Josué 13 - CHUYA QELLQA La Biblia en Quechua de Ayacucho 2012

Manaraq yaykusqanku allpakunamanta

¹ Josueymi llumpaytaña machuyarurqa, chaymi Tayta Dios nirqa: Qamqa llumpay yuyaqñam kanki, ichaqa kachkanraqmi manaraq chayasqaykichik allpakuna.

² Chay allpakunam kaykuna: Filisteokunapa chaynataq gesuritakunapa allpankuna,

³ Egipto nacionpa inti qespimunan lawninpi Sihor mayumanta qallarispa norte lawpi Ecrón llaqtapa patankama. Chaykunaqa cananeokunapa allpankunam. Chaypim kachkan filisteokunapa pichqa kamachiqninkuna: Gaza llaqtapa, Asdod llaqtapa, Ascalón llaqtapa, Gat llaqtapa hinaspa Ecrón llaqtapa kamachiqninkuna; chaypitaqmi kachkan aveokunapa allpanpas,

⁴ chayqa kachkan sur lawpim. Kachkantaqmi cananeokunapa allpanpas, sidoniokunapa allpanpi Mehara llaqtamanta Afec llaqtakama hinaspa amorreokunapa allpanwan tupanakuqkama.

⁵ Puchuchkanraqmi giblitakunapa allpanpas chaynataq intipa qespimunan lawpi Líbano orqopi allpakunapas, Hermón orqopa patanpi kaq Baal-gadmanta qallarispa Hamatpa hichpankama.

⁶ Israelpa mirayninkunapa qayllanmantam orqokunapi yachaqkunata wischusaq, Libanomanta qallaykuspa Misrefot-maim lawkama. Wischusaqtaqmi Sidón llaqtayuq runakunatapas. Qamñataqmi kamachisqayman hina, Israelpa mirayninkunaman allpata qonki paykunapaña kananpaq.

⁷ Isqonnintin ayllukunamanwan Manasespa wakin ayllumanmi chay allpata qonki, nispa.

Intipa qespimunan lawpi allpakunamanta

⁸ Manasespa wakin aylluqa, Rubén aylluwan chaynataq Gad aylluwan kuskam tupaqninku allpata chaskirunkuña. Paykunamanmi Moisés qorqa Jordán mayupa chimpan intipa qespimunan lawpi.

⁹ Paykunamanmi qorqa Arnón wayqopa patanpi kaq Aroer llaqtamanta qallaykuspa, wayqopa chawpinpi kaq llaqtata hinaspa Medeba pampatapas Dibón llaqtakama.

¹⁰ Qorqataqmi Hesbón llaqtapi munaychakuq amorreokunapa rey Sehonpa llaqtankunatapas, llapa amonitakunapa allpanwan tupanakuqkama.

¹¹ Qorqataqmi Galaad allpatapas, gesuritakunapa hinaspa maacateokunapa allpantapas, Hermón orqomanta qallaykuspa Basán allpatapas Salca llaqtakama,

¹² chaynallataq Basán llaqtapa reynin Ogpa allpankunatapas. Refaimpa miraynin Ogmi munaychakurqa Astarot llaqtapiwan Edrei llaqtapi. Paykunatam Moisés venceruspan allpankumanta qarqorurqa.

¹³ Gesureokunatawan maaca-teokunatam ichaqa mana qarqorqakuchu, chayraykum paykunaqa Israelpa mirayninkunawan kuska kunankama ya-chachkanku.

¹⁴ Leví ayllumanqa manam tupaqninku allpataqa Moisés qorqachu. Paykunapa tupaqninqa karqa Israelpa mirayninkunapa Tayta Diosman ofrenda qosqankum.

¹⁵ Rubén ayllumanmi allpata Moisés qorqa haykam kasqankuman hina.

¹⁶ Paykunapa allpankum karqa Arnón wayqopa patanpi kaq Aroer llaqtamanta qallarispa qechwapi llaqtakama hinaspa Medeba law pampakunakama.

¹⁷ Qorqataqmi Hesbón llaqtatawan pampapi llaqtakunapas. Chay llaqtakunam karqa: Dibón, Bamot-baal, Bet-baal-meón,

¹⁸ Jahaza, Cademot, Mefaat,

¹⁹ Quiriataim, Sibma, qechwa law orqopi kaq Zaret-sahar,

²⁰ Bet-peor, Pisga orqopa waqtankuna hinaspa Bet-jesimot.

²¹ Rubén ayllupa allpankunam karqa pampapi llaqtakuna chaynataq Hesbón llaqtapi munaychakuq Amor castakunapa reynin Sehonpa allpankuna. Rey Sehontaqa madianitakunapa kamachiqninkunatawan kuskatam Moisés wañurachirqa. Chay kamachikuqkunam karqa: Evi, Requem, Zur, Hur hinaspa Reba.

²² Israelpa mirayninkunaqa guerrapi wañuchisqankunatawan kuskatam wañurachirqaku Beorpa churin qatipaq Balaamtapas.

²³ Rubén ayllupa allpankunam chayarqa Jordán mayupa patankama. Tukuy chaykunam llaqtakunawan chaynataq taksa llaqtakunawan kuska herencia allpanku karqa, chay ayllupi haykam kasqankuman hina.

²⁴ Gad ayllumanmi haykam kasqan-kuman hina allpata Moisés qorqa.

²⁵ Paykunapam karqa Jazer llaqtawan Galaad lawpi llapallan llaqtakunapas chaynataq amonitakunapa allpanpa partenpas, Rabá llaqtapa chimpanpi kaq Aroer llaqtakama.

²⁶ Chaynallataq Hesbón llaqtamanta qallarispa Ramat-mizpa llaqtakama hinaspa Betonim llaqtakama, Mahanaim llaqtapa allpantapas Debir llaqtawan tupanakuqkama.

²⁷ Qechwa lawkunapiñataqmi qorqa Bet-aram llaqtata, Bet-nimra llaqtata, Sucot llaqtata hinaspa Zafón llaqtatapas; qorqataqmi Hesbón llaqtapi munaychakuq rey Sehonpa allpankunatapas partenta. Allpankum karqa Jordán mayupa intipa qespimunan lawninmanta qallarispa Cineret qochapa sur law patankama.

²⁸ Tukuy chaykunam llaqtakunawan chaynataq taksa llaqtakunawan kuska Gad ayllupa herencia allpanku karqa, chay ayllupi haykam kasqankuman hina.

²⁹ Manasés ayllupa wakin ayllumanpas haykam kasqankuman hinam allpata Moisés qorqa.

³⁰ Paykunapa allpanmi karqa Mahanaim llaqtamanta qallarispa Basán lawpi munaychakuq rey Ogpa allpankunakama hinaspa Jair castakunapa yachasqan soqta chunka llaqtakunapas.

³¹ Paykunapataqmi karqa Galaad allpapa partenpas, Astarot llaqtapas chaynataq Edrei llaqtapas. Chaykunaqa karqa Basán lawpi rey Ogpa munaychakusqan llaqtakunam. Chay allpakunam karqa Manasespa churin Maquirpa wakin ayllunkunapaq haykam kasqankuman hina.

³² Chay allpakunatam paykunaman Moisés qorqa Moab law pampakunapi Jordán mayupa waklaw chimpanpi, Jericó llaqtapa intipa qespimunan lawninpi.

³³ Leví ayllumanmi ichaqa herencia allpata Moisés mana qorqachu, Israelpa yupaychasqan Tayta Diosmi qamkunapa herenciaykichikqa, nispa imaynam Diospa nisqanman hina.