Jobwan Sutichasqa Libro 34 - CHUYA QELLQA La Biblia en Quechua de Ayacucho 2012

Eliupa iskay kaq kutipi rimarisqanmanta

¹ Huktawan rimarispanmi Eliú kaynata nirqa:

² Yachayniyuqkuna rimarisqayta uyariychik, yachaypa huntasqan runakuna sumaqta uyariwaychik.

³ Mikuypa gustontaqa malliykuspam yachanchik, rimaykunapa allin otaq mana allin kasqantapas uyariykuspam yachanchik.

⁴ Chaynatayá ñoqanchikpas allinta qawaykuspa allinnin kaqta akllakusunchik.

⁵ Jobqa kaynatam nirqa: Mana huchayuq kachkaptiypas Diosqa allin arreglotaqa manam ruwaykapuwanchu.

⁶ Llullach kanman “huchayuqmi kani” niptiyqa, mana pantaruq kachkaptiypas nanayniymi manaña alliyarinchu, nispa.

⁷ Manam pipas Job hinaqa kanchu, payqa yakuta tomachkaq hinam Diosmanta burlakun.

⁸ Payqa mana allin ruwaqkunawanmi hukllawakurun, mana allin runakunawanmi purikun.

⁹ Payqa nintaqmi: Diosta agradayta munaspanpas runaqa manas imatapas hurqokunmanchu, nispan.

¹⁰ Chaynaqa, yachayniyuq runakuna uyariwaychik. Mana allin ruwayqa Diosmanta karunchasqayá kachun, mana allin arreglo ruwayqa Tukuy Atiyniyuq Diosmanta karunchasqayá kachun.

¹¹ Diosqa runamanqa pagapun imam ruwasqanman hinam, runamanqa qopun imaynam kawsasqanman hinam.

¹² Cheqaptapunipas mana allintaqa Diosqa manam ruwanmanchu, Tukuy Atiyniyuq Diosqa allin arreglo ruwaytaqa manam qewinmanchu.

¹³ Diosqa kay pachapi munaychakunanpaqqa manam runamantachu atiytaqa chaskirqa.

¹⁴ Sichum runamanta Dios qechurunman vidantawan samayninta, hinaptinqa

¹⁵ llapallan runakunach tukurunman, allpamancha kutiykunmanku.

¹⁶ Job, sichum yachayniyuq kaspaqa uyariykuway, imam rimasqaytayá sumaqta uyariykuway.

¹⁷ Allin arreglo ruwayta cheqnispanqa, ¿imaynatataq Dios kamachikunman? Chaynaqa, ¿imaynataq Tukuy Atiyniyuq Diosta cargochawaq?

¹⁸ Reykunatapas kamachikuqkunatapas mana allin ruwaqkuna kaptinkuqa, Diosqa mana iskayrayaspam uyankupipuni niykun.

¹⁹ Payqa kamachikuqkunamanpas manam sayapakunchu, wakchatapas manam desprecianchu, apumanpas manam sayapakunchu; lliw runakunaqa paypa unanchasqallanmi kanku.

²⁰ Runakunaqa tutam qonqayllamanta wañurunku, paykunaqa chaqwakuruspankum chinkarunku; munaychakuqkunapas runakunapa mana imanasqallanmi chinkarunku.

²¹ Diosqa runakunapa imaynam kawsasqantapas qawachkanmi, imapim purisqantapas rikuchkanmi.

²² Mana allin ruwaq runataqa maynaña tutayaypas manam pakanmanchu.

²³ Diosqa manam punchawtaqa churanchu qayllanman rispa runa juzgasqa kananpaqqa.

²⁴ Diosqa manam tapukachakunchu atiyniyuqkunata urmachinanpaqqa, manataqmi tapukachakunchu paykunapa rantinpi hukta churananpaqqa.

²⁵ Diosqa yachanmi imam ruwasqankutapas, tutaykaramuptinmi lliwta ñutuparun.

²⁶ Mana allin ruwaqkunata hinam payqa castigan lliwpa qawasqantam castigan.

²⁷ Chaytaqa ruwan paymanta rakikurusqankuraykum, kamachikuyninkunata mana kasukusqankuraykum.

²⁸ Paykunam wakchakunata ñakarichirqaku, chay wakchakunapa qayakuyninmi Diospa qayllanman chayarqa.

²⁹ Sichum Dios upallaruptin ¿pitaq payta acusanman? Sichum Dios uyanta pakaykuptin ¿pitaq qawayta atinman? Diosqa llaqtakunatapas runakunatapas qawachkanmi,

³⁰ chaynapi mana allin runa munaychakuspa llaqtata mana engañananpaq.

³¹ ¿Yaqachu Diosta nirqanki: “Huchallikurunim, manañam yapatawanqa huchallikusaqñachu.

³² Mana rikusqay huchaykunata qawaykachiway, sichum huchallikuruspayqa manañam huktawanqa ruwasaqñachu”, nispayki?

³³ Qepancharuchkaspaykipas ¿munasqaykiman hina Dios pagasunaykitaraqchu munachkanki? Chaytaqa qanmi akllakunayki, manam ñoqachu; chayna kaptinqa imam yachasqaykita niwayku.

³⁴ Yachayniyuq runakunawan allin yuyayniyuq runakunam niwanqaku:

³⁵ “Jobqa manam yachaywanchu rimachkan, mana terminonpim yanqakunata rimachkan.

³⁶ Jobtaqa allinta qatipaykuychik, payqa mana allin runa hinam mana pasaqkunatam rimarun.

³⁷ Payqa huchallikuchkaspanpas mana kasukuqraqmi rikurirun, qayllanchikpipunim Diostapas kutipakun, hinaspam mana allinkunallata paymanta riman”, nispanku.