Jobwan Sutichasqa Libro 21 - CHUYA QELLQA La Biblia en Quechua de Ayacucho 2012

Mana allin runapa allinllaña kawsasqanmanta

¹ Jobñataqmi nirqa:

² Kay rimasqaykunatayá uyariykuwaychik, chaywanyá consuelaykuwaychik.

³ Rimarinaykamayá pacienciaykuwaychik, chaymantañayá munaspaqa asikuwaychikpas.

⁴ Manam runawanchu quejayqa, chayraykum mana hawkachu kani.

⁵ Qawariwaspayá mancharikuychik, makikichikwanyá simikichiktapas tapakuychik.

⁶ Yuyarispayqa ñoqapunim llumpayta mancharikuni, manchakuymantam cuerpoypas llumpayta katkatatan.

⁷ ¿Imanasqataq mana allin ruwaq runakuna yuyaqyanankukama kawsanku? Paykunapaqa llapa imankupas miranraqmi.

⁸ Paykunaqa churinkutawan willkankutapas rikunkuraqmi, paypa ladonpi kusikuqtam rikunku.

⁹ Wasinkupiqa manam manchakuypas kanchu, Diospa piñakuyninpas paykunamanqa manam chayanchu.

¹⁰ Paykunapaqqa toronkupas vacankupas miranmi, vacankunapas manam sullunchu.

¹¹ Churinkunapas tropantin chitachakuna hinam pukllaspa kallpakachanku.

¹² Tinyawan, arpawan qenawanmi kusikuyllawanña takispa pawaykachanku.

¹³ Paykunaqa hawkam kawsakunkupas, hawkallam wañukunkupas.

¹⁴ Paykunaqa Diostapas kaynataraqmi ninku: “Ñoqaykumantaqa anchuy, munasqaykiman hina kawsaytaqa manam munanikuchu.

¹⁵ ¿Pitaq karqa Tukuy Atiyniyuq Diosqa payta servinanchikpaqqa? ¿Imatataq hurqokunchik payta mañakuspanchikqa?” nispanku.

¹⁶ Ichaqa mana allin runapa allin kayninqa manam makillanpichu kachkan, chayraykum paypa tanteasqankunatapas mana qatipakusaqchu.

¹⁷ ¿Haykapitaq mana allin runakunapa mecheron wañururqa? ¿Haykapitaq paykunaqa sasachakuyman wichirqaku? ¿Haykapitaq Diospas paykunata piñakuyninwan ñakarichirqa?

¹⁸ ¿Haykapitaq wayrapa apasqan paja hina karqaku? ¿Haykapitaq vientopa apasqan qopa hina karqaku?

¹⁹ Ninkum, Diosqa taytanpa huchanmantam churinta castiganqa nispanku. Ichaqa kikin huchallikuqmi huchanmantaqa paganqa.

²⁰ Kikin huchallikuqmi Tukuy Atiyniyuqpa makinmanta castigontaqa chaskinqa.

²¹ Wañusqan hawaqa ¿imataq qokunqa ayllunkunata imaña pasaptinpas?

²² Ichaqa ¿yaqachu pipas Diosta imallatapas yachachinman? Diosqa hanaq pachapi kaqkunatapas juzgaqmi.

²³ Kanmi kallpallanpiraq kachkaspa, kusisqa chaynataq hawkalla kachkaspa wañukuq runakuna,

²⁴ kantaqmi allin poqosqa kachkaspa, sanoy-sanoy kachkaspa wañukuq runakunapas.

²⁵ Wakinñataqmi ñakariypa huntasqan kawsaspa mana haykapipas kusikuyta reqsichkaspa wañukunku.

²⁶ Allpa ukupiqa iskayninkum igualla kanqaku, iskayninkum urupa mikusqan kanqaku.

²⁷ Ñoqaqa yachakunim imam ruway munawasqaykichiktapas, yachakunitaqmi ima mana allinkuna piesasqaykichiktapas.

²⁸ Qamkunam tapukunkichik: “¿Maypitaq chay hatun tukuqpa wasin kachkan? ¿Maypitaq chay millay runapa yachanan kachkan?” nispaykichik.

²⁹ ¿Manachum ñannin pasaqkunata tapuyllapas-tapukurqankichik? ¿Manachum paykunapa imam nisusqaykichikta uyarirqankichik?

³⁰ Mana allin runataqa manam imapas pasanchu, paykunamanqa Diospa piñakuyninpas manam chayanchu.

³¹ ¿Pitaq mana allin ruwasqanta uyanpi niykunman? ¿Pitaq imam ruwasqanman hina imatapas ruwarunman?

³² Wañukuptinpas pampaspankum sepulturanpa hawanpiraq velanqaku.

³³ Pampanankupaq apaptinkupas achkallaña runakunam hombronku, ñawpaqninta qepantam achkallaña runakuna qatinku, paypaqa pampakusqan allpapas usyallañam.

³⁴ Chaynaqa, yanqallam qamkunaqa consuelaq tukuwankichik, ima niwasqaykichikpas yanqallam, nispa.