Jeremías 39 - CHUYA QELLQA La Biblia en Quechua de Ayacucho 2012

Jerusalén llaqtata vencesqankumanta

¹ Judá nacionpi rey Sedequías isqon wata chunka killanña munaychakuchkaptinmi, Babilonia nacionpa reynin Nabucodonosor llapa tropankunawan hamuruspa Jerusalén llaqtata muyurirurqaku.

² Chunka hukniyuq wataña rey Sedequías munaychakuchkaptinmi, chay watapa tawa kaq killanpa isqon kaq punchawninpi, llaqtapa murallanta toqoruspanku,

³ Babilonia nacionpi reypa capitanninkuna yaykururqaku, hinaspam chawpi kaq punkupi churakururqaku, paykunam karqa: Nergal-sarezer, Samgar-nebo, eunucokunapa kamachiqnin Sarsequim, reypa palacionpi kamachikuq Nergal-sarezer hinaspa wakin kamachikuqkunapas.

⁴ Judá nacionpa reynin Sedequiaswan soldadonkunañataqmi enemigonkuta rikuykuspanku llaqtamanta lluptikur-qaku. Tutallanmi reypa huertankuna-man riq ñannintakama iskay murallakunapa chawpinpi kaq punkunta lloqsiruspanku, Jordán qechwaman riq ñanninta ayqekurqaku.

⁵ Ichaqa Caldea tropakunam qatispanku Jericó llaqtapa hichpan pampapi hayparurqaku, hinaspam presocharuspanku Hamat lawpi Ribla llaqtaman, rey Nabucodonosorpa kasqanman pusarqaku. Hinaptinmi Sedequiasta juzgaspan sentenciarqa.

⁶ Ribla llaqtapitaqmi rey Sedequiaspa churinkunatawan Judá nacionpi llapa-llan kamachikuqkunatapas, Sedequias-pa qayllanpi wañuchirqaku.

⁷ Sede-quiastañataqmi ñawinkunata hurqorachispan bronce cadenakunawan watasqata Babilonia nacionman aparqa.

⁸ Caldea tropakunaqa reypa palaciontapas hinaspa llapa runakunapa wasinkunatapas kañaykurqakum, Jerusalén llaqtapa muyuriqninpi perqakunatapas taqmarurqakum.

⁹ Babilonia nacionpa reyninta waqaychaq soldadokunapa kamachiqnin Nabuzaradanñataqmi, llaqtapi puchuq runakunatawan kikin-kumanta entregakuq runakunata preso-charuspa Babilonia nacionman aparqa.

¹⁰ Judá lawpiqa saqerurqa wakcha mana imayuq runakunallatañam, hinaspam uvas huertakunatawan chakrakunata paykunaman qoykarirqa.

Carcelmanta Jeremías lloqsisqanmanta

¹¹ Jeremiasmantam Babilonia nacionpa reynin Nabucodonosor waqaychaqnin soldadokunapa capitannin Nabuzaradanta kamachirqa:

¹² Jeremiasta carcelmanta hurqoramuspaykiqa nanachikuspaykim ama imanankichu, aswanqa imam mañakususqaykitam qonki, nispa.

¹³ Chaynapim reyta waqaychaq soldadokunapa kamachiqnin Nabuzaradanqa, palaciopi serviqkunapa kamachiqnin Nabusazbanwan, hatun kamachikuq Nergal-sarezerwan hinaspa Babilonia nacionpa reyninta yanapaq wakin kamachikuqkunapiwan,

¹⁴ kacharqaku carcelpa pationmanta Jeremiasta hurqomuspanku Ahicampa churin Gedaliasman qomunankupaq, chaynapi Jeremiasta wasinmanña pusananpaq. Chaymi Jeremiasqa llaqta runakunawanña yacharqa.

Ebed-melecman Tayta Diospa prometesqanmanta

¹⁵ Jeremías carcelpa pationpi preso kachkaptinraqmi Tayta Dios nirqa:

¹⁶ Israelpa yupaychasqan Tukuy Atiyniyuq Tayta Diospa nisqayta, Cus nacionniyuq Ebed-melecman kaynata nimuy: Kay llaqtamanmi rimarisqaykunata chayachimusaq, ichaqa manam allinninkupaqchu aswanqa mana allinninkupaqmi. Chaykuna pasakuptinqa qampas chaypim kanki.

¹⁷ Ñoqa Tayta Diosmi kaynata niki: Chay punchawpim manchakusqayki runakunamanta librasqayki, manam paykunapa makinmanqa wichinkichu.

¹⁸ Paykuna wañuchisunaykimantam librasqayki. Ñoqapi hapipakusqaykiraykum vidaykita salvasaq. Ñoqa Tayta Diosmi chaynata nini.