Jeremías 37 - CHUYA QELLQA La Biblia en Quechua de Ayacucho 2012

Jeremiasta presochasqankumanta

¹ Babilonia nacionpa reynin Nabu-codonosormi, Judá nacionpa reynin kananpaq Joacimpa churin rey Jeconiaspa rantinpi Josiaspa churin Sedequiastaña munaychakunanpaq churarqa.

² Ichaqa Sedequiasmi serviqninkunapiwan chaynataq lliw runakunapiwan Jeremiaswan Tayta Diospa willachisqan palabrakunata mana kasukurqakuchu.

³ Rey Sedequiasmi kacharqa Selemiaspa churin Jucaltawan Maasiaspa churin sacerdote Sofoniasta, chaynapi profeta Jeremiasta kaynata nimunankupaq: Yupaychasqanchik Tayta Diostayá mañapuwayku, nispa.

⁴ Jeremiastaqa manaraqmi presocharqakuchu, chaymi payqa llaqtapi libre purikurqa.

⁵ Rey Faraonpa tropankunam Egipto nacionmanta lloqsiramurqaku, chaymi Jerusalén llaqtapa muyuriqninpi tarikuq Caldea tropakuna chayta yacharuspanku llaqtamanta suchu-kurqaku.

⁶ Chaymi profeta Jeremiasta Tayta Dios nirqa:

⁷ Israelpa yupaychasqan Tayta Dios-mi kaynata nin: Ñoqata tapuwanayki-chikpaq kachamusuqnikichik Judá nacionpa reynin Sedequiastam nimunkichik: Yanapasunaykichikpaq Egipto nacionmanta lloqsimuq rey Faraonpa tropankunaqa nacionninkumanmi kutikunku.

⁸ Chaynaqa, Caldea tropakunam kaqmanta kutimuspanku Jerusalén llaqtata atacanqaku, hinaspam venceruspanku kañaykunqaku.

⁹ Ñoqa Tayta Diosmi nini: “Caldea tropakunaqa ripukunkuñam” nispaqa amayá engañakuychikchu, paykunaqa manam ripunqakuchu.

¹⁰ Caldea tropakunataña venceruptikichikpas, paykunamanta herido puchuqkunam carpankumanta sapakama hatarimuspanku kay llaqtata kañaykunqaku, nispa.

¹¹ Rey Faraonpa tropankuna Jeru-salén llaqtaman hamusqankuta yacha-ruspankum Caldea tropakuna asurikurqaku.

¹² Jeremiasñataqmi Jerusalén llaqtamanta Benjamín lawman rirqa herencia allpata chaskimunanpaq.

¹³ Ichaqa Benjamín sutiyuq punkuman Jeremías chayaruptinmi, Hananiaspa willkan otaq Selemiaspa churin Irías presocharuspan nirqa: Qamqa Caldea runakunaman hukllawakuqmi richkanki, nispa.

¹⁴ Chaymi Jeremías nirqa: Manam chaynachu, Caldea runakunamanqa manam hukllawakuyta munanichu, nispa. Ichaqa Iriasmi mana kasuspan Jeremiasta presocharuspam kamachikuqkunaman pusarqa.

¹⁵ Paykunam Jeremiaspaq piñakuruspanku azotechirqaku, hinaspam secretario Jonatanpa wasinta carcelman tikraruspanku chaypi carcelarurqaku.

¹⁶ Jeremiastam wasipa pampan ukupi calabozoman churarurqaku, hinaptinmi unay chaypi karqa.

¹⁷ Hinachkaptinmi rey Sedequías palacionman pusarichimuspa pakasqallapi tapuspan nirqa: ¿Yaqachu Tayta Diosqa imallatapas ñoqapaq nisurqanki? nispa. Chaymi Jeremías nirqa: Arí, kachkanmi, Babilonia nacionpa reyninmanmi entregasqa kanki, nispa.

¹⁸ Chaymantam rey Sedequiasta Jeremías nirqa: ¿Imapitaq qampa, serviqnikikunapa chaynataq kay runakunapa contranpi huchallikuruni chaynapi carcelman wichqachiwanaykipaq?

¹⁹ ¿Maypitaq kachkan “Babilonia nacionpa reyninqa, manam atacamusunkichikchu qamkunatapas nitaq kay naciontapas”, nispa nisuqnikichik profetakunaqa?

²⁰ Reynilláy, kunanmi ruegakuyki kay mañakusqayta chaskiykuwanaykipaq. Secretario Jonatanpa wasinmanqa amañayá kutichiwaychu chaypi mana wañurunaypaq, nispa.

²¹ Chaymi rey Sedequías kamachirqa, Jeremiasta carcelpa patiollanpiña presochaspa, tanta qatumanta tantata rantimuspa sapa punchaw payman qonankupaq. Chaynatam ruwarqaku llaqtapi tanta tukunankama. Chaynapim Jeremiasqa carcelpa pationpi preso karqa.