Jobwan Sutichasqa Libro 4 - CHUYA QELLQA La Biblia en Quechua de Ayacucho 2012

Jobta Elifaz qaqchasqanmanta

¹ Temán llaqtayuq Elifazmi rimarispan Jobta nirqa:

² Job, ¿imatapas rimapayaykuptiyku piñakuruwaqchu? Ichaqa manam atiymankuchu upallalla kaytaqa

³ Qamqa achkaqtam yachachirqanki, mana kallpayuqtam kallpancharqanki;

⁴ Rimapayaspam urmaruq runata hatarichiq kanki, wichiykuchkaqña runatam kallpanchaykuq kanki.

⁵ ¿Kunanñataqchu mana allin qanman chayaramusuptiki mana kallpayuq rikurirunki? ¿Ñakariy chayaramusuptikichu hukmanyarunki?

⁶ Diosta kasukuq kachkaspaykiqa ¿imanasqataq mana paypichu hapipakunki? Mana huchayuq kawsachkaspaykiqa ¿imanasqataq mana Diosmanchu hapipakunki?

⁷ Kunanyá yuyaymanariy, ¿yaqachu mana huchayuq runa chinkarunman? ¿Maypitaq allin kawsakuq runa tuñichisqa kanman?

⁸ Rikusqayman hinaqa, cheqnikuytawan mana allinllata tarpuqqa chaynallatam cosechan.

⁹ Diospa pukuriyninwanmi paykunaqa chinkarunku, piñakuyninpa pukuriyninwanmi puchukarunku.

¹⁰ León hinaña ñawrawyaptinkupas, uña leonkuna hinaña qaparkachaptinkupas kirunkunata pakiparuspam Tayta Dios upallarachinqa.

¹¹ Mikunanpaq mana tariq leonkuna hinam wañurunqaku, china leonpa wawankuna hinam churinkupas cheqerunqaku.

¹² Huk willakuymi chayaramuwarqa, chaytaqa rinrillaypim uyarirqani.

¹³ Lliw runa miskillataña puñuchkaptinkum manchakuypaqta mosqokuruspay musparqani.

¹⁴ Manchakuymi ñoqamanta munaychakururqa, tullullaykunam katkatatarqa.

¹⁵ Uyaytam huk chiri wayra pukuykuwarqa, chukchaykunapas lliwmi sayarirurqa.

¹⁶ Ñawpaqniypim anima hina rikurirurqa, uyantam ichaqa mana rikurqanichu. Paytam upallallamanta kayna nisqanta uyarirqani:

¹⁷ ¿Yaqachu runa Diosmanta aswan allin ruwaq kanman? ¿Yaqachu runa unanchaqninmanta aswan chuya kanman?

¹⁸ Diosqa serviqninkunapipas manam confiakunchu, Diosqa angelninkunapipas pantaytam tarin.

¹⁹ Chaynaqa, ¿imaynataq mana kallpayuq runapi confiakunman? Runaqa allpapa hawanpi mitumanta ruwasqa wasi hinallam, polilla hina sarusqa kanqa.

²⁰ Achikyaqmanta tutaykuqkamallam tuñichisqa rikurirunku, wañuruptinkupas manam pipas yuyarinkuchu.

²¹ Kuyayllapaq kayninkupas paykunawan kuskam chinkarun, manaraq yachayta haypachkaspam wañurunku.