Jobwan Sutichasqa Libro 37 - CHUYA QELLQA La Biblia en Quechua de Ayacucho 2012

¹ Parawan wayra qaparimusqanta uyariptiymi sonqollaypas tukukuchkanña, rayokunata uyariptiymi sonqollaypas qasqoymanta pawaruchkanña.

² Diospa manchakuypaq qapariyninta uyariychik, siminmanta rayo lloqsimusqanta uyariychik.

³ Llipyankunatam cielokunapi kacharin, kanchariyninpas kay pachamanmi kuchun-kuchun chayan.

⁴ Chay llipyakunapa qepantañataqmi Diospa admirakuypaq qapariynin uyarikun; pay qapariptinqa rayokunapas mana tukuytam uyarikun.

⁵ Diospa qapariyninqa llumpay admirakuypaqmi, hatu-hatun kaqkunatam payqa ruwan, mana entiendey atinanchikkunatam payqa ruwan.

⁶ Lastatapas kamachiptinmi kay pachaman wichimun, paratapas kallpawanmi chayachimun.

⁷ Dios chaynata ruwaptinmi runakunapas wasillankupi qeparunku, chaynapi tukuy chaykunataqa Diospuni ruwasqanta reqsinankupaq.

⁸ Purun animalkunapas machayninmanmi yaykunku, machayninkupim pakarayanku.

⁹ Sur lawmantam sinchi wayra hamun, norte lawmantañataqmi chiri hamun.

¹⁰ Dios pukuykuptinmi yakukunapas rankachurun, Dios pukuykuptinmi hatun qochakunapas rankachurun.

¹¹ Payqa puyukunatapas yakuwanmi huntachin, ukunkunamantam llipyakunata lloqsirichin.

¹² Llapa llipyakunam qewi-qewita cielokunapi churakamun, chaynatam Diospa kamachisqanta tukuy kay pachapi ruwachkanku.

¹³ Diosmi parata chayachimun: Wakin kutipi llaqtakunata castigananpaq, wakin kutipi allpata parqonanpaq, wakin kutipiñataq kuyakuyninta qawachikunanpaq.

¹⁴ Chaynaqa, Job, hawkalla uyariykuway, Diospa admirakuypaq ruwasqankunapi yuyaymanariy.

¹⁵ ¿Yachankichum kaykunata imaynatam Dios kamachisqanta? ¿Yachankichum puyu ukupi imaynatam llipyachisqanta?

¹⁶ ¿Yachankichum imaynatam puyukuna altokunapi takyasqanta? Chaykunam qawachiwanchik Diosqa admirakuypaq hatu-hatun yachayniyuq kasqanta.

¹⁷ Qamqa pachaykipa ukunpim rupapakurunki, sur lawmanta wayramuspa allpata susunkarachiptinmi qamqa rupapakurunki.

¹⁸ ¿Yaqachu cielota mastariptin Diosta yanapaspayki metalta fundispa espejota ruwaq hina ruwaysirqanki?

¹⁹ Diosta imaynam ninaykutayá yachachiwayku, ñoqaykuqa tutayaypi hinam mana yachayniyuq kachkaniku.

²⁰ ¿Diosqa ñoqapa rimasqayta willanankutaraqchu suyachkan? ¿Runakunapa imam nisqayta willanankutaraqchu suyachkan?

²¹ Intita puyu taparuptinqa achkiyninpas manam rikukunchu, sinchi wayra pukuruptinmi ichaqa cielopas kichakuykun.

²² Norte lawmantam qori hina llipipipichkaq kanchay chayaykamun, Diosmi admirakuypaq kanchariywan muyuriykachikun.

²³ Tukuy Atiyniyuq Diostaqa manam haypayta atichwanchu, payqa ancha atiyniyuqmi, juzgaspaqa manam pitapas ñakarichinchu, allin arreglo ruwaqmi.

²⁴ Chayraykum Diostaqa runakunapas respetanku, yachaysapa tukuq runakunataqa Diosqa manam kaqpaqpas hapinchu, nispa.