Jeremías 50 - CHUYA QELLQA La Biblia en Quechua de Ayacucho 2012

Babilonia nación vencesqa kananmanta

¹ Babilonia nacionpa chaynataq Caldea runakunapa contranpim Jeremiasnintakama Tayta Dios kaynata nirqa:

² Llapallan nacionkunaman willakamuychik, banderata hoqarispa qapariychik, mana imata pakaspa kaynata niychik: “Babilonia nacionmi vencesqa rikurirun, Bel sutiyuq idolonkum penqaypi rikurirun, Marduc sutiyuq idolonkupas ñutupasqam kachkan, tukuy rikchaq idolonkunapas penqakuypaqmi ñutupasqa kachkan”, nispaykichik.

³ Norte lawmantam Babiloniapa contranpi hamuchkanku, Caldea naciontam pasaypaqta purmachinqaku. Runakunapas chaynataq animalkunapas manañam chaypiqa kanqañachu, chay allpamantaqa lliwmi ayqekunqaku, nispa.

Israelpa mirayninkuna Tayta Diosman kutirikunankumanta

⁴ Ñoqa Tayta Diosmi kaynata nini: Chay tiempokunapim Israel runakunawan Judá runakuna, ñoqa Tayta Diosta waqastin maskawanqaku.

⁵ Sión llaqtaman maynin chayanankutam tapukunqaku, hinaspam chay llaqta lawman qawarispanku ninqaku: “Tayta Diospaman hakuchik, mana haykapipas qonqanapaq wiñaypaq pactota ruwaspa payman hukllawakamusunchik”, nispanku.

⁶ Llaqtayqa chinkasqa ovejakuna hinam karqa, michiqninkunam ñanta pantarachispa orqokunapi cheqesqata saqerurqaku. Orqon-orqon purispankum kanchankutapas qonqarurqakuña.

⁷ Enemigonkunam tariruspanku mikururqaku, hinaspam kaynataraq nirqaku: “Manam ñoqanchikpaqqa huchanchikchu, paykunaqa Tayta Diospa contranpim huchallikururqaku. Tayta Diosqa mikunanku pasto hinam karqa, ñawpa taytankupa hapipakunanmi payqa karqa”, nispanku.

⁸ ¡Babilonia nacionmanta lluptiychik, Caldea allpamanta lloqsiychik! ¡Ayqeqkunapa ñawpaqninta kallpaychik!

⁹ Babilonia naciontam norte lawmanta hamuq atiyniyuq nacionkunawan atacachisaq, llapallankum huklla yaykuspa munaychakurunqaku; paykunaqa flechakunawan allin peleaq soldadokunam, flechaspapas hapichinkupunim.

¹⁰ Caldea nacionpa tukuy imantam apakunqaku, mana apaypas atinankukamam qechunqaku. Ñoqa Tayta Diosmi chaynata nini.

Babilonia nación tuñichisqa kananmanta

¹¹ Caldea nacionpi runakuna, maynatam kusikurqankichik, kusikuyllawanñam llaqtayta purmachirqankichik, llullu pastowan saksaruq vaquilla hinam pawaykacharqankichik, caballokuna hinam weqeqeqerqankichik.

¹² Mamaykichik Babilonia nacionmi penqaypi kachan, wachakusuqniki nacionmi pantaypi kachkan; wakin nacionkunamantapas aswan qepallapiñam rikurirunqa, mana yakuyuq chunniq pampam kanqa.

¹³ Ñoqa Tayta Dios piñakurusqayraykum manaña runayuq chunninqa, pasaypaq purmachisqam kanqa. Babilonia lawninta pasaqkunam admirakunqaku, purmachisqa kasqanmantam burlakunqaku.

¹⁴ ¡Llapa flechaqkuna, Babiloniapa muyuriqninpi churakuychik! ¡Ñoqa Tayta Diospa contraypi huchallikusqanmanta mana samaykuspa flechaykichikta kachariychik!

¹⁵ Muyuriqninmanta ¡Guerra! nispa qapariychik, ¡Babilonia nacionmi wichirun! ¡Torrenkunawan murallankunam wichirun! ¡Kayqa ñoqa Tayta Diospa vengakuyniymi! ¡Imaynam ruwasusqaykichikta hina paykunatapas ruwaychik!

¹⁶ Babiloniapiqa tarpuqtapas cosechaqtapas lliwta wañuchiychik. Guerrata qawaykuspankum huklaw nacionniyuqkunapas, sapakama maymi kasqanku nacionman lluptikunqaku.

Israelpa mirayninkuna kutimunankumanta

¹⁷ Israelqa leonkunapa cheqerachisqan chinkasqa oveja hinam. Puntatam Asiria nación mikururqa, paypa qepantañataqmi Babilonia nacionpa reynin Nabucodonosor tullunkunatawanpas katkarqa.

¹⁸ Chayraykum Israelpa yupay-chasqan Tukuy Atiyniyuq Tayta Dios kaynata nin: Asiria nacionpa reynin castigasqayta hinam Babilonia nacionpa reynin Nabucodonosortapas chaynataq runankunatapas castigasaq.

¹⁹ Israeltam pastonman kutichimusaq; Carmelo orqopi, Basán lawpi, Efraín orqokunapi hinaspa Galaad lawpi pastokunatam saksanankukama mikunqaku, nispa.

²⁰ Ñoqa Tayta Diosmi kaynata nini: Chay punchawkunapiqa, Israel nacionpa mana allin ruwasqankuta maskaspankupas manam tarinqakuñachu, Judá nacionpa huchankunata maskaspankupas manam tarinqakuñachu. Puchuchisqay runakunapa huchantam ñoqa pampachasaq, nispa.

²¹ Merataim llaqtatayá atacamuychik, Pecod llaqtayuqkunatayá atacamuychik, ñoqapa kamachisqayman hina, qatikachaspa pasaypaqta chinkachimuychik; kamachisqayman hina ruwamuychik, ñoqa Tayta Diosmi chaynata kamachikuni.

²² Peleaqkunapa qapariyninmi chay allpapi uyarikuchkan, hatun ñakariymi uyarikuchkan.

²³ Nacionkunata tuñichiq martilloman rikchakuq Babilonia nacionmi pakipasqa rikurirun, ¡Babilonia llaqta purmarusqanwanmi llapa nacionkuna mancharisqallaña kachkanku!

²⁴ Yaw, Babilonia llaqta, contraykipim toqllata churaruni; mana musyakuspam chay toqllaman wichiykunki. Tayta Diospa contraypi hatarisqaykiraykum hapirachikuspa presocharachikunki.

²⁵ Tayta Diosmi armankuna waqaychanan wasita kicharun, piñakuy armankunatam hurqoramun; Tukuy Atiyniyuq Tayta Diosmi Caldea runakunawan imam ruwananta ruwanqa.

²⁶ ¡Tukuy hinastinmanta hamuspa Babiloniata atacaychik, kawsaykuna waqaychanan taqekunata kichaychik! ¡Runakunata huñuruspa lliwta wañuchiychik, ama hukllapas puchuchunchu!

²⁷ Soldadonkunata wañuchiychik, nakana wasiman pusaychik. ¡Ay, imaynaraq kanqaku, castigasqa kananku punchawmi chayaramunña!

²⁸ Babiloniamanta lluptiqkunapa qayakuyninmi uyarikun, Tayta Diospa vengakusqantam Sión llaqtapi willakuchkanku, templon tuñichisqankumanta vengakusqantam willakuchkanku.

²⁹ Paykunam ninku: “Babiloniata atacamunankupaq flechawan peleaqkunata huñumuychik; mana pipas lluptinanpaq muyuriqninkupi campamentota sayachimuychik. Imam ruwasqankuman hina pagamuychik, imam ruwasqanta hina paytapas ruwamuychik. Paykunaqa Israelpa yupaychasqan Tayta Diospa contranpim hatarirqaku”, nispanku.

³⁰ Chayraykum jovenninkunapas plazankunapi wañuchisqa kanqaku, chay punchawpim allinnin qari-qari soldadonkunapas wañunqaku. Ñoqa Tayta Diosmi chaynata nini.

³¹ Ñoqa Tukuy Atiyniyuq Tayta Diosmi kaynata nini: Hatunchakuq nación, contraykipim kachkani, punchawnikim chayaramun, castiganay punchawmi chayaramun.

³² Hatun tukuq nación, mitkaruspam urmarunki, manam hatarichisuqnikipas kanqachu. Llaqtaykikunatam kañaykusaq, chay ninam muyuriqnikipi kaqkunatapas rupanqa, nispa.

³³ Tukuy Atiyniyuq Tayta Diosmi kaynata nin: Israel runakunawan Judá runakunam ñakarichisqa kachkanku, enemigonkunam presocharuspa mana kachariyta munankuchu.

³⁴ Chaywanpas paykunapa reclamaqninqa atiyniyuqmi, Tukuy Atiyniyuq Tayta Diosmi sutinpas. Paymi nanachikuspan allin arreglota ruwanqa, nacionmanpas hawkayaytam apamunqa, Babiloniamanñataqmi hatun manchakuyta apamunqa.

³⁵ Ñoqa Tayta Diosmi kaynata nini: Caldea runakunapa contranpi peleamuychik, Babilonia nacionpa contranpi peleamuychik, kamachiqninkunapa contranpi peleamuychik, yachaysapankunapa contranpi peleamuychik.

³⁶ Locoyanankukama layqankunapa contranpi peleamuychik, allinnin qari-qari soldadonkunapas manchakuymanta katkatatachunku.

³⁷ Carretankunatawan caballonkunatapas espadawan wañuchimuychik, warmi hinaña katkatatanankukama soldadonkunatapas wañuchimuychik, qori-qollqenkupa contranpi peleamuychik, lliwta suwa apachun.

³⁸ Mayunkunapa contranpi peleamuychik, chay mayukuna chakichun, Babiloniaqa tukuy rikchaq idolokunapa kananmi, chay idolonkum paykunata locoyarachin.

³⁹ Chayraykum Babiloniapiqa purun animalkunawan, atoqkuna hinaspa avestruzkunallaña yachanqa. Chaypiqa wiñaypaqmi manaña pipas yachanqachu.

⁴⁰ Sodoma, Gomorra chaynataq muyuriqninpi llaqtakuna hinam Babilonia nacionqa manaña runayuq chunninqa, manañam pipas chaypiqa yachanqakuñachu, nitaqmi chayninta pasaqkunapas samarinqakuñachu. Ñoqa Tayta Diosmi chaynata nini.

⁴¹ Norte lawmantam huk nación hamuchkan, huk hatun nacionpa tropanmi hamuchkan, kay pachapa cantonmantam achkallaña reykuna hatarimuchkan.

⁴² Flechana arcokunawan lanzakunawan armasqam hamuchkanku, pasaypaq mana llakipayakuq runakunam hamuchkanku, Lamar qocha hinaraqmi qaparinkupas, Caballopi silladam hamuchkanku, Babiloniata atacanankupaqmi hamuchkanku.

⁴³ Babilonia nacionpa reyninmi chay willakuyta uyarirun, makinkunapas manaña kallpayuqmi rikurirun, manchakuypa pampasqanmi rikurirun, wachakuywan ñakariq warmi hinaraqmi rikurirun.

⁴⁴ Jordán mayupa patan montemanta pastokunapa kasqanman lloqsiq león hinam, qonqaymanta lloqsiruspay Babilonia runakunata lluptirachisaq. ¿Pitaq ñoqa hina kanman? ¿Pitaq ñoqawan atipanakunman? ¿Mayqan michiqtaq ñoqawan churanakunman?

⁴⁵ Chaynaqa, Babilonia nacionpa contranpi tanteasqaytawan Caldea runakunapa contranpi tanteasqayta uyariychik: Uña ovejanku-natapas aysaspam apanqaku, pastonkunatapas kañaykunqakum.

⁴⁶ Babilonia nacionta venceruptinkum allpapas katkatatanqaraq, qapariyninpas wakin nacionkunamanraqmi uyarikunqa.