Jobwan Sutichasqa Libro 30 - CHUYA QELLQA La Biblia en Quechua de Ayacucho 2012

Jobmi llakikun ñakariypi kasqanmanta

¹ Kunanqa qepa wiñay kaqkunaraqmi asipayawachkanku, paykunapa taytankutaqa manam munaymanchu karqa uywaykuna michiq allqollaypaqpas.

² Makinkupas ¿imapaqtaq serviwanman karqa manaña kallpankupas kachkaptinqa?

³ Wakchayasqa, yarqaymanta kaspankum tutankunapas chunniq allpapi puriqku, imapas tarisqankutañam kachuqku.

⁴ Sachakunapa ukunpim mikunankupaq qatqe qorakunatañam rachuqku, retamapa sapinkunatañam paykunaqa mikuqku.

⁵ Paykunaqa karqaku runakunapa qayllanmanta qarqosqam, paykunaqa karqaku suwakuna hina qaparillawanña qatikachasqam.

⁶ Paykunaqa wayqokunapa kikllunkunapim yachaqku, paykunaqa machaykunapim qaqakunapim yachaqku.

⁷ Monte ukukunapim qaparkachaspa puriqku, paykunaqa kichka ukukunapim huñunakuqku.

⁸ Paykunaqa millay runakunapa churinkunam, mana reqsisqa runakunapa mirayninkunam, llaqtankumantapas qarqosqa runakunam.

⁹ Kunanqa chayna runakunapa burlakunanñam rikuriruni, asikuwananku runañam rikuriruni.

¹⁰ Paykunaqa millakuwaspankum ñoqamanta anchurikunku, kunanqa uyaypim toqawanku.

¹¹ Kunanqa kikin Dios uchuycharuwaptinmi, manaña penqarikuspa burlakuwanku.

¹² Alleq lawniymantam llaqta runakuna hatarinku, wichichiwaspankum wañuchiwanankupaq atacawanku.

¹³ Wichichiwanankupaqmi ñanniytapas wichqarunku, paykunamanta libraykuqniyqa manam pipas kanchu.

¹⁴ Perqapa uchkunta hina usturamuspam qaparillawanña ñoqapa hawayman pawaykamunku.

¹⁵ Manchakuymi qonqaymanta hayparamuwan, honorniymi wayrapa apasqanña rikurirun, allinpaq qapikuyniymi puyu hina chinkarun.

¹⁶ Kawsaytapas manañam munaniñachu, ñakariymi ñoqamanta munaychakurun.

¹⁷ Nanaymi tulluykama yaykurun, tukuy tutam mana samaykuspan ñakarichiwan.

¹⁸ Diosmi kunkaymanta llapiruwan, kallpawanmi pachaymanta taspiparuwan.

¹⁹ Diosmi mituman wischuykuwan, kunanqa allpa otaq uchpa hinañam rikuriruni.

²⁰ Diosnilláy, yanapaykuwanaykipaqmi qayakamullayki ichaqa manam uyariykuwankichu; qanman asuykamullaptiypas manam yanapaykullawankichu.

²¹ Mana llakipayakuqñam ñoqawanqa rikurirunki, piñakuywanmi qamqa ñakarichiwanki.

²² Wayrawan hoqarirachiwaspaykim aparachiwanki, wayra-parawanmi katkatatarachiwanki.

²³ Yachakunim wañuymanña apawasqaykita, yachakunim wañuqkunapa kasqanmanña apawasqaykita.

²⁴ ¿Manachu wakchakunata yanapaykurqani? ¿Manachu sasachakuyninpi qayakuqta salvaykurqani?

²⁵ ¿Manachu sasachakuypi kaqkunawan kuska waqarqani? ¿Manachum wakchakunamanta llakikurqani?

²⁶ Allin kaqkunata suyachkaptiypas mana allin kaqkunam chayaramuwan; achkiyta suyachkaptiypas tutayaymi chayaramuwan.

²⁷ Sonqollaypas mana samaykuspam tukukuchkan, ñoqallaytaqa llakikuy punchawllañam suyallawachkan.

²⁸ Llakipa pampasqanmi kawsallani, intipapas manaña kanchaykusqanmi purillani, huñunakuypipas yanapakuytam mañakullani.

²⁹ Atoqkunapa wawqenñam rikuriruni, avestruzkunapa amigonñam rikuriruni.

³⁰ Aychaypas yanayarunñam, tulluykunapas calenturawanmi llumpayta ruparichkan.

³¹ Arpallaypas llakillatañam waqachkan, qenallaypas llakillatañam waqachkan.