Josué 11 - CHUYA QELLQA La Biblia en Quechua de Ayacucho 2012

Rey Jabinta vencesqankumanta

¹ Hazor llaqtapa reynin Jabinmi chaykunamanta uyariruspan willa-kuqkunata kacharqa, Madón llaqtapa reynin Jobabman, Simrón llaqtapa chaynataq Acsaf llaqtapa reyninkunaman,

² norte law orqokunapi kaq reykunaman, Cineret qochapa sur lawnin Arabá qechwapi kaqkunaman, intipa seqaykunan Dor llaqta lawpa waqtankunapi, orqonkunapi kaq reykunaman,

³ hinaspa intipa qespimunan hinaspa seqaykunan lawpi kaq cananeokunamanpas. Paykunam karqaku amorreokuna, heteokuna, ferezeokuna, orqokunapi kaq jebuseokuna chaynataq Hermón orqopa waqtan Mizpa lawpi kaq heveokuna.

⁴ Chay reykunam llapa tropankunawan lloqsirqaku. Paykunaqa lamar qochapa patanpi aqo hinañam karqaku. Guerrapaq caballonkupas, carretankupas mana yupay atinam karqa.

⁵ Chay reykunam Israelpa mirayninkunawan peleanankupaq Merom qochapa hichpanpi huñunakuruspanku chaypi campamentonkuta sayachirqaku.

⁶ Ichaqa Josueytam Tayta Dios nirqa: Ama paykunataqa manchakuychu, paqarinmi kay horata llapallankuta wañusqata Israelpa mirayninkunaman qoykusaq. Qamñataqmi caballonkunapa atakankunata kuchuspa carretankunatapas kañanki, nispa.

⁷ Chaymi Josueyqa llapa tropankunawan paykunapa contranpi rispanku Merom qochapa hichpanpi qonqayllamanta atacarurqaku.

⁸ Tayta Diosmi Israelpa mirayninkunaman qoykurqa, chaymi Sidón sutiyuq hatun llaqtakama, Misrefot-maim lawkama chaynataq intipa qespimunan lawpi Mizpa qechwakama wañuchistin qatirqaku. Lliwtam wañurachirqaku manam chullapas puchurqachu.

⁹ Josueymi Tayta Diospa nisqanta hina ruwaspan enemigonkunapa caballonkupa atakanta kuchuspan carretankunatapas kañaykurqa.

¹⁰ Chaymanta kutispanmi Josueyqa, Hazor llaqtaman yaykuruspan reynintapas espadawan wañurachirqa. Hazorqa karqa wakin llaqtakunapa kamachiqninmi.

¹¹ Hazorpi yachaqkunatam espadawan wañurachirqaku. Pasaypaqta purmarachispankum kañaykurqaku.

¹² Josueyqa wakin llaqtakunatapas purmarachispanmi reyninkunatapas espadawan wañurachirqa, Tayta Diospa serviqnin Moisespa kamachisqanman hina.

¹³ Chaywanpas moqokunapi kaq llaqtakunataqa manam kañarqakuchu, aswanqa Hazor llaqtallatam.

¹⁴ Chay llaqtakunapa runankunatam mana chullatapas puchuykuspa espadawan lliwta wañurachispanku tukuy imankutawan llapa animalninkuta apakurqaku.

Moisespa kamachisqanta Josué ruwasqanmanta

¹⁵ Tayta Diospa kamachisqanta hinam Moisespas Josueyman kamachirqa. Josueyñataqmi mana imatapas qonqaykuspa ruwayman churarqa, imaynam Moisesman Tayta Diospa kamachisqanman hina.

¹⁶ Josueymi chay allpata, orqokunata, llapallan Neguev lawta, Gosén law allpakunata, pampakunata, Jordán mayupa qechwankunata, Israelpa orqonkunata hinaspa qechwankunatapas hapikuykurqa.

¹⁷ Seir lawman riq Halac orqomanta Hermón orqopa uraynin Líbano law pampapi Baal-gad llaqtakamam Josué venceruspan reyninkunatapas wañurachirqa.

¹⁸ Josueyqa unay watakunam chay reykunawan guerrapi karqa.

¹⁹ Manam karqachu Israelpa mirayninkunawan hawkalla kanankupaq contrato ruwaq llaqtaqa, aswanqa Gabaón llaqtapi yachaq Hev castakunallam. Llapallan chay llaqtakunatam guerrapi peleaspa vencerurqaku.

²⁰ Kikin Tayta Diosmi chay runakunapa sonqonta rumiyarachirqa Israelpa mirayninkunapa contranpi hatarinankupaq, chaynapi Israelpa mirayninkuna puchukachinankupaq, imaynam Moisesman Tayta Diospa kamachisqanman hina.

²¹ Hina chay tiempopim Josueyqa rispan Hebrón law orqokunapi, Debir law orqokunapi, Anab law orqokunapi, Judá law orqokunapi, Israel law orqokunapi yachaq anaceokunata puchukarachimurqa, llaqtankutapas pasaypaqtam purmarachirqa.

²² Israelpa mirayninkunapa yachanan allpapiqa manam Anac castakunamantaqa chullapas puchurqachu; aswanqa Gaza llaqtapi, Gat llaqtapi chaynataq Asdod llaqtapi kaqkunallañam puchururqaku.

²³ Josueymi llapallan allpata hapikuykurqa, Moisesman Tayta Diospa nisqa-nman hina. Chay allpatam Israelpa mirayninkunaman herencianku kananpaq sapa aylluman tupaqninta qorqa. Chaymantapunim chay allpapiqa manaña guerra karqachu.