Josué 18 - CHUYA QELLQA La Biblia en Quechua de Ayacucho 2012

Wakin ayllukunapa allpanmanta

¹ Israelpa mirayninkunam allpata munaychakuruspanku, Silo llaqtapi huñunakuspa Diosman asuykuna carpata sayachirqaku.

² Ichaqa Israelpa mirayninkunamantam qanchis ayllukunaraq tupaqninku allpata manaraq chaskirqakuchu.

³ Chayraykum Israelpa mirayninkunata Josué nirqa: ¿Haykapikamataq qellakunkichik ñawpaq taytaykichikman Tayta Diospa qosqan allpata hapimunaykichikpaq?

⁴ Chaynaqa, sapa ayllumanta kimsa runakunata akllaychik, paykunata kamachiptiy llapallan allpata qawamuspanku imaynam kasqanta willawanankupaq, chaynapi rakinakunaykichikpaq.

⁵ Chay allpataqa qanchismanmi rakinankichik. Judá ayllupaqmi sur law kanqa. Joseypa mirayninkunapaqñataqmi norte lawman kanqa.

⁶ Chay allpata qanchisman rakinaruspaykichikmi imaynam kasqanta ñoqaman willawankichik, chaynapi yupaychasqanchik Tayta Diospa qayllanpi sorteanaypaq.

⁷ Leví ayllum ichaqa tupaqnin allpata mana chaskinqachu. Tayta Diospa sacerdoten kayninkum paykunapa tupaqninkuqa kanqa. Gad ayllupas, Rubén ayllupas chaynataq Manasespa wakin ayllupas ñam tupaqninku allpata chaskirunkuña, Jordán mayupa intipa qespimunan waklaw chimpanpi. Chay allpatam paykunaman Tayta Diospa serviqnin Moisés qorqa, nispa.

⁸ Hinaptinmi chay runakuna rinankupaq allichakuptinku Josué nirqa: Rispayá chay allpata qawamuspa rakinaramuychik. Rakiyta tukuramuspañataqmi imayna ruwamusqaykichikta kutimuspa willawankichik, kay Silo llaqtapi Tayta Diospa qayllanpi sorteanaypaq, nispa.

⁹ Hinaptinmi chay runakuna rispanku chay allpata purimuspanku llaqtan-llaqtan qanchisman rakinaramurqaku. Chaytam qellqaruspanku Josueyman apamurqaku Silo llaqtapi campamentonpi kachkaptin.

¹⁰ Josueyñataqmi Silo llaqtapi Tayta Diospa qayllanpi sorteaspan Israelpa mirayninkunaman, sapa aylluman qoykarirqa.

Benjamín ayllupa allpanmanta

¹¹ Sorteasqankuman hinam haykam kasqankuman hina Benjamín aylluman allpa tuparurqa Judá ayllupa allpanwan tupanakuqmanta Joseypa mirayninkunapa allpanwan tupanakuqkama.

¹² Norte lawmanmi karqa Jordán mayumanta qallarispa wichayman Jericó llaqtapa norte lawninkama. Chaymantam orqonkunatakama intipa seqaykunan lawman rispa Bet-avén chunniqkama chayarqa.

¹³ Chaymantam Luz llaqtapa otaq Bet-el llaqtapa sur lawninta rispa Atarot-adarninta uray lawpi Bet-horón llaqtapa sur lawninpi orqokama uraykurqa.

¹⁴ Hinaspam Mediterráneo lamar qocha lawman muyumurqa Bet-horón llaqtapa chimpan orqopa sur lawninta Quiriat-baal llaqtakama otaq Quiriat-jearim llaqtakama. Chay llaqtaqa Judá ayllupam karqa. Chay llaqtakunawanmi intipa seqaykunan lawman tupanakurqa.

¹⁵ Sur lawmanñataqmi Quiriat-jearim llaqtamanta qallarispa intipa seqaykunan lawman Neftoa llaqtapa pukyunkunakama chayarqa.

¹⁶ Chaymantam Ben-hinomkama chaynataq Refaim wayqopa norte lawnin waqtakama uraykurqa, hinaspam jebuseokunapa sur lawninpi Hinom wayqoman uraykuspan Rogel pukyukama chayarqa.

¹⁷ Hinaspam norte lawman En-semes llaqtaman muyurqa, chaymantañataqmi Adumín wichaypa chimpan Gelilot lawkama chayaspan Rubenpa churin Bohanpa rumi churasqankama uraykurqa.

¹⁸ Chayman-tam Jordán qechwapa chimpan wichaypa norte lawninta Jordán mayukama uraykurqa.

¹⁹ Hinaspam Bet-hogla llaqtapa norte lawninta rispan Puchqo lamar qochapa norte lawninpi chaynataq Jordán mayupa Puchqo lamar qochapi tukupayninpa sur lawninpi tukurqa. Chaynam sur lawman Benjamín ayllupa allpan karqa.

²⁰ Intipa qespimunan lawmanmi Jordán mayupi tukurqa. Chaykunam Benjamín ayllupa allpankuna karqa, haykam kasqankuman hina.

²¹ Benjamín aylluman tupaq llaqtakunam karqa: Jericó, Bet-hogla, Casis wayqo,

²² Bet-arabá, Zemaraim, Bet-el,

²³ Avim, Pará, Ofra,

²⁴ Quefar-haamoni, Ofni hinaspa Geba. Llapallanmi karqa chunka iskayniyuq llaqtakuna taksa llaqtankunapiwan.

²⁵ Gabaón, Ramá, Beerot,

²⁶ Mizpa, Cafira, Mozah,

²⁷ Requem, Irpeel, Tarala,

²⁸ Zela, Elef, Jebús otaq Jerusalén, Gabaa hinaspa Quiriat. Llapallanmi karqa chunka tawayuq llaqtakuna taksa llaqtankunapiwan. Chaykunam Benjamín ayllupa allpankuna karqa, haykam kasqankuman hina.