Jobwan Sutichasqa Libro 27 - CHUYA QELLQA La Biblia en Quechua de Ayacucho 2012

Mana allin runakuna castigasqa kananmanta

¹ Jobmi huktawan nirqa:

² Derechoyta qechuruwaptinpas kawsaq Diosraykum jurani, llakichiwaptinpas Tukuy Atiyniyuq Diosraykum jurani,

³ maykamapas kawsanaykamaqa, Diospa samayniy ñoqapi kanankamaqa,

⁴ simiypas manam ima huchatapas rimanqachu, qalluypas manataqmi ima llullatapas rimanqachu.

⁵ Kawsanaykamaqa mana huchayuq kasqaymantam rimarikusaq, ima niwasqaykichiktapas manataqmi allinmi nisqaykichikchu.

⁶ Allin ruwaq kasqaymantaqa mana hukmanyaspam rimarikusaq, kawsanaykamaqa sonqoypipas manam ñakakusaqchu.

⁷ Enemigoykunaqa millakuypaq ruwaqkuna hinayá kachunku, contraypi sayariqkunaqa millay runakuna hinayá kachunku.

⁸ ¿Imapitaq millay runa hapipakunqa Diospuni kawsayninta qechuruptin?

⁹ ¿Sasachakuykuna payman hamuptinpas yaqachum Dios payta uyarinman?

¹⁰ Payqa manam Tukuy Atiyniyuq Diospipas kusikuyta tarinchu, Diostapas payqa manam sapa punchawchu qayakun.

¹¹ Diospa atiyninmantam yachachisqaykichik, Tukuy Atiyniyuq Diospa ruway munasqantam reqsichisqaykichik.

¹² Llapallaykichik tukuy kaykunata rikuchkaspaqa, ¿imanasqataq yanqakunataqa rimankichik?

¹³ Mana allin runakunapaq Diospa waqaychasqan castigoqa kaymi, daño ruwaqpaq Diosmanta hamuq castigoqa kaymi:

¹⁴ Achkallaña churinkunapas guerrapi wañuchisqam kanqaku, wakinñataqmi yarqaymanta puchukanqaku.

¹⁵ Paykunamanta puchuqkunañataqmi peste onqoywan wañunqaku, viudankupas paykunamantaqa manam waqanqakuchu.

¹⁶ Mana allin runa, allpata hinaña qollqeta montoruptikipas, mituta hinaña pachata huñuruptikipas,

¹⁷ chaywanqa allin ruwaq runakunam pachakunqaku, chay qollqetaqa mana huchayuqkunam rakinakunqaku.

¹⁸ Mana allin runapa wasinqa puyupa wasin hinallam, chakra cuidaqpa chukllan hinallam.

¹⁹ Chayna runaqa tukuy imayuqmi puñuykun, rikchariruspanmi ichaqa mana imayuqña tarikurun.

²⁰ Paytaqa punchawmi manchakuypaq lloqlla aparunqa, tutañataqmi wayra-para aparunqa.

²¹ Intipa qespimunan lawmanta pukumuq wayram aparunqa, manchakuypaq wayram wasinmanta hoqariruspan seqaykachinqa.

²² Mana llakipayarispam paypa contranpi pukunqa, atiyninmanta ayqeyta munaptinpas paypa contranpim pukunqa.

²³ Taqllakuspa asipayachkaq hinam manchakuypaq wayra qatikachanqa, silbakuspa burlakuchkaq hinam maymi kasqanmanta aparunqa.