Jobwan Sutichasqa Libro 40 - CHUYA QELLQA La Biblia en Quechua de Ayacucho 2012

¹ Jobtaqa Tayta Diosqa nirqataqmi:

² ¿Yachayniyuq kaychu kanman ñoqa Tukuy Atiyniyuq Dioswan atipanakuy? ¿Hinallaraqchu kutipakunki? nispa.

³ Hinaptinmi Tayta Diosta Job nirqa:

⁴ Ñoqallayqa manam imachu kani, ¿Imataraqtaq nillaykiman? Upallakusaqñam ñoqaqa.

⁵ Achka kutikamañam rimaruni, kunanqa manañam imatapas rimariymanñachu, nispa.

Atiyninta Tayta Dios qawachikusqanmanta

⁶ Sinchi wayra ukumanta Jobta contestaspanmi Tayta Dios nirqa:

⁷ Allin qari hinayá weqawnikita allinta watakuy, ñoqa tapuptiymi qamñataq allinta contestawanki.

⁸ ¿Juzgasqaytachu yanqapaq hapinki? ¿Inocente tukuspachu mana allin ruwaqpaq hapiwanki?

⁹ ¿Ñoqa hina atiyniyuqchu kanki? ¿Rayopa qaparisqanta hinachu qampas qaparinki?

¹⁰ Chaynaqa, atiyniyuq hinayá hatunchakuy, hatunchakuywan kanchariywanyá pachakuy.

¹¹ Piñakuynikitayá cheqerichiy, hatun tukuqkunatayá qawarispa uchuychay.

¹² Mana kasukuqkunatayá qawarispa uchuychay, mana allin runakunatayá maypi kaptinkupas chinkachiy.

¹³ Paykunataqa llapallankutayá allpapi pamparuy, wañuqkunapa kasqanpiyá wichqaruy.

¹⁴ Hinaptinqa yachasaqmi atiynikiwan salvakuy atisqaykita.

¹⁵ Qawariyá behemot sutiyuq animalta, payqa torokuna hinam pastota mikuchkan. Paytapas chaynataq qamtapas ñoqam unancharqaykichik.

¹⁶ Kallpankunapas wasankunapim kachkan, kallpanpas wiksa qarankunapim kachkan.

¹⁷ Chupantapas cedro sachata hinam kuyuchin, piernankunapi ankunkunapas simpay-simpaymi kachkan.

¹⁸ Tullunkunapas bronce hina mana pakiqmi, chakinkunapas fierro hina mana pakiy atinam.

¹⁹ Paytaqa llapallanmanta puntatam unancharqani, ñoqa unanchaqllanmi wañuchiyta atiyman.

²⁰ Orqokunapi pastokunapas paypaqmi wiñachkan, purun animalkunapas chaypim kallpakachanku.

²¹ Payqa soqoskunapa llantuyninpim waqtapan, totorakunapa chawpinpim pakakun.

²² Yakupi qorakunapas llantuyninwanmi pampaykun, mayupa patanpi saucekunam muyuykun.

²³ Jordán mayu llumpayta huntaptinpas payqa manam manchakunchu, hociconmanña yaku haypaptinpas manam manchakunchu.

²⁴ ¿Yaqachum qawakuchkaptin pipas hapirunman? ¿Yaqachum hapiruspan pipas senqanta uchkurunman?