Jobwan Sutichasqa Libro 6 - CHUYA QELLQA La Biblia en Quechua de Ayacucho 2012

Elifazpa nisqankunata Job kutipasqanmanta

¹ Hinaptinmi Elifazta Job nirqa:

² ¡Ima allinraq kanman llakiytapas ñakariyniytapas balanzaman churaspa pesaykuptinkuqa!

³ Hinaptinqa lamar qochapi aqomantapas mastaraqchá llasanman. Chayraykum hapisqaytaña rimachkanipas.

⁴ Tukuy Atiyniyuq Diospa flechankunam hayparuwan, chay flechakunapa venenonmi cuerpoyta tukuykuchkan, Diosmi hatun manchakuyta kachaykamuwan.

⁵ Purun asnoqa manam hawchityanchu sumaqllaña pastokunata mikuchkaspaqa, toropas manataqmi waqanmanchu panqata mikuchkaspaqa.

⁶ Manam pipas mikunchu mana kachiyuq qamya mikuytaqa, manataqmi runtupa yuraqninqa gustoyuqchu.

⁷ Mana mikuyta munasqay kaqraqmi kunanqa mikunay rikurirun.

⁸ ¡Ima allinraq kanman imam mañakusqayta Tayta Dios qoykuwaptinqa!

⁹ ¡Ima allinraq kanman saruparuwaspan Dios wañurachiwaptinqa!

¹⁰ Chayna kaptinqa maynaña nanayllay kaptinpas kusikuymantachá pawaykachayman. Chuya Diospa kamachikuynintaqa chayllam kasukurqani.

¹¹ Kallpallaypas tukurunñam, manañam alliniñachu, ¿imaraykutaq kawsaymanraq?

¹² ¿Ñoqaqa rumi hinachu karqani? ¿Aychaypas bronce hinachu karqa?

¹³ Kikiymantaqa manam ima ruwaytapas atinichu, manam yanapaykuqniytapas tarinichu.

¹⁴ Llakipi tarikuq runataqa, Tukuy Atiyniyuq Diosta manaña kasuchkaptinpas amistadninkunaqa yanapaykunmi.

¹⁵ Qamkunam ichaqa qepancharuwankichik, qonqaymanta chakiruq mayu hinaraqmi saqeruwankichik;

¹⁶ mayuqa riti chulluptinmi rankachu qepirisqa putkallaña uraykamun.

¹⁷ Ichaqa rupay chayaramuptinmi chakirun, sinchi rupaywanmi chinkarun.

¹⁸ Puriqkunapas ñanninkumanta karunchakuruspam chunniqpi chinkarunku.

¹⁹ Temanmanta Sabamanta illaqkunam chay yakuta tomaq-tomaqllaña maskanku,

²⁰ ichaqa mana tarispankum hukmanyaspa llakipi tarikunku.

²¹ Chaynam qamkunapas ñoqapaq kankichik, manchakuypaq kasqayta qawaykuwaspaykichikmi mancharikunkichik.

²² Qamkunamantaqa manam imatapas mañakurqaykichikchu, nitaqmi qollqetapas mañakurqaykichikchu.

²³ Manam ñakarichikuqmanta librawanaykichiktachu, otaq millay runakunamanta salvawanaykichiktachu mañakurqaykichik.

²⁴ Imapim pantasqayta qawaykachiwaychik, hinaptinqa upallallam uyarisqaykichik.

²⁵ Cheqap rimaytaqa manam pipas wischupakunmanchu, qamkunam ichaqa yanqamanta tumpawankichik.

²⁶ Qamkunaqa nisqaykunamantam rimakuwankichik, muspaypi hina rimasqaykunamantam rimakuwankichik.

²⁷ Qamkunaqa mana tayta-mamayuqtapas qarqoruwaqchikmi, qamkunaqa amigoykichiktapas rantikuruwaqchikmi.

²⁸ Chaynaqa, kunanyá uyapurawaychik, kunanyá llullakusqayta niykuwaychik.

²⁹ Rimasqaykichikta asuchiychik, ama yanqamanta juzgawaychikchu, ñoqaqa mana huchayuqmi kani.

³⁰ Rimasqaywanqa manam huchallikunichu, ñoqaqa musyakustinmi imatapas rimani.