Jobwan Sutichasqa Libro 12 - CHUYA QELLQA La Biblia en Quechua de Ayacucho 2012

Jobmi rimarin Diospa atiyninmantawan yachayninmanta

¹ Hinaptinmi Job nirqa:

² Cheqaptapunipas qamkunaqa llaqta runam kankichik, yachaypas qamkunawan kuskam tukurunqa.

³ Ichaqa ñoqapas yachayniyuqmi kani manam qamkunamanta menoschu kani. ¿Pitaq chayta mana yachanchu?

⁴ Ñoqaqa mana huchayuq kachkaspaypas, Diosta mañakuptiy contestamuwachkaptinpas, ichaqa amigoykunapa asipayananmi kani.

⁵ Hawka kawsakuq runaqa sasachakuypi kaqtam asipayan, wichiykunanpaqña kachkaptinpas mana llakipayaykuspam tanqaykun.

⁶ Suwakunapas hawkam kawsakunku, Diosta piñachiq runakunapas hawkam kawsakunku, paykunaqa Diostapas makillankupi kasqanpaqmi hapinku.

⁷ Kunanyá uywakunata tapukuy, hinaptinqa paykunam yachachisunki; alton pawaqkunatayá tapukuy, hinaptinqa paykunam willasunki.

⁸ Kay pachata tapukuy, lamar qochapi challwakunata mañakuy, hinaptinqa paykunam yachachisunki.

⁹ ¿Pitaq mana yachanchu tukuy kaykunata Diospuni ruwasqanta?

¹⁰ Diospa makinpim llapallan kawsaqkunapa vidanqa kachkan, paypa makinpitaqmi llapallan runakunapa espiritunpas kachkan.

¹¹ Cheqaptapunim rinriqa rimaykunata musyan, qalluñataqmi mikuypa gustonta musyan.

¹² Yuyaqkunapim yachayqa tarikun, watankunam paykunamanqa yachayta qon.

¹³ Yachaypas atiypas Dioswanmi kachkan, pay tanteaptinmi imapas ruwasqa.

¹⁴ Dios tuñichiptinqa manam pipas hatarichinmanchu, pitapas wichqaruptinqa manam pipas kacharinmanchu.

¹⁵ Mana parachimuptinqa lliwmi chakirun, parachimuptinmi ichaqa lliw allpata lloqllarun.

¹⁶ Yachaypas atiypas makillanpim kachkan, engañaqpas engañachikuqpas makillanpim kachkan.

¹⁷ Yachayniyuqkunapa yachaynintapas paymi chinkachin, paytaqmi juezkunatapas locoyachin.

¹⁸ Reykunatapas mana atiyniyuqtam saqerun, hinaspam mana imayuqta presota apachin.

¹⁹ Sacerdotekunatam llamkayninmanta hurqon, munaychakuqkunapa atiynintam tuñichin.

²⁰ Allin consejaqkunatam upallachin, yuyaq runakunapa allin tanteaynintam chinkachin.

²¹ Kamachikuqkunatam penqayman churan, kallpasapakunatam mana kallpayuqta ruwan.

²² Tutayay ukupi pakasqa kaqkunatam hurqomun, wañuypa tutayaynintapas achkiymanmi hurqomun.

²³ Paymi nacionkunata hatarichin, hina paytaqmi tuñichin; paymi cheqechin hina paytaqmi huñumun.

²⁴ Kay pachapi kamachikuqkunapa yachaynintam qechurun, mana ñanpa kanan chunniqnintam purichin.

²⁵ Tutayaypi hinam purichin, sinkata hinam paykunataqa tamsaykachachin, nispa.