Jobwan Sutichasqa Libro 38 - CHUYA QELLQA La Biblia en Quechua de Ayacucho 2012

Jobta Tayta Dios contestasqanmanta

¹ Sinchi wayrapa ukunmanta rima-payaspanmi Jobta Tayta Dios nirqa:

² ¿Pitaq qamqa karqanki yanqakunata rimaspa yachayniymanta iskayrayanaykipaqqa?

³ Qari hina weqawnikita watakuy, tapuptiymi qamñataq contestawanki:

⁴ ¿Maypitaq karqanki kay pachata unanchaptiyqa? Cheqapta yachaspaykiqa kunan niykuway.

⁵ Sichum yachaptikiqa, ¿pitaq sayayninta tupurqa? ¿Pitaq tupunanpaq cordelta chutarqa?

⁶ ¿Imapa hawanpitaq cimientonkuna churasqa kachkan? ¿Pitaq esquinanpi hapiq rumita churarqa?

⁷ ¿Maypitaq karqanki achikyaq chaskakuna takiptinkuqa? ¿Maypitaq karqanki angelkuna kusikuyllawanña danzaptinkuqa?

⁸ Maymi kasqanmanta lamar qocha toqyamuptin ¿pitaq punkukunawan wichqarurqa?

⁹ Puyukunatam qorqani chaywan pachakunanpaq, yanay-yanay tutayaytam qorqani wankukunanpaq.

¹⁰ Lamar qochapa maykamam chayanantapas ñoqam churarqani, punkunkunatapas cerrojowanmi wichqarqani.

¹¹ Lamar qochatam kaynata nirqani: “Kaykamallam chayamunki, amapunim kaymantaqa pasankichu, hatun tukuq olaykikunapas kayllapim tukunqa”, nispay.

¹² ¿Yaqachum haykapipas achikyamunanpaq kamachirqanki? ¿Yaqachum haykapipas achikyayman maypim kananta qawachirqanki,

¹³ chaynapi kay allpa pachata huntaykuptin mana allin ruwaqkuna qarqosqa kanankupaq?

¹⁴ Achikyayqa kay pachatam imam kaqta rikuriykachin, sumaq pachasqata hinam rikuriykachin.

¹⁵ Mana allin ruwaqkunamantaqa achkiyqa qechusqam, hatun tukuq makinkupas pakisqam.

¹⁶ ¿Yaqachum lamar qochapa ukunman yaykurqanki? ¿Yaqachum lamar qochapa ukunpi kayman wakman purirqanki?

¹⁷ ¿Yaqachum wañuypa munaychakunanman uraykurqanki? ¿Yaqachum wañuqkunapa kasqanman chayarqanki?

¹⁸ ¿Yaqachu entiendenki mayna hatunmi kay pacha kasqanta? Sichum yachaspaykiqa kunanyá lliwta niykuway.

¹⁹ ¿Maynintataq achkiypa kasqanmanqa rina? ¿Maypitaq tutayaypa kasqanqa tarikun?

²⁰ ¿Yaqachu maypim tukunankama pusaruspa wasinman kutirachimuwaq?

²¹ Tukuy chaykunataqa ñachiki yachankiña, unay watayuqñam kankipas, chaypaqqa ñachá nacerqankiña.

²² ¿Yaqachu ritikunapa kasqanman yaykurqanki? ¿Yaqachu runtu parapa taqerayasqanta rikurqanki?

²³ Chaykunataqa ñakariy tiempokunapaqmi waqaychachkani, guerra tiempokunapaqmi waqaychachkani.

²⁴ Yachaptikiqa ¿maylaw ñannintataq achkiy cheqerin? ¿Maylawnintataq intipa qespimunan lawmanta pukumuq wayra cheqerin?

²⁵ ¿Pitaq llipyapa rayopa ñanninta kicharqa? ¿Pitaq loco parapa ñanninkunata kicharirqa,

²⁶ mana pipa yachananman parananpaq, mana runapa kanan chunniqman chayananpaq,

²⁷ chaynapi chaki allpata saksanankama nuyunanpaq, chay allpamanta llullu pastokuna wiñananpaq?

²⁸ Yachaptikiqa, ¿pitaq parapa taytan? ¿Pitaq sullata churyarqa?

²⁹ ¿Pitaq ritipa maman? ¿Pitaq qasata wachakurqa?

³⁰ ¿Pitaq yakukunata rumiyachispa lamar qochapa hawanta rankachuchin?

³¹ ¿Yaqachum qamqa Suchu sutiyuq chaskakunapa watunkunata churaykuwaq? ¿Yaqachum qamqa Qalalu sutiyuq chaskakunapa watunkunata paskaruwaq?

³² ¿Qamchum huñunasqa chaskakunata sapa tuta lloqsichimunki? ¿Qamchum Suwapa Corralnin sutiyuq chaskakunata pusanki? ¿Qamchum chaypa qatiqnin chaskakunatapas michinki?

³³ Qamqa ¿reqsinkichum cielokuna kamachiq leykunata? ¿Qamchu kay pachapi chay kamachikuykunata churarqanki?

³⁴ ¿Yaqachu puyukunata kamachiwaq sinchi parawan tuyturusunaykipaq?

³⁵ ¿Yaqachum llipyaykunata maylawmanpas rinankupaq kamachiwaq? ¿Yaqachu chay llipyakuna nisunkiman “kamachiwaykuyá kaypim kachkaniku” nispanku?

³⁶ Yachaptikiqa, ¿pitaq alton pawaq animalkunaman yachayta qorqa? ¿Pitaq utuluman yachayta qorqa?

³⁷ ¿Pitaq ancha yachayniyuq kanman puyukunata yupananpaq? ¿Pitaq puyñumanta tallichkaq hina cielokunamanta parachimun,

³⁸ chaynapi allpapas mituyarunanpaq, kurpakunapas laqanakurunanpaq?

³⁹ ¿Qamchum china leonpa mikunantapas hapipunki? ¿Qamchum uña leonkunamanpas saksachinki?

⁴⁰ ¿Uchkunkupi puñuchkaptinkuchu qoykunki? ¿Qorakunapa chawpinpi laqakuykuspa wateqaptinkuchu qoykunki?

⁴¹ ¿Pitaq ullachkupaq mikunanta churapun? Mallqonkunapas qayakuwaptinqa, yarqaymanta pawaykachaptinkuqa, ¿pitaq mikunanta churapun?