Jobwan Sutichasqa Libro 8 - CHUYA QELLQA La Biblia en Quechua de Ayacucho 2012

Diosqa allin ruwaq kasqanmanta Bildadpa rimarisqanmanta

¹ Shua lawmanta kaq Bildadmi Jobta nirqa:

² ¿Haykapikamataq chaykunata rimanki? Sinchillataña pukuchkaq viento hinam qamqa rimachkanki.

³ Tukuy Atiyniyuq Diosqa juzgaspanqa, allin arreglo ruwaytaqa manam qewinchu.

⁴ Diospa contranpi huchallikusqankuraykum churikikunataqa huchankuman hina castigarun.

⁵ Sichum sapa tutapaymanta Diosta maskaptikiqa, sichum Tukuy Atiyniyuq Diosta mañakuptikiqa,

⁶ sichum munasqanman hina kawsaptikiqa, cheqaptapunim Diosqa waqaychasunki, tukuy imaykitam imam kaqta kutichipusunki.

⁷ Ñawpaq kapusuqnikikunaqa imallaraqsi qepa kapusuqnikikunam aswan allinqa kanqa.

⁸ Ñawpaq miraykunatayá tapukuy, ñawpaq runakunapa yachayniymantayá yachayta haypay.

⁹ Ñoqanchikqa qayna punchaw naceqllam kanchik, manam imatapas yachanchikchu, kawsayninchikpas kay pachapiqa llantuy hina pasaruqllam.

¹⁰ Ñawpaq runakunam ichaqa rimapayasuspayki tukuy imata yachachisunki.

¹¹ Totorawan papiroqa yakupananpim wiñan;

¹² ichaqa verdellaraq kachkaspam, manaraq rutuchikuchkaspam, wakin qorakunamantapas puntata chakirun.

¹³ Chaynam Diosta qonqaruq runapa kawsayninqa, chaynam tukunqa Diosta qonqaruq millay runaqa.

¹⁴ Paypa suyakuyninqa qaytu hina tipiruqllam, paypa hapipakuyninqa arañapa llikan hinallam.

¹⁵ Chay qaytuman hapipakuptinqa tipirunqam, chay llikaman hapipakuptinpas manam takyachinqachu.

¹⁶ Mana allin runakunaqa intipa chayananpi verde qorakuna hinam, paykunapaqa kallmankunapas huerta huntatam mastarikun,

¹⁷ sapinkunapas tukuy qaqa ukunkunakamam chinkaykun, rumikunamanraqmi wankukurun.

¹⁸ Chaymanta chutaruptinkuqa manam pipas yachanqachu maypim kasqantapas.

¹⁹ Chaynam paykunapa kusikuyninqa tukunqa, paykunapa rantinpim huk qorakunaña wiñamunqa.

²⁰ Diosqa manam saqenchu allin kawsakuq runataqa, mana allin runatam ichaqa mana yanapanchu.

²¹ Tayta Diosqa huktawanmi asichisunki, paywanqa kusikuymantam qaparinki.

²² Cheqnisuqnikikunam penqaypa intusqan kanqaku, huchasapa runakunapa wasinqa tuñichisqam kanqa, nispa.