Jobwan Sutichasqa Libro 13 - CHUYA QELLQA La Biblia en Quechua de Ayacucho 2012

Jobmi allin runa kasqanta nanachikun

¹ Tukuy kaykunatam rikurqani, rinriywanmi uyarirqani.

² Qamkunapa yachasqaykichiktaqa ñoqapas yachanim, qamkunamantaqa manam menoschu kani.

³ Chaywanpas ñoqaqa Dioswanmi rimayta munani, Tukuy Atiyniyuqwanmi kutipanakuyta munani.

⁴ Qamkunaqa llullakuspam imatapas pakaykunkichik, qamkunaqa pitapas mana hampiy atiq doctorkunam kankichik.

⁵ ¡Ima allinraq kanman pasaypaqta upallaruptikichikqa! Hinaspaqa yachayniyuq kasqaykichiktachá qawachikuwaqchik.

⁶ Kunanyá allinta uyariykuwaychik, kay rimarikusqaytayá allinta uyariykuwaychik.

⁷ ¿Diosta nanachikuspachu llullakunallata rimankichik? ¿Diospa favorninpichu engañokunata rimankichik?

⁸ ¿Diosman sayapakuytachu piensankichik? ¿Diosta nanachikuytachu munankichik?

⁹ Sichum pay pruebasuptikichikqa ¿yaqachum runamanta hina burlakuwaqchik?

¹⁰ Sichum llullakuspa Diosman sayapakuptikichikqa cheqaptapunim qaqchaparusunkichik.

¹¹ Hatu-hatun kayninmi mancharichisunkichik, manchakuypaq kayninmi mancharichisunkichik.

¹² Rikchanachiykuna rimasqaykichikpas uchpa hinallam, mitumanta wichiruq perqa hinallam.

¹³ Kunanyá upallaychik, rimasqaytayá uyariychik; imayna kanan kaptinpas ñoqam rimasaq.

¹⁴ ¿Imapaqtaq aychayta kiruykunawan chutasaq? ¿Imanasqataq vidayta wañuypa patanman churasaq?

¹⁵ Wañurachiwanan kaptinpas paypim hapipakusaq, paypa ñawpaqninpim imaynam kawsasqayta valechikusaq.

¹⁶ Ichapas chaynapi salvacionta haypallayman, mana allin runaqa manam Diospa qayllanmanqa yaykunmanchu.

¹⁷ Kay nisqaykunata allinta uyariychik, kay rimasqaykunata sumaqta uyariychik.

¹⁸ Kunanmi kay sasachakuyniymanta rimarisaq, ñoqaqa yachakunim mana huchayuqpaq hapisqa kanayta.

¹⁹ ¿Pitaq ñoqawan atipanakunman? Sichum upallaruspayqa wañurusaqmi.

²⁰ Diosnilláy, kay iskay mañakuyllayta qoykuway, hinaptinqa manam qanmanta pakakusaqchu:

²¹ Amaña ñakarichiwaychu, kay hatun manchakuyta ñoqamanta suchuchiy.

²² Qayaykamuway hinaptinqa contestamusqaykim, icha ñoqachu rimapayamusqayki hinaptin qamñataq contestamuwanki.

²³ Niykuway, ¿maynatañataq huchallikuruni? mana kasukuyniykunata qawaykachiway.

²⁴ ¿Imanasqataq ñoqamanta pakakurunki? ¿Imanasqataq enemigoykipaq hinaña hapiwanki?

²⁵ Ñoqaqa wayrapa apasqan llaqe hinallam kani ¿imanasqataq chinkachiwayta munanki? Ñoqaqa chakisqa paja hinallam kani ¿imanasqataq qatikachawanki?

²⁶ Sinchi ñakariymanmi churaykuwanki, joven kaspay huchallikusqaymantam castigawachkanki.

²⁷ Chakiykunamanmi cadenata churaykunki, maynin purisqaytam qawanki, yupiytam qatipanki.

²⁸ Imapas ismusqa hinam wichirichkani, puyupa tukusqan pacha hinam wichirichkani, nispa.