Josué 2 - CHUYA QELLQA La Biblia en Quechua de Ayacucho 2012

Jericó llaqtaman wateqaqkunata kachasqanmanta

¹ Nunpa churin Josueymi, Sitim lawmanta mana pipapas yachasqallanta, iskay wateqaqkunata kachaspan kaynata nirqa: Jericó llaqtatawan muyuriqninpi allpakunata qawaramuychik, nispa. Chaymi rispanku Rahab sutiyuq chuchumika warmipa wasinman chayaruspanku chaypi samarurqaku.

² Ichaqa hukkaqninmi Jericó llaqtapa reyninman kaynata willaykurqa: Israelpa mirayninmanta kaq runakunam allpanchikta wateqanankupaq kunan tuta hamurunku, nispa.

³ Reyñataqmi Rahabta kaynata nichi-murqa: Wasikiman chayamuq runakunata hurqomuy, chay runakunaqa allpanchik wateqaqmi hamurunku, nispa.

⁴ Rahabmi ichaqa chay iskay runakunata pakaruspan nirqa: Chay runakunaqa cheqaptam wasiyman chayaramurqaku, ichaqa manam tapurqanichu maymantam kasqankutapas.

⁵ Tutaykaramuptinmi llaqtapa punkunta wichqanankupaq kachkaptinku pasakurqaku. Manam yachanichu maymanmi risqankutapas. Sichum utqayman qatispaykichikqa hayparunkichikmi, nispa.

⁶ Chay runakunataqa Rahabmi wasinpa qatanman seqarachispa linaza masasqanwan pamparurqa.

⁷ Reypa kachasqan runakunañataqmi, Jordán mayupa vadonkunakama qatirqaku. Chay qatiqninku runakuna lloqsiruptillankum punkutapas wichqarurqaku.

⁸ Rahabñataqmi, pakasqan runakuna manaraq puñuruchkaptinku, wasi hawanman qespiruspan nirqa:

⁹ Yachanim kay allpata Tayta Dios qosusqaykichikta. Qamkunaraykum Tayta Dios hatun manchakuyta sonqoykuman churarun. Chayraykum kay nacionpi yachaqkuna manchakuymanta wañusqa hinaña kachkaniku.

¹⁰ Uyarirqanikum Egipto nacionmanta lloqsimuptikichik Puka lamar qochatapas qayllaykichikpi Tayta Dios chakirachisqanta hinaspa Jordán mayupa waklaw chimpanpi kaq amorreokunapa reynin Sehontawan Ogta pasaypaqta vencerusqaykichiktapas.

¹¹ Chay uyarisqayku anchata mancharirachiwaptinkum, manaña pi runapipas valor kanñachu qamkunawan peleananpaq. Qamkunapa Diosnikichikqa, hanaq pachapipas kay pachapipas Diosmi.

¹² Ruegakuykichikmi, Tayta Diosraykuyá juraykuwaychik, imaynam qamkunata llakipayasqayta hina, qamkunapas aylluykunata llakipayarinaykichikpaq. Huk señaltayá qoykuwaychik,

¹³ tayta-mamaytapas turiykunatapas ñañaykunatapas chaynataq kapuqninkunatapas libraykuspa vidaykutapas wañuymanta salvaykuwanaykikupaq, nispa.

¹⁴ Hinaptinmi chay runakuna nirqaku: Mana willakuptikiqa ñoqaykum rantikichikpi wañusaqku. Kay allpata Tayta Dios qoykuwaptinkuqa, qamtapas aylluy-kikunatapas cheqaptapunim kuyapayarisqaykiku, nispa.

¹⁵ Rahabpa wasinqa llaqtapa murallanpi ruwasqam karqa, chaymi paykunata chay perqapa ventanantakama waskawan uraykachispan

¹⁶ nirqa: Qatimusuqnikichik runakuna mana tarirusunaykichikpaqyá orqoman pasakuspa, paykuna kutimunankukama kimsa punchaw chaypi pakakaramuychik. Chaymantañam maymi rinaykichikta pasakunkichik, nispa.

¹⁷ Chaymi paykuna nirqaku: Kay juramento ruwasqaykutaqa cumplisaqkupunim.

¹⁸ Chaynaqa, ñoqayku kay allpaman yaykumuptiykum, uraykachiwasqaykiku ventanapi kay puka waskata warkunki, hinaspam taytaykita mamaykita, turi-ñañaykikunata chaynataq llapallan aylluykikunata wasikiman huñunki.

¹⁹ Pipas wasikimanta hawaman lloqsispa wañuruspaqa, kikinmi wañusqanmanta huchayuq kanqa. Hina wasiki ukupi kachkaptin pipas wañurachiptinmi ichaqa ñoqayku huchayuq kasaqku.

²⁰ Sichum kay rimasqanchikta willakurunki, hinaptinqa kay juramento ruwasqaykumantam libre kasaqku, nispa.

²¹ Chaymi Rahab nirqa: Nisqaykichikman hinayá kachun, nispa. Chaymantam aviaruptin paykuna pasakurqaku. Rahabñataqmi ventananta chay puka waskata warkururqa.

²² Chay iskay wateqaqkunam orqoman chayaruspanku, qatimuqninku runakuna kutimunankukama kimsa punchaw chaypi pakakurqaku. Chay runakunam tukuy hinastinpi maskarqaku, ichaqa manam tarimurqakuchu.

²³ Hinaptinmi chay iskaynin wateqaqkuna, orqomanta uraykamuspanku, Jordán mayuta chimparuspa, Nunpa churin Josueypa kasqanman kutiruspanku paykunata tukuy imakuna pasamusqanta willakurqaku.

²⁴ Paykunam Josueyman kaynata nirqaku: Tayta Diosmi lliw allpata qoykuwanchik. Llapa runakunapas ñoqanchikraykum manchakuymanta katkatatachkanku, nispanku.