Jobwan Sutichasqa Libro 33 - CHUYA QELLQA La Biblia en Quechua de Ayacucho 2012

Jobta Eliú qaqchasqanmanta

¹ Chaynaqa, Job, palabraykunata kunan uyariy, rimasqaykunata kunan sumaqta uyariy.

² Kunanqa ñam simiyta kichaykuniña, kunanqa ñam rimayta qallaykuniña.

³ Ñoqaqa cheqap kaqtam rimarisaq, yachasqaytaqa mana llullakuspam rimarisaq.

⁴ Diospa espiritunmi ñoqataqa unanchawarqa, Tukuy Atiyniyuq Diosmi kawsayta qowarqa.

⁵ Atispaykiqa contestaway, kutipawanaykipaqyá alistakuy.

⁶ Qampas chaynataq ñoqapas Diospa qayllanpiqa hina chaynallam kanchik, ñoqapas mitumanta ruwasqallam kani.

⁷ Chaynaqa, amayá manchakuwaychu, ñoqaqa manam imanasqaykichu.

⁸ Uyarisqayman hinaqa kaynatachusmi nirqanki:

⁹ “Ñoqaqa chuyam kani, manam imapipas pantarqanichu, mana huchayuqmi kani, manam ima mana allintapas ruwarqanichu.

¹⁰ Ichaqa Diosmi yanqamanta cargochawan, yanqamantam enemigonpaqña hapiwan.

¹¹ Chakiykunatam cadenawan chaqnaruwan, maynin purisqaytapas wateqawanmi”, nispayki.

¹² Manam allinpunichu chay rimasqaykiqa, Diosqa runamantaqa aswan hatunmi.

¹³ ¿Imanasqataq Dioswan atipanakunki? Payqa imapas tanteasqanmantaqa manam pimanpas cuentata qonmanchu.

¹⁴ Diosqa rikchaqmanapim rimapayawanchik, runam ichaqa mana kaqpaqpas hapinchu.

¹⁵ Mosqoypipas, visionpipas, runakuna puñuchkaptinpas, miski puñuypi kachkaptinkupas.

¹⁶ Diosqa rinrillankupim runakunata rimapayan, qaqchaspanmi mancharichin,

¹⁷ chaynataqa rimapayan runata mana allin ruwayninmanta rakinanpaqmi, hatun tukuq kayninmanta sapaqchananpaqmi.

¹⁸ Chaynatam sepulturamanta runakunata libran, chaynatam wañuymanta salvan.

¹⁹ Diosqa runataqa corregintaqmi onqoykunawanpas, cuerponpi nanaykunata qospanpas.

²⁰ Chaynapim runaqa mikuytapas millakun, maynaña miski mikuytapas manam munanchu.

²¹ Aychanpas chakipakunankamam laqsayarun, tullunkunapas rikukunankamam laqsayarun.

²² Kawsayninpas sepulturamanñam hichpaykuchkan, kawsayninpas wañuypa patanpiñam kachkan.

²³ Sichum paypa ladonpi huk ángel kaspaqa, waranqa angelkunamanta hukllapas allinninpaq rimaspaqa, allin kawsakuq kasqanmanta rimaspaqa,

²⁴ chay runamanta llakipayarikuspanyá Diosta kaynata nichun: “Wañuymanta libraykuy, payqa tarirunñam salvaqninta”, nispa.

²⁵ Hinaptinqa aychallanpas kallpanpi hinaraqcha kanqa, joven kasqanpi hinaraqcha kanqa.

²⁶ Diosta mañakuptincha chaskiykunqa, kusikuywan qaparispancha Diospa uyanta rikuykunqa, Diospas mana huchayuqpaqñam hapiykunqa.

²⁷ Diosqa lliw runatam qawachkan, sichum pipas ninqa: “Huchallikurunim, allin arreglotam qewiruni, Diosmi ichaqa mana imanawanchu,

²⁸ aswanraqmi wañuymantapas hurqoykuwan, achkiq mundotapas rikuchkaniraqmi”, nispa.

²⁹ Tukuy chaykunatam Diosqa runawan ruwan, iskay-kimsa kutikamam chaynata ruwan.

³⁰ Wañuymanta hurqoykuspam achkiq mundotaraq rikuchin.

³¹ Chaynaqa, Job, nisqaytayá allinta uyariy; upallallayá uyariykuway, ñoqam rimarisaq.

³² Imapas niwanayki kaptinqa kunanyá niykuway, rimariptikiqa “allinmi” nisaqmi.

³³ Mana chayna kaptinqa upallallayá uyariway, yachayniyuq kaytam yachachisqayki, nispa.