Josué 19 - CHUYA QELLQA La Biblia en Quechua de Ayacucho 2012

Simeón ayllupa allpanmanta

¹ Iskay kaq sorteasqankum haykam kasqankuman hina Simeón aylluman tuparurqa. Chay chaskisqanku allpaqa karqa Judá ayllupa tupaqnin allpa ukupim.

² Paykunapa herencia chaskisqankum karqa: Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot hinaspa Saruhén. Llapallanmi karqa chunka kimsayuq llaqtakuna sapakama taksa llaqtankunapiwan.

⁷ Aín, Rimón, Eter hinaspa Asán. Tawa llaqtakuna sapakama taksa llaqtankunapiwan.

⁸ Simeón aylluqa chaskirqataqmi chay llaqtakunapa muyuriqninpi taksa llaqtakunatapas Baalat-beer llaqtakama. Chay llaqtapa huknin sutinmi karqa Ramat, chaymi tarikurqa Neguev law chunniqpi.

⁹ Simeón ayllumanmi allpanta qorqaku Judá ayllupa allpan ukupi. Chaynataqa ruwarqaku Judá ayllupa allpan hatun kasqanraykum. Chaynapim Simeón aylluqa Judá ayllupa allpan ukupi tupaqnin allpata chaskirqa.

Zabulón ayllupa allpanmanta

¹⁰ Kimsa kaq sorteasqankum, haykam kasqankuman hina, Zabulón aylluman tuparurqa. Chaskisqanku allpam chayarqa Sarid llaqtakama.

¹¹ Intipa seqaykunan lawmanmi Marala llaqtanta Dabeset llaqtaman rispa Jocneam llaqtapa chimpan wayqokama chayarqa.

¹² Sarid llaqtamantam intipa qespimunan lawman muyuspan Quislot-tabor llaqtapa patantakama Daberat llaqtanta rispan Jafía llaqtakama qespirqa.

¹³ Chaymantam intipa qespimunan lawman rispan Gat-heferninta chaynataq Ita-cazín llaqtanta Rimón llaqtaman lloqsirqa, hinaspam Nea llaqtanta muyumurqa.

¹⁴ Norte lawmanñataqmi muyumurqa Hanatón llaqtanta Jefte-el qechwakama.

¹⁵ Paykunapa allpanpim karqa kay llaqtakuna: Catat, Naalal, Simrón, Idala hinaspa Belén. Llapallanmi karqa chunka iskayniyuq llaqtakuna sapakama taksa llaqtankunapiwan.

¹⁶ Kaykunam Zabulón ayllupa allpanku karqa, llaqtakunapas sapakama taksa llaqtankunapiwan, haykam kasqankuman hina.

Isacar ayllupa allpanmanta

¹⁷ Tawa kaq sorteasqankum, haykam kasqankuman hina, Isacar aylluman tuparurqa.

¹⁸ Paykunapa allpankupim kay llaqtakuna tarikurqa: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada hinaspa Bet-pases.

²² Allpankum chayarqa Tabor orqowan, Sahazima llaqtawan hinaspa Bet-semes llaqtawan tupanakuqkama, hinaspam Jordán mayupi tukurqa. Llapallanmi karqa chunka soqtayuq llaqtakuna sapakama taksa llaqtankunapiwan.

²³ Kaykunam Isacar ayllupa allpanku karqa, llaqtakunapas sapakama taksa llaqtankunapiwan, haykam kasqankuman hina.

Aser ayllupa allpanmanta

²⁴ Pichqa kaq sorteasqankum, haykam kasqankuman hina, Aser aylluman tuparurqa.

²⁵ Paykunapa allpankupim kay llaqtakuna tarikurqa: Helcat, Halí, Betén, Acsaf,

²⁶ Alamelec, Amad hinaspa Miseal. Intipa seqaykunan lawmanmi chayarqa Carmelo orqokama hinaspa Sihor-libnat lawkama.

²⁷ Chaymantam intipa qespimunan lawman Bet-dagón llaqtaman muyumuspa norte lawninta Zabulón ayllupa allpantakama Jefte-el wayqonta Bet-emec llaqtakama hinaspa Neiel llaqtakama chayarqa, chaymantam Cabul llaqtaman lloqsirqa.

²⁸ Paykunapa allpankupim kay llaqtakuna tarikurqa: Abdón (Hebrón), Rehob, Hamón hinaspa Caná, Sidón hatun llaqtawan tupanakuqkama.

²⁹ Chaymantam Ramá llaqtanta murallasqa Tiro llaqtakama muyumurqa, hinaspam Hosa llaqtanta muyumuspa Aczib llaqtanta Mar Mediterraneoman lloqsirqa.

³⁰ Allpankupitaqmi kay llaqtakunapas tarikurqa: Uma, Afec hinaspa Rehob. Llapallanmi karqa iskay chunka iskayniyuq llaqtakuna sapakama taksa llaqtankunapiwan.

³¹ Kaykunam Aser ayllupa allpanku karqa, llaqtakunapas sapakama taksa llaqtankunapiwan, haykam kasqankuman hina.

Neftalí ayllupa allpanmanta

³² Soqta kaq sorteasqankum, haykam kasqankuman hina Neftalí aylluman tuparurqa.

³³ Allpankum karqa, Helef, Alón-saananim, Adami-neceb, Jabneel llaqtakunamanta qallarispa Lacum llaqtakama hinaspam Jordán mayuman lloqsirqa.

³⁴ Chaymantam intipa seqaykunan lawman muyumuspa Aznot-tabor lawninta, Hucoc llaqtanta rispan sur lawninta Zabulón ayllupa allpanwan tupanakuqkama. Intipa seqaykunan lawmanñataqmi Aser ayllupa allpanwan tupanakurqa, intipa qespimunan lawmanñataqmi Jordán mayukama chayarqa.

³⁵ Murallasqa llaqtakunam karqa: Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat hinaspa Bet-semes. Llapallanmi karqa chunka isqonniyuq llaqtakuna sapakama taksa llaqtankunapiwan.

³⁹ Kaykunam Neftalí ayllupa allpanku karqa, llaqtakunapas sapakama taksa llaqtankunapiwan, haykam kasqankuman hina.

Dan ayllupa allpanmanta

⁴⁰ Qanchis kaq sorteasqankum, haykam kasqankuman hina, Dan aylluman tuparurqa.

⁴¹ Paykunapa allpankupim kay llaqtakuna tarikurqa: Zora, Estaol, Ir-semes.

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehud, Bene-berac, Gat-rimón,

⁴⁶ Mejarcón hinaspa Racón. Paykunapataqmi karqa Jope llaqtapa hichpanpi kaq allpakunapas.

⁴⁷ Ichaqa Dan aylluman allpa mana haypasqanraykum, Lesem llaqtata atacamunankupaq rirqaku, runankunata espadawan wañura-chispankum paykunaña chaypi yachakurqaku, hinaspam taytanku Danpa sutinwan suticharqaku.

⁴⁸ Kaykunam Dan ayllupa allpanku karqa, llaqtakunapas sapakama taksa llaqtankunapiwan, haykam kasqankuman hina.

Josueypa allpanmanta

⁴⁹ Allpa rakinakuyta tukuruspankum Israelpa mirayninkunaqa, kikinkupa allpanku ukupi, Nunpa churin Josueyman allpata qorqaku.

⁵⁰ Tayta Diospa kamachisqanman hinam, Efraín ayllupa yachasqan orqokunapi Timnat-sera llaqtata qorqaku, Josueypa mañakusqanman hina. Chaymi Josueyqa chay llaqtata musoqmanta hatarichispan chaypi yacharqa.

⁵¹ Kay allpakunatam sacerdote Eleazar, Nunpa churin Josué chaynataq llapa kamachikuqkuna sorteaspanku Israelpa mirayninkunaman qorqaku. Sortearqakuqa Silo llaqtapim Tayta Diosman asuykuna carpapa punkunpi. Chaynatam allpa rakinakuyta tuku-rurqaku.