Jobwan Sutichasqa Libro 41 - CHUYA QELLQA La Biblia en Quechua de Ayacucho 2012

¹ ¿Yaqachu Leviatán sutiyuq animalta anzuelowan hapiruwaq? ¿Yaqachu qallunta lazowan wataruwaq?

² ¿Yaqachu waskawan senqanmanta watucharuwaq? ¿Yaqachu kakichunta ganchowan usturachiwaq?

³ ¿Yaqachu llakipayanaykipaq ruegakusunkiman? ¿Yaqachu sumaq siminwan ruegakusunkiman?

⁴ ¿Yaqachu qanwan contratota ruwanman wiñay esclavoyki kananpaq?

⁵ ¿Yaqachu urpituchawan hina paywan pukllakuwaq? ¿Yaqachu warmi churikikuna pukllananpaq wataruwaq?

⁶ ¿Yaqachu kuchuparuspa plazapi rantikurunmanku? ¿Yaqachu taksa-taksata kuchuparuspa rantikuqkunaman aypurunmanku?

⁷ ¿Yaqachu qaranta cuchillowan tuksiparuwaq? ¿Yaqachu challwaqkunapa lanzanwan umanman usturachiwaq?

⁸ Makikita hawanman churaykuy, paywan peleasqaykitaqa manam qonqankichu, manañam huktawanqa haykapipas makikitaqa churankiñachu.

⁹ Leviatanta hapiruytaqa pipas yanqapaqmi piensan, rikuykuspallaraqmi desmayarunku.

¹⁰ Pipas payta mana hapiyta atichkaspaqa, ¿pitaq ñoqapa qayllaypi sayayta atinman?

¹¹ ¿Pitaq imatapas qowarqa chaynapi kutichipunaypaq? Kay pachapi tukuy ima kaqkunaqa ñoqapam.

¹² Leviatanpa chakinkunamantawan, kallpanmanta hinaspa kuyayllapaq kayninmantaqa mana upallaykuspam rimasaq.

¹³ ¿Pitaq paypa qaranta chusturunman? ¿Pitaq rakta-rakta qaranta tuksirunman?

¹⁴ ¿Pitaq hociconta kakllarunman? Hociconpa muyuriqninpi kirunkunapas manchakuypaqmi.

¹⁵ Wasanpas seqesninpi churasqa escudokuna hinam kachkan, chaykunaqa qaqa hina rumiy-rumiymi kachkan.

¹⁶ Sapakamam allin hapinasqa kachkan, chaynapim wayrapas mana yaykunchu.

¹⁷ Hukninmanta hukninkamam suma-sumaq hapinasqa kachkan, chaynapim rakinaytaqa mana pipas atinmanchu.

¹⁸ Chay animal hachiwyaptinqa llipyakunaraqmi lloqsin; ñawinkunapas tutapaypi inti hinaraqmi kancharin.

¹⁹ Hociconmantapas ninam lloqsin, nina chispakunaraqmi pawarin.

²⁰ Senqanmantapas qosnikunaraqmi lloqsin, timpuq manka hinaraqmi waspirin.

²¹ Samaynillanwanmi sansakunatapas mismirichin, siminmantapas lenwachkaq ninam lloqsimun.

²² Kallpanpas kunkanpim tarikun, paypa qayllanpiqa manchakuymantam katkatatanku.

²³ Aychankunapas mana imapa yaykuy atinan ankuy-ankuymi, chulluchisqa fierro hina mana kuyuqmi.

²⁴ Qasqonpas rumi hina qaqay-qaqaymi, mana pakiq tunaw rumi hinam.

²⁵ Chay animal hatariptinqa kallpasapa qarikunapas katkatatankum, manchakuymantam lluptikunku.

²⁶ Espadawanña tuksiptinkupas manam yaykunchu, lanzawan flechakunapas manam ustunchu.

²⁷ Chay animalpaqqa fierropas paja hinallam, broncepas pumpusqa kaspi hinallam.

²⁸ Payqa flechakunatapas manam manchakunchu, rumikunawan warakasqankupas paja hinallam.

²⁹ Ima armapas paypaqa paja hinallam, lanza chamqasqankupa silbayninwanpas asikunmi.

³⁰ Qasqonpas rastrillo hinaraqmi, mitupi purispanpas yarqata hinaraqmi kicharun.

³¹ Lamar qochaman pawaykuspanpas timpuchkaq mankata hinaraqmi ruwarun, api mankata hinaraqmi timpurichin.

³² Yakunta rispanpas posoqo ñantam ruwarun, soqo chukchata hinaraqmi ruwarun.

³³ Kay pachapiqa manam imapas paymanqa rikchakunchu, payqa mana imatapas manchakunanpaq unanchasqam karqa.

³⁴ Hatun tukuqkunatapas despreciowanmi qawan, payqa llapallan manchakuypaq animalkunapa reyninmi, nispa.