Jonás 4 - CHUYA QELLQA La Biblia en Quechua de Ayacucho 2012

Jonaspa piñakurusqanmanta

¹ Jonastam ichaqa Diospa imam ruwasqan mana gustarqachu, chaymi pay anchata piñakururqa.

² Chayraykum Tayta Diosta mañakuspan nirqa: Dios Taytalláy, kayna kanantaqa llaqtaypi kachkaspallayraqmi nirqaniña. Chayraykum manaraq kaykuna pasakuchkaptin Tarsis lawman ayqekuchkarqani. Ñoqaqa yachanim llakipayakuq hinaspa kuyapayakuq Dios kasqaykita. Qamqa mana chaylla piñakuruq kaspaykim hatun kuyapayakuynikipi ima castigo ruwanaykitapas manaña ruwankichu.

³ Chaynaqa, Dios Taytalláy, ama hina kaspa wañurachiwayña, ñoqapaqqa wañukuymi aswan allinqa kanman kawsanaymantaqa, nispa.

⁴ Hinaptinmi Tayta Dios nirqa: ¿Allintachu ruwachkanki chaynata piñakuspayki? nispa.

⁵ Chaymi Nínive llaqtamanta Jonás lloqsiruspan intipa qespimunan lawpi samarurqa. Chaypim huk ramadata ruwakuruspan tiyaykurqa, llaqtata imam pasasqanta qawananpaq.

⁶ Tayta Diosñataqmi higuerilla plantata wiña-rachirqa, chaynapi Jonasta umallantapas llantuykunanpaq hinaspa mana allin kasqanmanta allinyaykachinanpaq. Chaymi Jonasqa chay plantawan llum-payta kusikurqa.

⁷ Ichaqa paqarinnintin punchawpaqmi, Dios chay plantata utuskuruwan kachurachiptin chakirurqa.

⁸ Inti lloqsiramuptinmi, intipa qespimunan lawmanta rupaq wayrata Dios hatarirachimuptin, Jonaspa umanta inti rupaptin wañunayarqa; chaymi wañuyta munaspan nirqa: Kawsanaymantaqa amalaya wañu-ruymanña, nispa.

⁹ Tayta Diosñataqmi nirqa: ¿Higuerilla planta chakirusqanmantachu llumpayta piñakurunki? nispa. Jonasñataqmi nirqa: ¡Arí, razonmantam rabiawanpas wañu-ruyman! nispa.

¹⁰ Hinaptinmi Tayta Dios nirqa: Qamqa mana plantasqayki, mana wiñachisqayki higuerilla plantamantam llakikurunki. Chay plantaqa huk tutallapi wiñaramuspam huk tutallapitaq chinkarunpas.

¹¹ Chaynaqa, ¿manachu Nínive hatu-hatun llaqtamanta, yaqa pachak iskay chunka waranqa masnin runakunamanta, allintapas mana allintapas mana sapaqchay yachaq-kunamanta chaynataq nana-nanaq animalkunamanta ñoqapas llakipayarikuyman? nispa.