Josué 16 - CHUYA QELLQA La Biblia en Quechua de Ayacucho 2012

Joseypa mirayninkunapa allpanmanta

¹ Sorteasqankuman hinam, Joseypa mirayninkunapa allpan karqa intipa qespimunan lawman, Jordán mayu-manta qallarispa Jericó llaqtapa pukyunkunakama, chaymantam chunniqninta rispa Bet-elpa orqonkunakama chayarqa.

² Bet-elmanta otaq Luz llaqtamantañataqmi Arqui castakunapa allpanta Atarot llaqtakama chayarqa.

³ Chaymantam intipa seqaykunan lawman rispan Jaflet castakunapa allpanman uraykurqa, chay-mantam uray lawpi kaq Bet-horón llaqtanta rispan Gezer llaqtanta Mediterráneo lamar qochakama chayarqa.

⁴ Kay allpakunatam paykunapaña kananpaq Joseypa mirayninkuna, Manaseswan Efraín chaskirqaku.

Efraín ayllupa allpanmanta

⁵ Efraín ayllupa allpanmi, haykam kasqankuman hina karqa, intipa qespimunan lawman, Atarot-adarmanta qallarispa hanay lawpi kaq Bet-horón llaqtakama.

⁶ Chaymantam Mediterráneo lamar qochanta norte lawninta Micmetat llaqtakama chutarikurqa, hinaspam intipa qespimunan lawman muyumuspa Taanat-silo llaqtakama chayarqa, chaymantam Janoa llaqtanta rispan

⁷ Atarot llaqtaman chaynataq Naarat llaqtaman uraykurqa, hinaspam Jericó llaqtapa patanta Jordán mayuman lloqsirqa.

⁸ Tapúa llaqtamantam intipa seqaykunan lawman Caná wayqoman muyuspan Mediterráneo lamar qochaman lloqsirqa. Chaykunam Efraín ayllupa allpankuna karqa, haykam kasqankuman hina.

⁹ Manasés ayllupa allpan ukupipas Efraín ayllukunaqa llaqtakunatawan taksa llaqtakunatam chaskirqaku.

¹⁰ Ichaqa manam Gezer llaqtapi yachaq cananeokunata qarqorqakuchu, chayraykum cananeokunaqa Efraín ayllukunawan kuska kunankamapas yachachkanku, Efraín ayllukunata mana imallapaq servispanku.