Jobwan Sutichasqa Libro 32 - CHUYA QELLQA La Biblia en Quechua de Ayacucho 2012

Eliupa punta kaq rimarisqanmanta

¹ Allin ruwaqpaq Job hapikus-qanraykum kimsan rimapayaqninkunaqa manaña imatapas nirqakuchu.

² Hinaptinmi Jobpa contranpi Eliú llumpayta piñakururqa, mana huchayuqpaq hapikuspan Diosta cargochasqanrayku. Eliuqa karqa Baraquelpa churinmi hinaspa Ram ayllumanta kaq Buzipa mirayninmi.

³ Eliuqa piñakururqataqmi Jobpa kimsan amigonkunapaqpas, Job defendekuptin mana imayna kutichikuyta atispanku, huchayuqpaqña hapispa condenasqankumanta.

⁴ Eliuqa sullka kasqanraykum mayor kaqkuna Jobwan rimayta tukunankukama suyarqa.

⁵ Chay kimsa runa-kuna manaña Jobta imatapas niyta atiptinkum paykunapaq Eliú piñakururqa.

⁶ Chaynapim Buzipa mirayninmanta kaq Baraquelpa churin Eliú kaynata rimarirqa: Qamkunamanta sullkaraq kasqayraykum, tanteasqaykuna rimariyta munaspaypas manchakurqani.

⁷ Ñoqam piensarqani: “Mayor runakunayá puntataqa rimachunku, unay wata kawsaqkunayá puntataqa yachachichunku”, nispay.

⁸ Cheqaptapunipas runapiqa espiritum kachkan, Tukuy Atiyniyuq Diospa Espiritunmi runataqa entiendechin.

⁹ Manam unay watata kawsaqkunallachu yachayniyuqqa kanku, manam yuyaqkunallachu allintaqa entiendenku.

¹⁰ Chaymi nirqani: Uyariwaychik, imam tanteasqaytayá ñoqapas rimarisaq.

¹¹ Ñoqaqa upallallam yuyaymanaspa rimasqaykichikta uyarirqani, chaynataqmi allinnin palabrakuna maskasqaykichiktapas uyarirqani.

¹² Sumaqtam uyarirqaykichik, ichaqa manam mayqenllaykichikpas Jobtaqa atirqankichikchu rimasqankunaman hina imayna kutipakuytapas.

¹³ Yachaysapapaq mana hapikunaykichikpaqmi Dios contestasunkichik manam runachu.

¹⁴ Jobqa manam imatapas niwarqachu, nitaqmi imatapas rimasaqchu qamkunapa rimasqaykichikman hinaqa.

¹⁵ Tayta Job, paykunaqa mancharisqallañam kachkanku, paykunaqa manañam qanman ima rimariytapas atinkuñachu.

¹⁶ Ñoqaqa suyarqanim paykunam ichaqa manaña rimarirqakuchu, aswanpas upallakururqakum, manam ima rimayta atirqakuchu.

¹⁷ Chayraykum ñoqapas imam ninayta nisqaykichik imam yachayniyta qawachisqaykichik.

¹⁸ Rimaykuq-rimaykuqllañam kachkani, chaynaqa manam upallakuruymanchu.

¹⁹ Ñoqapa sonqoyqa musoq odrepi poqochkaq vino hinam llikiruchkanña.

²⁰ Chaynaqa, sonqoy tiyananpaqmi rimarisaq, qamta contestanaypaqmi simiyta kicharisaq.

²¹ Pimanpas manam sayapakusaqchu nitaqmi pitapas alabasaqchu.

²² Ñoqaqa manam yachanichu runa alabaytaqa, chaynata ruwaruptiyqa unanchawaqniychá castigaruwanman.