Jobwan Sutichasqa Libro 17 - CHUYA QELLQA La Biblia en Quechua de Ayacucho 2012

¹ Kallpallaymi tukuruchkanña, vidallaypa puchukayninmi chayamuchkanña, pampakunay uchkum suyawachkanña.

² Asikuwaqniy runakunallam muyuriruwan, burlakuyninkutam tuta punchaw qawallani.

³ Diosnilláy, qamñayá ñoqapa rantiypi rimariy, mana chayqa ¿pitaq ñoqapa rantiypi rimarinman?

⁴ Mana entiendenankupaqmi yuyaymanayninkuta tutayarachinki, chaynapim mana saqenkichu atipawanankuta.

⁵ Imatapas chaskikunanrayku amigonta traicionaq runapa churinkunaqa yarqaymantam ñakarinqaku.

⁶ Qampunim llapallan runakunapa asipayananta ruwaruwanki, runakunapa toqaykunantam ruwaruwanki.

⁷ Nanaywanmi ñawillaykunapas tutayarunña, cuerpollaypas llantuy hinallañam kachkan.

⁸ Chayta qawaspankum allin ruwaq runakuna admirakunku, mana huchayuqkunam huchasapapa contranpi hatarinku.

⁹ Allin ruwaq runakunaqa kawsasqanpim kallpanchakunku, mana huchayuqkunaqa kallpankutam mirachinku.

¹⁰ Llapallaykichik kayman hamuychik, yaqachus qamkuna ukupi allin yachayniyuqta hukllatapas tarirusaq.

¹¹ Punchawniykunam pasachkan, imam ruway munasqaykunam yanqachakuchkan, sonqoypa munasqankunam chinkachkan.

¹² Qamkunam ichaqa tutatapas punchawmanña tikrarunkichik, tutayaypi kachkaspaykichikpas “achkim hichpamuchkanña” ninkichikraqmi.

¹³ Ñoqaqa wañuyllatañam suyachkani, tutayaypi siriykuspam puñuykusaq.

¹⁴ Ñoqapaqqa taytaypas, mamaypas, wawqeykunapas; urukunawan pampakusqay uchkullañam.

¹⁵ Chaynaqa, ¿imapitaq hapipakusaq? ¿Maypitaq hawkayayta tarisaq?

¹⁶ Imapiña hapipakusqaypas wañuqkunapa kasqanmanmi uraykunqa, kuskaykum ñutu allpapi samaykusaqku, nispa.