Jobwan Sutichasqa Libro 15 - CHUYA QELLQA La Biblia en Quechua de Ayacucho 2012

Jobta Elifaz qaqchasqanmanta

¹ Temán lawmanta kaq Elifaz-ñataqmi Jobta nirqa:

² ¿Yaqachu yachayniyuq runa yanqakunata rimanman? ¿Yaqachu yachayniyuq runa wayrallawan wiksanta huntachinman?

³ Yachayniyuq runaqa manam yanqakunatachu riman, chayna runaqa manam siminpa atipasqankunatachu riman.

⁴ Qanmi ichaqa Diostapas mana manchakunkichu, Diostapas yanqallapaqmi hapinki.

⁵ Mana allin sonqoykim chaykunata rimachisunki, sakri runakuna hinam rimarunki.

⁶ Simillaykim huchayuq kasqaykitaqa reqsirachisunki, manam ñoqachu; simillaykim contraykipi rimarinqa.

⁷ ¿Adanmanta puntatachu nacerqanki? ¿Orqokunamanta puntatachu ruwasqa karqanki?

⁸ ¿Diospa consejaqninpaqchu hapikunki? ¿Sapallayki yachayniyuq kasqaykipaqchu hapikunki?

⁹ ¿Imatataq qam yachanki ñoqaykupa mana yachasqaykuta? ¿Imatataq qam entiendenki ñoqaykupa mana entiendesqaykuta?

¹⁰ Ñoqayku ukupiqa kachkan soqo chukchayuq runakunam, taytaykimantapas aswan yuyaqkunañam.

¹¹ ¿Yanqallapaqchu Diospa consuelasusqaykita hapinki? ¿Yanqallapaqchu kuyakuywan rimapayasqaykutapas hapinki?

¹² ¿Imanasqataq sonqoykipa munasqanwan apachikunki? ¿Imanasqataq nanay ñawikiwan qawakunki?

¹³ ¿Imanasqataq Diospaq piñakurunki? ¿Imanasqataq simikitapas llutanpi kacharinki?

¹⁴ ¿Pitaq runaqa chuyapaq hapikunanpaqqa? ¿Pitaq warmimanta naceqqa chuyapaq hapisqa kananpaqqa?

¹⁵ Diosqa manam angelninkunapipas confiakunchu, paypa qayllanpiqa cielokunapas manam chuyachu;

¹⁶ aswanraqchiki millakuypaq huchasapa runaqa, mana allin ruwayta yakuta hinaraq upyaq runaqa.

¹⁷ Uyariway, ñoqam qawachisqayki, ñoqaqa rikusqaykunatam willasqayki,

¹⁸ yachayniyuqkunapa willawasqankuta. Paykunaqa taytankumantam chay yachachikuykunataqa chaskirqaku.

¹⁹ Paykunallamanmi allpapas qosqa karqa, paykuna ukupiqa sapaq runaqa manam karqachu.

²⁰ Mana allin runapa kawsayninqa sapa punchawmi ñakariylla, chayna runapaqqa kawsanan watankunapas yupasqallam kachkan.

²¹ Chayna runaqa manchakuypaq qapariykunallatam uyarin, hawkalla kachkaptinpas suwakunam imantapas apakunku.

²² Paykunaqa tutayaymantapas manam lloqsiyta atinqakuchu, espadapi wañunankupaq citasqam kachkanku.

²³ Aychankupas ullachkukunapa mikunanmi kanqa, paykunaqa yachakunkum mana pipa harkakusqan tuñirunankuta.

²⁴ Sasachakuywan llakikuymi paytaqa mancharichin, paymanqa chaykunam guerraman lloqsiq rey hinaraq pawaykunku.

²⁵ Chaykunam pasan Diospa contranpi makinta hoqariq runataqa, Tukuy Atiyniyuqpa contranpi hatunchakuq runataqa.

²⁶ Chayna runaqa pawaykuq-pawaykuqllañam Diospa contranpi kallpan, rakta escudowan harkaykachikuspanmi kallpan.

²⁷ Uyanwan wiksankunapas poqoy-poqoymi kachkan.

²⁸ Ichaqa yachanan llaqtakunapas purmanqam, wasinkunapas chunninqam, pasaypaq tuñichisqam kanqa.

²⁹ Apu kayninpas manam unaypaqchu kanqa, qori-qollqenpas tukurunqam, kapuqninkunapas manañam miranqachu.

³⁰ Tutayaymantaqa manam lluptinqachu, ninapa rupasqan sachapa kallman hinam kanqa, Diospa pukuriyninwanmi payqa purmarunqa.

³¹ Mana allin runaqa amayá engañakuchunchu, amayá yanqakunapiqa hapipakuchunchu, chaymantaqa manam imatapas hurqonqachu.

³² Payqa manapas tiemponpim kuchusqa kanqa, ikllinkunapas manam wiñamunqañachu.

³³ Manaraq poqochkaspa wichiruq uvas hinam kanqa, sisan wichisqa olivos sacha hinam kanqa.

³⁴ Mana allin runakunaqa mana mirayniyuqmi kanqa, runata engañaspa huntachisqan wasinkunapas ninapa rupasqanmi tukunqa.

³⁵ Paykunaqa nanaytam wiksayakurunku, mana allintam wachakunqaku; paykunaqa engañollatam rikurichinku, nispa.