Jobwan Sutichasqa Libro 23 - CHUYA QELLQA La Biblia en Quechua de Ayacucho 2012

Job Diospa qayllanpi rimarikusqanmanta

¹ Jobñataqmi nirqa:

² Huktawanmi nanay sonqoywan quejakunata rimarisaq, Diosqa hinallaraqmi ñakarichiwachkan.

³ ¡Piraq willaykuwanman Diosta maypim tarirunayta! ¡Hinaptinqa paypa kasqanmanchá chayaruyman!

⁴ Paymanchá sasachakuyniyta niykuyman, imam kaqtachá sasachakuyniyta willaykuyman.

⁵ Chaynapiqa ima niykuwanantapas yachaymanchá Diospa ima niwasqantapas entiendeymanchá.

⁶ ¿Payqa tukuy kallpanwanchu ñoqapa contraypi sayarinman? Manam, payqa aswanraqmi uyariykuwanman.

⁷ Chaypim allin kawsakuq runaqa paywan rimanakunman, ñoqañataqcha juzgawaqniymanta wiñaypaq ayqekuyman.

⁸ Intipa qespimunan lawmanña rispaypas Diostaqa manam tarinichu, intipa seqaykunan lawmanña rispaypas manataqmi tarinichu.

⁹ Norte lawman rispaypas manam tarinichu, sur lawmanña rispaypas manam tarinichu.

¹⁰ Payqa imayna kawsasqaytapas yachanmi, pruebaykuwaptinqa chuyay-chuyay qori hinam lloqsisaq.

¹¹ Paypa risqantam qatirqani, ñanninpi takyaspaymi paymanta mana sapaqchakurqanichu.

¹² Kamachisqantaqa mana qepanchaspam kasukurqani, rimarisqankunataqa mikunaymantapas aswanraqmi waqaycharqani.

¹³ Sichum ima ruwaytapas Dios tantearuptin ¿pitaq yanqacharunman? Payqa ima munasqantam ruwan.

¹⁴ Ñoqawan imam ruway munasqantaqa ruwanqapunim, chayna ruway munasqankunatawan kuskata.

¹⁵ Chayraykum paytaqa manchakuni, paymanta piensarispallayraqmi katkatatani.

¹⁶ Diosmi sonqollayta hukmanyarachin, Tukuy Atiyniyuqmi llumpa-llumpayta mancharichiwan.

¹⁷ ¿Imanasqataq tutayay mana chinkarachiwarqachu? ¿Imanasqataq uyayta tutayay mana pamparuwarqachu?