Josué 21 - CHUYA QELLQA La Biblia en Quechua de Ayacucho 2012

Leví ayllupa llaqtankunamanta

¹ Leví ayllupa kamachiqninkunam, sacerdote Eleazarman, Nunpa churin Josueyman chaynataq Israelpa kamachiqninkunaman rirqaku,

² Canaán law Silo llaqtapi kachkaptinku, hinaspam nirqaku: Tayta Diosmi Moisesman kamachirqa yachanaykupaq llaqtakunata chaynataq animalniykupaqpas echaderokunata qowanaykikupaq, nispanku.

³ Chaymi Israelpa mirayninkunaqa, kikinkupa allpankumanta, llaqtakunatawan echaderokunata Leví aylluman qorqaku, Tayta Diospa kamachisqanman hina.

⁴ Sorteaptinkum Leví ayllumanta kaq sacerdote Aaronpa miraynin Coatpa churinkunaman chunka kimsayuq llaqtakuna tuparurqa. Chay llaqtakunam karqa Judá ayllupa, Simeón ayllupa chaynataq Benjamín ayllupa allpanku ukupi.

⁵ Coatpa wakin churinkunapaq sorteaptinkuñataqmi chunka llaqtakuna tuparurqa. Chay llaqtakunam karqa Efraín ayllupa, Dan ayllupa hinaspa Manasés wakin ayllupa allpanku ukupi.

⁶ Musoqmanta sorteaptinkum Gersonpa mirayninkunaman chunka kimsayuq llaqtakuna tuparurqa. Chay llaqtakunam karqa Isacar ayllupa, Aser ayllupa, Neftalí ayllupa chaynataq Basán lawpi Manasespa wakin ayllupa allpanku ukupi.

⁷ Meraripa mirayninkunamanmi, haykam kasqankuman hina, chunka iskayniyuq llaqtakuna tuparurqa. Chay llaqtakunam karqa Rubén ayllupa, Gad ayllupa hinaspa Zabulón ayllupa allpanku ukupi.

⁸ Moisesman Tayta Diospa kamachisqanman hinam, Leví ayllukunaman sorteaspanku Israelpa mirayninkuna, chay llaqtakunatawan echaderonkunata qorqaku.

⁹ Judá ayllumantawan Simeón ayllumantapas kay sutichasqa llaqtakunatam qorqaku.

¹⁰ Chay llaqtakunam puntata sorteasqankurayku Leví ayllumanta kaq Aaronpa miraynin Coatpa mirayninkunaman tuparurqa.

¹¹ Paykunamanmi qorqaku Judá ayllupa orqonkunapi Quiriat-arba otaq Hebrón llaqtata muyuriqninpi echaderonkunatawan. Quiriat-arbaqa karqa Anacpa mirayninkunapa llaqtanmi.

¹² Ichaqa chay llaqtapa chakrankunatam muyuriqninpi taksa llaqtankunatawan Jefonepa churin Calebman qoykurqaku.

¹³ Sacerdote Aaronpa mirayninkunamanmi Hebrón llaqtatawan echaderonkunata qoykurqaku. Hebronqa karqa amparakuna llaqtam. Qoykurqakutaqmi kay llaqtakunatapas: Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta hinaspa Bet-semestapas. Chay isqon llaqtakunatam echaderonkunatawan Judá hinaspa Simeón ayllukunapa allpanpi qorqaku.

¹⁷ Benjamín ayllupa allpanpiñataqmi kay llaqtakunata qorqaku: Gabaón, Geba,

¹⁸ Anatot hinaspa Almontapas. Chay tawa llaqtakunatam echaderonkunatawan qorqaku.

¹⁹ Aaronpa miraynin sacerdotekunapa llaqtankunam karqa chunka kimsayuq llaqtakuna echaderontinkama.

²⁰ Leví ayllumanta Coatpa wakin mirayninkunamanñataqmi sorteasqankuman hina Efraín ayllupa allpanpi llaqtakunata qorqaku.

²¹ Paykunamanmi Efraín ayllupa orqonkunapi Siquem llaqtata qorqaku, Siquemqa karqa amparakuna llaqtam. Qorqakutaqmi Gezer,

²² Kibsaim chaynataq Bet-horón llaqtakunatapas echaderontintakama.

²³ Dan ayllupa allpanpim qorqaku Elteque, Gibetón,

²⁴ Ajalón chaynataq Gat-rimón llaqtakunata echaderontintakama.

²⁵ Manasespa wakin ayllupa allpanpim qorqaku Taanac llaqtatawan Gat-rimón llaqtata echaderontintakama.

²⁶ Chaynaqa, Coatpa wakin mirayninkunamanmi chunka llaqtakunata echaderontintakama qorqaku.

²⁷ Leví ayllumanta kaq Gersonpa mirayninkunamanmi qorqaku Manasespa wakin ayllupa allpanpi kaq Basán lawpi Golán llaqtata, Golanqa karqa amparakuna llaqtam. Qorqakutaqmi Beestera llaqtatapas. Chaykunam karqa iskay llaqtakuna echaderontinkama.

²⁸ Isacar ayllupa allpanpim qorqaku Cisón, Daberat,

²⁹ Jarmut chaynataq En-ganimtapas; kay tawa llaqtakunata echaderontintakama.

³⁰ Aser ayllupa allpanpim qorqaku Misael, Abdón,

³¹ Helcat chaynataq Rehobta, tawa llaqtakunata echaderontintakama.

³² Neftalí ayllupa allpanpim qorqaku Galilea lawpi Cedes llaqtata, Cadesqa karqa amparakuna llaqtam. Qorqakutaqmi Hamot-dor chaynataq Cartán llaqtakunatapas. Kay kimsa llaqtakunatam echaderontintakama qorqaku.

³³ Chaynaqa, Gersonpa mirayninkunamanmi chunka kimsayuq llaqtakunata echaderontintakama qorqaku.

³⁴ Leví ayllumanta kaq Meraripa mirayninkunamanmi qorqaku Zabulón ayllupa allpanpi Jocneam, Carta,

³⁵ Dimna hinaspa Naalal llaqtakunata. Kay tawa llaqtakunatam echaderontintakama qorqaku.

³⁶ Rubén ayllupa allpanpim qorqaku Beser, Jahaza,

³⁷ Cademot hinaspa Mefaat llaqtakunatapas. Kay tawa llaqtakunatam echaderontintakama qorqaku.

³⁸ Gad ayllupa allpanpim qorqaku Galaad lawpi Ramot llaqtata, Ramotqa karqa amparakuna llaqtam. Qorqakutaqmi Mahanaim,

³⁹ Hesbón chaynataq Jazer llaqtakunatapas. Chay tawa llaqtakunatam echaderontintakama qorqaku.

⁴⁰ Chaynaqa, Leví ayllumanta kaq Meraripa mirayninkunamanmi sorteasqankuman hina chunka iskayniyuq llaqtakuna echaderontinkama tuparurqa.

⁴¹ Israelpa mirayninkunapa allpanku ukupim Leví aylluman tuparurqa tawa chunka pusaqniyuq llaqtakuna echaderontinkama.

⁴² Chay llaqtakunaqa sapakamam karqa muyuriqninpi echaderoyuqkama.

Prometesqankunata Tayta Dios cumplisqanmanta

⁴³ Imaynam ñawpaq taytankuman jurasqanman hinam Israelpa mirayninkunaman llapallan allpata Tayta Dios qorqa. Hinaptinmi paykunaña chaypi yacharqaku.

⁴⁴ Tayta Diosmi paykunaman hawkayayta qoykurqa, imaynam ñawpaq taytankuman prometesqanman hina, Tayta Dios paykunata yanapasqanraykum enemigonkunapas mana ima ruwaytapas atirqakuchu.

⁴⁵ Tayta Diosqa Israelpa mirayninkunaman prometesqantaqa lliwtam cumplirqa.