Josué 17 - CHUYA QELLQA La Biblia en Quechua de Ayacucho 2012

Manasés ayllupa allpanmanta

¹ Sorteasqankuman hinam Joseypa piwi churin Manasés ayllumanpas allpata qorqaku. Manasespa piwi churinmi karqa Maquir, Maquirñataqmi karqa Galaadpa taytan. Maquirqa karqa guerrapi peleaq runam. Paymanmi Jordán mayupa intipa qespimunan lawninpi Galaad allpawan Basán allpa tuparurqa.

² Manasespa wakin ayllukunamanpas haykam kasqankuman hinam sorteaspa qorqaku. Paykunam karqaku Abiezerpa, Helecpa, Asrielpa, Siquempa, Heferpa hinaspa Semidapa mirayninkuna. Paykunam karqa Joseypa churin Manasespa mirayninkuna.

³ Heferpa churin Zelofehadpam ichaqa mana qari churinkuna karqachu, aswanqa warmikunallam, paykunam karqa: Maala, Noa, Hogla, Milca hinaspa Tirsa. Heferqa karqa Galaadpa churinmi, Galaadñataqmi Maquirpa, Maquirpa taytanmi karqa Manasés.

⁴ Chay warmikunam sacerdote Eleazarman, Nunpa churin Josueyman chaynataq kamachikuqkunaman asuykuspa nirqaku: Tayta Diosmi Moisesta kamachirqa ñoqaykumanpas aylluykuman hina allpata qowanankupaq, nispanku. Chaymi paykunamanpas allpata Josué qorqa, Tayta Diospa nisqanman hina.

⁵ Rubén ayllukunaqa Jordán mayupa waklaw chimpanpi kaq Basán allpatawan Galaad allpata chaskichkaspankupas, Jordán mayupa kaylaw intipa seqaykunan law chimpanpipas chunka hawaqpim chaskirqaku.

⁶ Manasespa warmi churinkunamanpas qari churinkunaman hinam allpata qorqaku. Galaad lawpi kaq allpañataqmi wakin mirayninkunapaq karqa.

⁷ Manasés ayllupa allpanmi karqa, Aser ayllupa allpanmanta qallarispa Siquem llaqtapa chimpan intipa qespimunan lawpi Micmetat llaqtakama, chaymantam sur lawman chutarikurqa Tapúa lawpi yachaqkunapa kasqankama.

⁸ Tapúa law allpaqa Manasés ayllupam karqa; Manasespa linderonpi kaq Tapúa llaqtam ichaqa Efraín ayllupa karqa.

⁹ Chaymantam sur lawman rispa Caná wayqoman uraykurqa, chaynapim Efraín ayllupa llaqtankunaqa Manasés ayllupa llaqtankunapa chawpinpi qeparurqa. Manasés ayllupa allpanmi karqa wayqopa norte lawninmanta Mediterráneo lamar qochakama.

¹⁰ Wayqopa sur lawninmi Efraín ayllupa karqa, norte lawninñataqmi Manasespa, hinaspam Mediterráneo lamar qochakama chayarqa. Norte lawmanmi Aser ayllupa allpanwan tupanakurqa, intipa qespimunan lawmanñataqmi Isacar ayllupa allpanwan.

¹¹ Manasés aylluqa, Isacar ayllupa chaynataq Aser ayllupa allpankuna ukupipas kay llaqtakunatam chaskirqa: Bet-seán, Ibleam, Dor, Endor, Taanac hinaspa Meguidota, sapakamata taksa llaqtankunatawan kuskata, chaskirqataqmi kimsa orqokunatapas.

¹² Manasespa mirayninkunaqa manam chay llaqtakunapi yachaq runakuna qarqoyta atirqakuchu, chayraykum cananeokunaqa mana lloqsiyta munaspa hinapi yachakurqaku.

¹³ Chaymantañam Israelpa mirayninkunaqa kallpata hapiruspanku llapa cananeokunawan mana imallapaq servichikurqaku, ichaqa manam qarqorqakuchu.

Joseypa mirayninkuna allpa rakinakusqankumanta

¹⁴ Joseypa mirayninkunam Josueyta nirqaku: ¿Imanasqataq huk hawaqllapi allpata qoykuwankiku? Ñoqayku aylluqa Tayta Dios bendeciykuwaptinkum achka kaniku, nispa.

¹⁵ Chaymi paykunata Josué nirqa: Achkallaña kasqaykichikrayku Efraín ayllupa montenkuna mana haypasuptikichikqa, ferezeokunapa refaitakunapa allpanpi montekunatayá kichamuychik, nispa.

¹⁶ Chaymi Joseypa mirayninkuna nirqaku: Arí, kay montekunaqa manam haypawankuchu. Pampakunapi yachaq cana-neokunawan Bet-seán llaqtapi hinaspa taksa llaqtankunapi chaynataq Jezreel qechwapi yachaqkunaqa fierromanta carretakunatam hatallinku, nispanku.

¹⁷ Chaymi Joseypa miraynin Efraín ayllutawan Manasés aylluta Josué nirqa: Qamkunaqa achkallaña hinaspa kallpasapam kankichik. Chaynaqa, manam huk hawaqllapiqa yachawaqchikchu.

¹⁸ Aswanqa chay montekunapas qamkunapam kanqa, chaynaqa kichamuspaykichik patankunakama hapikamuychik. Cananeokunataqa fierromanta carretayuqkuna kaptinkupas chaynataq kallpasapa kaptinkupas qarqonkichikmi, nispa.