Jobwan Sutichasqa Libro 20 - CHUYA QELLQA La Biblia en Quechua de Ayacucho 2012

Zofarpa rimarikusqanmanta

¹ Naamat lawmanta kaq Zofarmi nirqa:

² Qanmi qasillalla kanayta mana saqewankichu, manam hawkaqa kaymanchu, chayraykum kutipakuyki.

³ Hatun simikiwanmi trataparuwanki, ichaqa yachayniyman hinam kutipasqayki.

⁴ Qamqa yachankim ñawpaq tiempomantaraq kayna kasqanta, kay pachapi runa rikurisqanmantaraq kayna kasqanta:

⁵ Mana allin runapa asikuyninqa tukuruqllam, Diosta mana kasukuq runapa kusikuyninqa chinkaruqllam.

⁶ Cielokamaña hatunchakuynin chayaptinpas, puyukunakamaña uman haypaptinpas,

⁷ payqa hatun ispay hinam paqwayta chinkarunqa, reqsiqninkunapas “¿maypitaq kachkan payqa?” nispam tapukunqaku.

⁸ Payqa mosqoy hinallam chinkarunqa, mosqoypi qawasqa hinallam chinkarunqa, manañam pipas tarinqachu.

⁹ Rikuqninkunapas manañam rikunqakuñachu, maypi kasqanpas manam yachakunqañachu.

¹⁰ Churinkunapas paypa suwakusqantam wakchakunaman kutichipunqa.

¹¹ Kallpallanpiraqmi paypaqa tullunkunapas tukurunqa, joven kayllanpiraqmi allpa ukupi pampasqa kanqa.

¹² Mana allin rimaykuna miski hinaña siminpi kaptinpas, chayta qallunpa ukunpiña pakaptinpas,

¹³ allinpaq hapispan manaña millakuptinpas simin ukupiña waqaychaptinpas,

¹⁴ wiksanpim puchuchurunqa, maqta urupa venenon hinam ukunpi rikurirunqa.

¹⁵ Payqa qori-qollqe rakrasqantam atqorunqa, Diospunim wiksanmanta atqochinqa.

¹⁶ Maqta urupa venenontam soqonqa, chay venenom wañurachinqa.

¹⁷ Mayu hinaña kallpaq mieltapas manañam mikunqachu, yaku hinaña kallpaq lechetapas manañam mallinqachu.

¹⁸ Lliw ganakusqantapas kutichipunqam, qori-qollqe huñusqantapas manam provechanqachu.

¹⁹ Payqa wakchakunata ñakarichispam saqerurqa, hukpa wasinkunatam hapikuykurqa.

²⁰ Payqa imawanpas manam saksaqchu, imataña munapayaspapas tariqmi.

²¹ Pay rakraptinqa manam imapas puchuqchu, chayraykum kusikuyninpas mana takyanqachu.

²² Tukuy imayuqña kachkaspapas mana kusikuyniyuqmi kanqa, mana allin runakunapa makinmanmi wichiykunqa.

²³ Wiksanta huntachichkaptinmi piñakuyninta Dios kachaykunqa, parata hinam piñakuyninta kachaykunqa.

²⁴ Fierro armakunamanta lluptiptinpas broncemanta flecham tuksirunqa.

²⁵ Chay flechaqa cuerponman yaykuruspanmi kichpanninta pasarunqa. Paytaqa manchakuymi intuykunqa.

²⁶ Yanay-yanay tutayaymi pampaykunqa; kikintapas tukuy imankunatapas manaña wañuchiy atina ninam ruparunqa.

²⁷ Cielokunam paypa huchanta qawachinqa, allpapas paypa contranpim hatarinqa.

²⁸ Diospa piñakuynin paypa hawanman chayamuptinmi tukuy ima kapuqninkunapas chinkanqa.

²⁹ Diosmi tukuy chaykunata mana allin runapaq alistarqa, tukuy chaykunam chayna runapa pagon kanqa, nispa.