Josué 20 - CHUYA QELLQA La Biblia en Quechua de Ayacucho 2012

Amparakuna llaqtakunamanta

¹ Josueytam Tayta Dios nirqa:

² Israelpa mirayninkunata niy, Moisesman kamachisqayman hina amparakuna llaqtakunata akllanankupaq.

³ Chaynapi pipas qonqaymanta runamasinta wañurachispanqa, wañurachisqan runapa ayllun vengakurunanmanta hukkaqnin llaqtaman lluptikunanpaq.

⁴ Chay hukkaqnin llaqtaman ayqekuspam llaqtapa punkunpi ancianokunaman imam ruwaramusqanta willakunqa. Llapa ancianokunañataqmi uyarispanku chaskinqaku wasichakuspa paykunawanña yachananpaq.

⁵ Wañuchisqan runapa ayllun wañurachinanpaq qati-muptinpas llapa ancianokunaqa manam chay wañuchiqtaqa qonqakuchu, mana cheqnichkaspan qonqaymanta wañura-chisqanrayku.

⁶ Wañuchiq runañataqmi chay llaqtallapi yachanqa, llaqta huñunakuptin juzgasqa kanankama chaynataq sumo sacerdote wañukunankama. Chaymantañam chay wañurachiq runaqa lluptimusqan llaqtanpi wasinman kutinqa, nispa.

⁷ Chaynapim Israelpa mirayninkunaqa akllarqaku, Neftalí ayllupa orqonkunapi kaq Galilea lawpi Cedes llaqtata, Efraín ayllupa orqonkunapi kaq Siquem llaqtata hinaspa Judá ayllupa orqonkunapi kaq Quiriat-arba otaq Hebrón llaqtata,

⁸ Jericó llaqtapa chimpan Jordán mayupa intipa qespimunan lawninpi Rubén ayllupa allpanpi Beser llaqtata, Galaad lawpi Gad ayllupa allpanpi Ramot llaqtata hinaspa Basán lawpi Manasés ayllupa allpanpi Golán llaqtatapas.

⁹ Chay llaqtakunatam akllarqaku Israelpa mirayninkunapaq chaynataq paykunawan yachaq huklaw llaqtayuqkunapaqpas. Chay llaqtakunam karqa qonqaymanta runamasinta wañurachiq runapa lluptikunanpaq, chaynapi wañurachisqan runapa ayllunkuna wañuchinanmanta ayqenanpaq, llaqta huñunakuspa juzganankama.