Jobwan Sutichasqa Libro 1 - CHUYA QELLQA La Biblia en Quechua de Ayacucho 2012

Job sutiyuq runapa sasachakuyninmanta

¹ Uz nacionpim Job sutiyuq runa yacharqa. Payqa karqa mana huchayuqmi, allin kaqkuna ruwaqmi, Tayta Diosta manchakuqmi, mana allin ruwaykunamanta sapaqchakuqmi.

² Paypam karqa qanchis qari churinkuna hinaspa kimsa warmi churinkuna.

³ Karqataqmi qanchis waranqa ovejankunapas, kimsa waranqa camellonkunapas, pichqa pachak pares toronkunapas, pichqa pachak china asnonkunapas hinaspa achka-achka criadonkunapas. Jobqa intipa qespimunan lawpi llapallan runakunamantapas ancha apu-apum karqa.

⁴ Qari churinkunam sapakama tupamuqnin punchawpi wasinkupi hatun convidota ruwaqku, qayachimuqkutaqmi kimsan paninkutapas paykunawan mikunankupaq hinaspa upyanankupaq.

⁵ Sapa convido tukuytam, Jobqa churinkunata qayachimuspan chuyanchaq. Tutapayta hatarispanmi sapa churinpaq huchankumanta mayllasqa kanankupaq animalta wañuchispa Diosman lliw kañana sacrificiota ofreceq. Sapa kutillam chaynata ruwaq sonqonpi kaynata nispan: Ichapas churiykunaqa imawanpas huchallikurunku, ichapas paykunaqa Diosta. sonqonkupi kamirunku, nispa.

⁶ Huk punchawmi angelkuna Tayta Diospa qayllanman rirqaku. Satanaspas paykunawan kuskataqmi rirqa,

⁷ chaymi Tayta Dios tapurqa: ¿Maymantataq hamuchkanki? nispa. Satanasñataqmi nirqa: Allpa pacha patan-patan muyumusqaymantam hamuchkani, nispa.

⁸ Chaymi Tayta Dios tapurqa: ¿Yaqachum rikumurqanki serviqniy Jobta? Payqa mana huchallikuqmi, allin kaqkuna ruwaqmi, ñoqatapas kasuwanmi, mana allin ruwaykunamantapas sapaqchakuqmi, pay hinaqa manam pipas kay pachapiqa kanchu, nispa.

⁹ Chaymi Satanasqa Tayta Diosta nirqa: Jobqa manam tukuy sonqonmantachu servisunki, astawanqa imapasraykullam.

¹⁰ Qamqa pipas mana llapchaykunanpaqmi qenchawan hina muyuruspa payta, ayllunkunata hinaspa tukuy ima kapuq-ninkunatapas waqaychachkanki. Llam-kaynintapas, animalninkunatapas bendeciykuptikim, llapa tukuy imanpas llumpa-llumpayta mirarun.

¹¹ Sichum llapa kapuqninkunata qechuruwaq hinaptinqa uyaykipipunim ñakaykusunkiman, nispa.

¹² Chaymi Satanasta Tayta Dios, nirqa: Allinmi, munasqaykitayá llapa kapuqninkunawan ruwamuy. Jobtam ichaqa ama llapchayllapas llapchaykunkichu, nispa. Chaymantam Satanasqa Tayta Diospa qayllanmanta lloqsirqa.

¹³ Huk punchawmi Jobpa churinkuna, piwi kaqpa wasinpi mikuspa upyachkarqa-ku,

¹⁴ hinaptinmi huk willakuq chayara-muspan Jobman kaynata nirqa: Torokunawan yapuchkaptiykum chaynataq asnokunapas hichpaykupi mikuchkaptinkum,

¹⁵ Sabá lawmanta kaq runakuna qonqayta chayaramuspanku animalkunata suwaspanku runaykikunatapas lliwta wañurachinku. Ñoqallañam lluptiramuni qanman willanaypaq, nispa.

¹⁶ Manaraqpas chay runa willakuyta tukuchkaptinmi huk runapas chayaramuspan nirqa: Rayo wichiykamuspanmi llapa ovejakunatawan llapa michiqkunata kañarun. Ñoqallañam lluptiramuni qanman willanaypaq, nispa.

¹⁷ Manaraqpas chay runa willakuyta tukuchkaptinmi huk runapas chayaramuspan nirqa: Kimsaman rakisqa Caldea tropakunam hamuruspanku camellokunata qatikunku, michiqkunatapas espadawanmi wañurachinku. Ñoqallañam lluptiramuni qanman willanaypaq, nispa.

¹⁸ Manaraqpas chay runa willakuyta tukuchkaptinmi huk runapas chayaramuspan nirqa: Piwi churikipa wasinpi llapallan churikikuna mikuspa upyachkaptinkum

¹⁹ qonqaymanta chunniq lawmanta sinchi wayra rikuriramuspan churikikunapa kasqan wasita tawan esquinanmanta tuñirachin, hinaptinmi lliw wañurunku. Ñoqallañam lluptiramuni qanman willanaypaq, nispa.

²⁰ Chaymi Jobqa llakikuymanta hatarispan pachanta llikipakurqa, hinaspam chukchantapas rutukuruspan pampaman qonqoranpa kumuykuspan Diosta hatunchaspan

²¹ kaynata nirqa: Mamaypa wiksanmantaqa qalallam hamurqani, qalallataqmi kutisaqpas. Tayta Diosmi qowarqa, payllataqmi qechuruwanpas. Tayta Diospa sutinyá hatunchasqa kachun, nispa.

²² Tukuy chaykunawanpas Jobqa manam huchallikurqachu, manataqmi chaykunamantaqa Diospa contranpiqa imatapas rimarqachu.