Jobwan Sutichasqa Libro 10 - CHUYA QELLQA La Biblia en Quechua de Ayacucho 2012

Nanaywan Job waqasqanmanta

¹ ¡Kawsaytapas amiruniñam! chayraykum mana upallaykuspa willakusaq, llumpay llaki sonqoyuqmi rimarisaq.

² Diostam nisaq: Amayá mana allin ruwaqpaqqa hapillawaychu, aswanqa imapim pantarusqayta qawaykachillaway.

³ Qampuni unanchaqniy kachkaspaykiqa, ¿imanasqataq kaynataña ñakarichiwanki? ¿Imanasqataq mana allin ruwaqmanraq sayapakunki?

⁴ Qamqa manam imatapas runakuna hinachu qawanki.

⁵ Qampa wataykikunaqa manam runapa watankuna hinallachu.

⁶ Hinaptinqa, ¿imanasqataq huchaytawan mana allin ruwasqaytaqa maskanki?

⁷ Qamqa yachankim mana huchayuq kasqaytaqa, makikimantaqa manam lluptiyta atiymanchu.

⁸ Qamqa makikiwanmi ruwawarqanki, ¿hinaspachum kunanñataq tuñichiyta munawanki?

⁹ Yuyariyá mitumanta ruwawasqaykita, ¿hinaspachum musoqmanta ñutu allpaman tikraruwanki?

¹⁰ Lecheta cuajaspa quesota ruwachkaq hinam cuerpoyta ruwawarqanki.

¹¹ Qaraywan aychaywanmi pachaykachiwarqanki, tulluykunatawan ankuykunatam simpay-simpayta ruwaykurqanki.

¹² Kawsaytam qoykuwarqanki, kuyakuynikitam qoykuwarqanki, waqaychawaspaykim kawsachiwarqanki.

¹³ Chaywanpas qamqa sonqoykipim pakarqanki, chaytaqa yachanim yuyaymanayllaykipi kasqanta:

¹⁴ Huchallikusqay otaq mana huchallikusqaytapas yachanaykipaqmi qawawarqanki, chaynapi huchaymanta mana pampachawanaykipaq.

¹⁵ Huchayuq kaspayqa ¡ay, imaynaraq kasaq! Mana huchayuq kaspaypas manam umaytaqa hoqarisaqchu, uchuychawaspa sinchita ñakarichiwasqaykirayku.

¹⁶ Hatun tukuptiypas qamqa león hinam qatikachawaspa tuñichiwanaykipaq admirakuypaq kaqkunata ruwanki.

¹⁷ Musoq testigokunatam contraypi churanki, piñakuynikitam contraypi mirachinki, tropaykikunapas mana samaykuspam atacawanku.

¹⁸ ¿Imanasqataq mamaypa wiksanmanta lloqsichimuwarqanki? Wañuruptiyqa manañachá pipas rikuwanmanchu karqa.

¹⁹ Mana haykapipas kawsaq hinachá kayman karqa, mamaypa wiksanmanta sepulturaman apasqa kaspaqa.

²⁰ Ñoqaqa pisi vidayuqllam kani. ¡Saqeykuway, asllatapas kusikuytaraqmi munani!

²¹ Manaña kutimuy atina lugarman manaraq richkaspay, tutayaypa wañuypa kasqanman manaraq richkaspay,

²² manaraq chay tutayay nacionman richkaspay, chay nacionpiqa chaqwapa, tutayaypa kananmi, chaypiqa achkiypas rikchakun tutayaymanmi, nispa.