Jeremías 33 - CHUYA QELLQA La Biblia en Quechua de Ayacucho 2012

Hamuq tiempokunapaq allin willakuymanta

¹ Carcelpa pationpi Jeremías preso kachkaptinmi huktawan Tayta Dios rimapayaspan nirqa:

² Kay pachata unanchaspa tukuy imankunatapas churaspa takyachiq ñoqa Tayta Diosmi kaynata nini:

³ Mañakuwaptikiqa contestasqaykim, hinaspaymi hatun kaqkunatawan mana reqsisqayki kaqkunata yachachisqayki.

⁴ Jerusalén llaqtapi wasikunamantawan Judá nacionpi reykunapa palacionmantam, Tukuy Atiyniyuq Tayta Dios kaynata nin: Lliwmi tuñichisqa kanqa.

⁵ Caldea runakunam kay llaqtata atacamunankupaq murallapa qepanpi allpata montonqaku, chaymi paykunawan peleanankupaq lloqsispanku lliw wañuchisqa kanqaku. Ñoqam hatun piñakuyniypi paykunata wañuchisaq, mana allinkuna ruwasqankumantam kay llaqtata manaña yanapasaqchu.

⁶ Chaywanpas llaqtaytaqa hampispaymi sanoyachisaq, paykunataqa imankumantapas mana pisisqatam hawkallata hinaspa mana pipapas imanasqanta kawsachisaq.

⁷ Judá runakunatawan Israel runakunata preso risqankumanta kutichimuptiymi, ñawpaq tiempokunapi hinaraq kaqllamanta hatarichisqa kanqaku,

⁸ Ñoqapa contraypi huchallikusqankutam chuyanchasaq, mana kasuwaspanku huchakuna ruwasqankutam pampachasaq.

⁹ Jerusalén llaqtam kusikunay llaqta kanqa, kay pachapi nacionkunapa hatunchakunan hinaspa ancha reqsisqa kanan llaqtam kanqa. Jerusalén llaqtapi yachaqkunapaq tukuy allinkunata ruwaspay hawkayaypi kawsachisqayta uyarispankum chay nacionkuna manchakuspa katkatatanqaku, nispa.

¹⁰ Tayta Diosmi kaynata nin: Qamkunam ninkichik, “kay llaqtaqa manaña runayuq manaña animalniyuqmi chunnichkan. Judá nacionpi llaqtakunawan Jerusalén llaqtapa callenkunam mana runayuq, manaña animalniyuq purmachkan, manañam pipas chaypiqa yachanñachu”, nispa.

¹¹ Chaywanpas ñoqa Tayta Diosmi kaynata nini: Kaypim kaqmanta uyarikunqa runakunapa kusikuymanta qapariyninwan asiyninku chaynataq casarakuqkunapa fiesta ruwasqankupas, uyarikunqataqmi: ¡Tukuy Atiyniyuq Tayta Diosman graciasta qoychik! Payqa allin ruwaqmi, kuyakuyninpas wiña-wiñaypaqmi, nisqankupas. Templomanmi kuyakuy ofrendankuta apamunqaku. Chaynaqa kanqa huklaw nacionkunaman preso apasqakunata kay allpaman kutichimuptiymi, chaynapim ñawpaq watakunapi hinaraq kanqaku. Ñoqa Tayta Diosmi chaynata nini.

¹² Ñoqa Tukuy Atiyniyuq Tayta Diosmi kaynata nini: Kay manaña runayuq chaynataq manaña animalkunapapas kanan chunniqpim hinaspa llapallan llaqtakunapim kaqllamanta pastokunata wiñachisaq, hinaptinmi michiqkuna animalninkuta chaypi michinqaku.

¹³ Chaynataqmi orqokunapi kaq llaqtakunapipas, pampakunapi kaq llaqtakunapipas, Neguev law llaqtakunapipas, Benjamín allpapipas, Jerusalén llaqtapa muyuriqninkunapipas chaynataq Judá nacionpi kaq llaqtakunapipas, michiqkunam ovejakunata kaqllamanta yupanqaku. Ñoqa Tayta Diosmi chaynata nini.

¹⁴ Ñoqa Tayta Diosmi kaynata nini: Hamuchkanmi punchaw, Israel naciontawan Judá nacionta bendecinaypaq prometesqaykunata cumplinaypaq.

¹⁵ Chay punchaw chayaramuptinmi Davidpa mirayninmanta huk ikllipata hatarichisaq; paymi allin kaqkunata ruwaspan, allin arreglokunata ruwaspan kay allpapi munaychakunqa.

¹⁶ Paypa punchawninkunapim Judá nación salvasqa kanqa, Jerusalén llaqtapas hawkam kawsakunqa. Chayraykum sutichanqaku: Tayta Diosmi vencechiwaqninchikqa, nispanku.

¹⁷ Ñoqa Tayta Diosmi kaynata nini: Davidpa mirayninmanta Israelpi munaychakuqqa manam tukunqachu.

¹⁸ Leviypa mirayninmanta kaq sacerdotekunapas manam chinkanqachu, paykunam lliw kañana sacrificiokunatawan kawsaykunamanta ofrendakunata chaynataq wakin ofrendakunatapas sapa punchaw ofrecewanqaku, nispa.

¹⁹ Tayta Diosmi Jeremiasta rimapayaspan nirqa:

²⁰ Ñoqa Tayta Diosmi kaynata nini: Punchawwan chaynataq tutawan pacto ruwasqayqa cumplikunqapunim, chayraykum punchawpas chaynataq tutapas tiempollanpi chayamun.

²¹ Chaynam serviqniy Davidwan pacto ruwasqaypas cumplikunqapuni, chaynapim Davidpa mirayninmanta trononpi tiyaykuspa munaychakuqpas mana faltanqachu. Leviypa mirayninmanta kaq serviqniy sacerdotekunawan pacto ruwasqaypas cumplikunqapunim.

²² Serviqniy Davidpa mirayninkunatawan Leviypa mirayninkunatam achkallataña mirachisaq, cielopi chaskakuna hina chaynataq lamar qochapa patanpi aqokuna hina manaña yupay atina kanankukama, nispa.

²³ Jeremiastam Tayta Dios kaynata nirqa:

²⁴ ¿Manachu uyarirqanki huklaw nacionpi kaqkunapa rimasqanta? Paykunam nichkanku: “Tayta Diosmi akllasqan iskaynin ayllukunata cheqnipakurun”, nispanku. Chayraykum llaqtayta mana kaqpaq hina hapispanku manaña nacionta hinañachu qawanku.

²⁵ Ñoqa Tayta Diosmi kaynata nini: Punchawwan hinaspa tutawanmi pactota ruwarqani, cielotawan kay pachata kamachinanpaqmi kamachikuykunata churarqani.

²⁶ Chaynaqa, Jacobpa mirayninku-natawan serviqniy Davidpa mirayninkunataqa manam haykapipas qepanchakusaqchu. Paykunamantam hatarichisaq Abrahampa, Isaacpa hinaspa Jacobpa mirayninkunapi munaychakuqta. Huklaw nacionkunaman preso apasqakunatapas, llakipayarispaymi kutichimusaq, nispa.