas piñakuruspanmi Israelpa mirayninkunata castigarunqa.

¹⁹ Sichum Tayta Diosta kay allpaykichikpi yupaychayta mana atispaykichikqa, Tayta Diosman asuykuna carpapa kasqanman hamuspa chaypi yupaychaychik hinaspa ñoqaykuwan kuska yachaychik, ichaqa ama kay sapaq altarkunata hatarichispaykichik Tayta Diospa contranpi nitaq ñoqaykupa contraykupipas hatariychikchu.

²⁰ Zerapa churin Acán sutiyuq runapa huchallikusqantayá yuyariychik. Paymi chinkachisqa kananpaq rakisqa kaqkunata hapikuykuspan huchallikururqa. Chayraykum Israelpa mirayninkunapa contranpi Tayta Dios piñakurqa. Chay runaqa manam sapallanchu huchallikusqanmantaqa wañurqa, nispa.

²¹ Chaymi Rubén ayllumanta, Gad ayllumanta hinaspa Manasespa wakin ayllumanta kaqkuna, Israelpa wakin mirayninkunapa kachamusqan kamachikuqkunata nirqaku:

²² Dioskunapapas Diosnin Señorninchik Tayta Diosmi yachan, chaytaqa manam paypa contranpi hatarispaykuchu nitaqmi payta qepanchaspaykuchu ruwarqaniku. Paymi yachan, qamkunapas yachaychikyá, sichum chayrayku ruwaptiykuqa, lliwtayá kunan wañurachiwayku.

²³ Sichum chay altarta Tayta Diosmanta rakikunaykupaq ruwaruptiykuqa, otaq lliw kañana sacrificiokunata, kawsaykunamanta ofrendata, Dioswan allin-lla kasqaykumanta ofrendata kañanaykupaq ruwaptiykuqa kikin Tayta Diosyá cuentata mañawachunku.

²⁴ Ño-qaykuqa ruwarqaniku hamuq pun-chawkunapi miraynikichikkuna ñoqay-kupa mirayniykuta: “Israelpa yupaychasqan Tayta Diospa kaqkunawanqa manam imapas ruwanaykichik kanchu,

²⁵ Tayta Diosmi Jordán mayuwan qamkunamanta ñoqaykuta rakinawarqaku, chaynaqa manam Tayta Diospiqa partekichik kanchu” ninankuta mancha-kuspaykum. Chaynapichá miraynikichikkuna ñoqaykupa mirayniykuta Tayta Diosmanta rakirunmanku.

²⁶ Chayraykum chay altartaqa ruwarqaniku, ichaqa manam animalta wañuchispa lliw kañana sacrificiokunata otaq huk rikchaq ofrendakunata ofrecekunaykupaqchu.

²⁷ Aswanqa ñoqaykupaqpas qamkunapaqpas chaynataq mirayninchikkunapaqpas testigo kananpaqmi, chaynapi lliw kañana sacrificiokunawan chaynataq Dioswan allinlla kasqaykumanta ofrendakunawan, Tayta Diosta santuarionpi yupaychamunaykupaqmi. Chaynapim hamuq punchawkunapi miraynikichikkuna ñoqaykupa mirayniykuta mana ninqakuchu: “Israelpa yupaychasqan Tayta Diospa kaqkunawanqa manam imapas ruwanaykichik kanchu” nispankuqa.

²⁸ Ñoqaykum kaynata ninakurqaniku: Sichum hamuq punchawkunapi ñoqanchiktapas otaq mirayninchiktapas chaynata niptinkuqa kaynatam nisunchik: Ñawpaq taytaykuqa manam kay altartaqa ruwarqaku lliw kañana sacrificiokunata otaq wakin ofrendakunata Tayta Diosman ofrecenankupaqchu, aswanqa qamkunapaqpas ñoqaykupaqpas testigo hina kananpaqmi, nispanchik.

²⁹ Amayá Tayta Diospas munachunchu huk altarta ruwaruspa chaypi rikchaqmana ofrendakunata ofrecespa Tayta Diospa contranpi hatarispa paymanta rakikunaykutaqa. Chaykunapaqqa Tayta Diosman asuykuna carpapa ñawpaqninpi altarllam kanqa, nispanku.

³⁰ Hinaptinmi sacerdote Fineeswan riqmasin kamachikuqkuna, Rubén ayllupa, Gad ayllupa chaynataq Manasespa wakin ayllunpa rimasqankuta uyariruspanku allinpaq hapirqaku.

³¹ Chaymi paykunata sacerdote Eleazarpa churin Finees nirqa: Kunanmi yachaykuniku Tayta Diosqa ñoqanchikwan kasqanta, chayta ruwaspaykichikqa manam Tayta Diospa contranpi hatarinaykichikpaqchu nitaqmi payta qepan-chanaykichikpaqchu ruwarqankichik. Kunan-mi Tayta Diospa castigonmanta Israelpa wakin mirayninkunata libraruwankiku, nispa.

³² Chaymantam sacerdote Eleazarpa churin Fineesqa riqmasin kamachikuqkunapiwan, Galaad lawpi Rubén ayllumanta, Gad ayllumanta, Manasespa wakin ayllumanta rakikuykuspa Canaán lawpi Israelpa wakin mirayninkunapa kasqanman kutikurqaku. Chayaruspankum imakunam rimasqankuta paykunaman willarqaku.

³³ Chaymi Israelpa wakin mirayninkunaman allinpaq rikchakapurqa, chayraykum Tayta Diosta yupaycharqaku. Chaymanta qepamanqa manañam Rubén aylluta, Gad aylluta, Manasespa wakin ayllunta guerrawan chinkarachiyta tantearqakuñachu.

³⁴ Rubén aylluwan Gad ayllu hinaspa Manasespa wakin aylluñataqmi chay altarta “Ed” nispa suticharqaku. Chaynataqa suticharqaku: Kay altarmi testigo kanqa Tayta Dioslla ñoqanchikpaq cheqap Dios kasqanmanta, nispanku.