Jobwan Sutichasqa Libro 18 - CHUYA QELLQA La Biblia en Quechua de Ayacucho 2012

Bildadmi rimarin mana allin runakunamanta

¹ Shua lawmanta kaq Bildadmi nirqa:

² ¿Haykapitaq rimasqaykichikmanta upallankichik? Allintaraq tanteakuychik, chaymantaña rimarisunchik.

³ ¿Imanasqataq animalkunapaq hina hapiwankiku? ¿Imanasqataq mana yachayniyuqpaq hapiwankiku?

⁴ ¿Qam piñapakuspa llikipakuptikichu kay pacha chunnirunqa, otaq qaqakunapas maymi kasqanmanta suchurunqa?

⁵ Mana allin runapaqqa achkiyninpas wañurunqam, ninanpas manam rupanqañachu.

⁶ Mecheronpas wañurunqam, achkipas wasinpiqa manañam achkinqachu.

⁷ Qarillaña purichkaspanmi hukmanyarunqa, kikinpa tanteasqankunallam wichiykachinqa.

⁸ Maymi rinanmanmi trampata churarunqa, hina chay trampallamanmi wichiykunqa.

⁹ Chakinmanpas toqllatam churakurunqa, chay toqllam chakinmanta hapirunqa.

¹⁰ Ñanpipas waskam pakasqa kachkan, pasachkaptin hapirunanpaq.

¹¹ Maypiña kaptinpas manchakuymi muyuriykun, maymanña riptinpas manchakuymi qatikachan.

¹² Yarqaymi kallpanta aparun, sasachakuypas hawanpiñam kachkan.

¹³ Aycha qarantapas onqoymi tukuykuchkan, aychantapas wañuymi allimanta tukuykuchkan.

¹⁴ Wasinpi hawka kawsakusqanmantapas wikutisqam kanqa, manchakuypa reyninmanmi aysasqa kanqa.

¹⁵ Wasinpipas manam kikinpapi hinachu payqa kawsan, yachananpipas azufrem chaqchusqa kanqa.

¹⁶ Payqa sapinmanta chakiruq sacha hinam kanqa, kallmankuna kuchusqa sacha hinam kanqa.

¹⁷ Kay pachapipas manañam yuyarisqañachu kanqa, sutinpas manañam rimarisqañachu kanqa.

¹⁸ Achkiymantam tutayayman wischusqa kanqa, kay pachamantapas qarqosqam kanqa.

¹⁹ Llaqtanpipas mana mirayniyuqmi kanqa, wasinpi kaqkunapas lliwmi wañurunqaku.

²⁰ Chay runata chaykuna pasarusqanta yacharuspankum, intipa qespimunan lawpi yachaqkuna, intipa seqaykunan lawpi yachaqkuna, llumpayta mancharikunqaku.

²¹ Mana allin runakunaqa chaynatam tukunqaku, Diosta mana reqsiq runakunaqa chaynam tukunqaku, nispa.