Jeremías 38 - CHUYA QELLQA La Biblia en Quechua de Ayacucho 2012

Jeremiasta pozoman kachaykusqankumanta

¹ Matanpa churin Sefatiaswan, Pasurpa churin Gedalias, Selemiaspa churin Jucal hinaspa Malquiaspa churin Pasurmi uyarirurqaku, llapa runakunaman Jeremiaspa kayna nisqanta:

² Tayta Diosmi kaynata nin: Kay llaqtapi qepaqkunam guerrawan, yarqaywan hinaspa peste onqoywan wañunqaku. Caldea runakunaman hukllawakuqmi ichaqa wañuymanta librakuspan vidanta salvanqa.

³ Tayta Diosmi kaynata nin: Cheqaptapunipas kay llaqtataqa Babilonia nacionpi reypa tropankunamanmi qoykusaq, manam pipas harkakuyta atinqachu, nispa.

⁴ Hinaptinmi reyta llapa kamachikuqkuna nirqaku: Kay runataqa wañurachisun, payqa rimasqankunawanmi kay llaqtapi puchuq soldadokunatawan llapa runakunata hukmanyachichkan. Kay runaqa manam llaqtapa hawkayaynintachu maskachkan aswanqa mana allinnintam, nispa.

⁵ Chaymi rey Sedequías nirqa: Chay runaqa makikichikpim kachkan, munasqaykichikta ruwaychik, manam ñoqaqa contraykichikpiqa ima ruwaytapas atiymanchu, nispa.

⁶ Hinaptinmi Jeremiasta hapiruspanku reypa churin Malquiaspa pozonman waskakunawan uraykachirqaku. Chay pozoqa tarikurqa carcelpa pationpim. Ichaqa chay pozom mana yakuyuqña karqa, chayraykum Jeremiasta kachaykuptinku mituman chinkakuykurqa.

⁷ Ichaqa reypa palacionpi servikuq Cus nacionniyuq Ebed-melecmi uyarirurqa Jeremiasta pozoman kachaykusqankuta. Reyñataqmi Benjamín sutiyuq punkupi huk huñunakuypi kachkarqa.

⁸ Chaymi Ebed-melecqa palaciomanta lloqsispan reyman kaynata nimurqa:

⁹ Reynilláy, kay runakunapa profeta Jeremiaswan imam ruwasqankuqa manam allinchu, paytaqa pozomanmi kachaykamunku, chaypiqa yarqaymantam wañurunqa, kay llaqtapiqa tantapas manañam kanchu, nispa.

¹⁰ Hinaptinmi reyñataq Cus nacionniyuq Ebed-melecta kaynata kamachirqa: Kimsa chunka runakunata pusaspayki profeta Jeremiasta manaraq wañuruchkaptin pozomanta hurqomuychik, nispa.

¹¹ Chaymi Ebed-melecqa runakunata pusarikuspan palaciopi tarikuq qori-qollqe waqaychana cuartopa urayninpi kaq cuartoman kutirirqa; chaymanta mawka latapakunata aparikuspanmi waskaman wataykuspan pozopi tarikuq Jeremiasman uraykachirqa.

¹² Hinaspanmi nirqa: Chay latapakunata wallwaykiman waskakunawan hapichiy, nispa. Chaynatam Jeremías ruwarqa.

¹³ Chay-natam Jeremiasta waskakunawan pozo-manta hurqorurqaku, hinaptinmi carcelpa pationpiña qeparqa.

Jeremiasta rey Sedequías qayachisqanmanta

¹⁴ Chaymantam Jeremiasta rey Sedequías pusarachimurqa templopa kimsa kaq pationman, hinaspanmi nirqa: Kunanmi tapuptiy imam kaqta niwanki, nispa.

¹⁵ Chaymi Jeremías nirqa: Imam kaqllata niptiyqa wañurachiwan-kim, consejaptiypas manam kasuwankichu, nispa.

¹⁶ Chaymi rey Sedequiasqa pakasqallapi juraspan Jeremiasta kaynata nirqa: Kawsachiwaqninchik Tayta Diosraykum jurani: Manam wañuchisqaykichu nitaqmi wañuchiy munasuqniki runakunamanpas qosqaykichu, nispa.

¹⁷ Hinaptinmi Jeremías nirqa: Israelpa yupaychasqan Tukuy Atiyniyuq Tayta Diosmi kaynata nin: Sichum Babilonia nacionpi reypa capitanninkunaman entregakuspaykiqa kawsankim, kawsanqataqmi miraynikikunapas. Kay llaqtatapas manam kañanqakuchu.

¹⁸ Sichum paykunaman mana entregakuptikim ichaqa, Caldea runakuna kay llaqtata venceruspa kañaykunqaku, qampas manam paykunamantaqa lluptinkichu, nispa.

¹⁹ Chaymi rey Sedequías nirqa: Caldea tropakunaman hukllawakuruq Judá runakunatam manchakuni. Paykunapa makinman wichiykuptiyqa ñakarichiwaspankuchá ñoqamanta burlakunmanku, nispa.

²⁰ Hinaptinmi Jeremías nirqa: Judá runakunamanqa manam entre-gasunkichu. Tayta Diospa nisqanta ka-sukuspaqa allinmi kanki, vidaykitapas librankim.

²¹ Mana entregakuptikiqa, Tayta Diosmi kaynata nin:

²² Judá nacionpi reypa palacionpi puchuq warmikunam Babilonia nación reypa capitanninkunaman qosqa kanqaku, hinaspam chay warmikuna ninqaku: Hapipakusqayki amigollaykikunam engañaruspa rantikurusunki, mitupi chinkaykuchkaqta saqerususpaykim lliw qepanchakurusunki, nispanku.

²³ Llapallan warmikikunatawan churi-kikunatam Caldea runakunaman qoykunqaku. Qampas manam lluptinkichu paykunamantaqa. Babilonia nacionpa reyninmi presocharususpayki kay llaqtatapas kañaykunqa, nispa.

²⁴ Chaymi rey Sedequías nirqa: Kay niwasqaykikunataqa amam pimanpas willakunkichu, mana chay-qa wañurunkim.

²⁵ Sichum llapa kamachikuqkuna qanwan rimasqanchikta yacharuspankuqa, ichapas nisunkiman: Ama pakaspayá imatam reyman nisqaykita chaynataq imatam reypas nisusqaykita willaykuwayku, chaynapi mana wañurachinaykupaq, nispanku.

²⁶ Hinaptinqa paykunatam ninki: Ñoqaqa reytam ruegakamurqani Jonatanpa wasinman amaña kutichiwananpaq, chaynapi mana wañurunaypaq, nispayki.

²⁷ Reypa nisqanpi hinam, llapa kamachikuqkunaqa Jeremiasman rispanku tapurqaku. Chaymi Jeremiasqa reypa kamachisqanta hinalla willakurqa. Reywan imam rimasqanta mana pipas uyarisqanraykum upallalla karqaku.

²⁸ Chaynapim Jeremiasqa carcelpa patiollanpi qeparqa, Jerusalén llaqta vencesqa kanankama.