Jobwan Sutichasqa Libro 26 - CHUYA QELLQA La Biblia en Quechua de Ayacucho 2012

Diosqa tukuy imapa hawanpi munaychakuq kasqanmanta

¹ Jobñataqmi nirqa:

² ¿Imapitaq mana kallpayuqta yanaparqanki? ¿Imaynatataq eqoyasqa runata librarqanki?

³ ¿Imatataq consejarqanki mana yuyayniyuq runaman? ¿Ima allin yachaytataq chayna runaman reqsichirqanki?

⁴ ¿Pipa yanapakuyninwantaq chaykunata rimarirqanki? ¿Pi rimachisuptikitaq chaynata rimarqanki?

⁵ Wañusqakunapas allpa ukupim manchakuymanta katkatatanku.

⁶ Diospa qayllanpiqa wañuqkunapa kasqanpas sutillam kachkan, paypa qayllanpiqa uku pachapas manam pakasqachu kachkan.

⁷ Diosmi cielokunata mana imapa kasqanpi mastarirqa, kay pachatapas mana imapa hapisqantam warkuykurqa.

⁸ Yakutapas puyukunapim wichqarurqa, yakupa llasayninwanqa puyukunapas manam llikikurunchu.

⁹ Killapa uyantapas puyuwan tapaykuspanmi tutayaykachin.

¹⁰ Diosqa lamar qochapa muyuriqninta linderopaq churaykuspanmi tutayaymanta achkiyta rakinarqa.

¹¹ Dios qaqchaykuptinqa cielopa pilarninkunapas manchakuymantam katkatatan.

¹² Diosqa atiyninwanmi lamar qochata hawkayachin, yachayninwanmi Rahab animaltapas wañurachin.

¹³ Pukuyninwanmi cielokunata puyumanta limpiarun, makinwanmi millqoykachaq maqta uruta wañurachin.

¹⁴ Kaykunaqa ruwasqankunapa wakillanmi, kay uyarisqanchikqa upallalla rimarisqapa aschallanmi, hinaptinqa, ¿atiyninpa qapariynintaqa pitaq entiendenman? nispa.