Jeremías 32 - CHUYA QELLQA La Biblia en Quechua de Ayacucho 2012

Jeremiaspa chakra rantisqanmanta

¹ Judá nacionpi rey Sedequías chunka wataña munaychakuchkaptinmi chaynataq rey Nabucodonosorpas chunka soqtayuq wataña munaychakuchkaptinmi, Jeremiasta Tayta Dios rimapayarqa.

² Chay tiempopim Babiloniapa reynin Nabucodonosorpa tropankuna Jerusalén llaqtata muyurirurqaku. Profeta Jere-miasñataqmi carcelpa pationpi preso kachkarqa. Chay carcelqa karqa Judá nacionpi reypa wasinpim.

³ Judá nacionpa reynin Sedequiasmi Jeremiasta presocharachirqa, kaynata nispa profetizasqanmanta: Tayta Diosmi kaynata nin: Kay llaqtatam Babilonia nacionpa reyninman qoykusaq.

⁴ Judá nacionpa reynin Sedequiaspas Caldea runakunamantaqa manam lluptinqachu, aswanqa Babilonia nacionpa reyninpa makinmanmi wichinqa, hinaspanmi qayllanman apasqa kanqa.

⁵ Paymi rey Sedequiasta Babilonia nacionman apanqa, chaypim kamunqa paymanta yuyarinaykama. Caldea runakunawan peleaspapas manapunim vencenkichikchu. Ñoqa Tayta Diosmi chaynata nini.

⁶ Jeremiasmi nirqa: Tayta Diosmi kaynata niwarqa:

⁷ Tioyki Salumpa churin Hanameelmi hamuspan nisunki: “Anatot llaqtapi chakraytayá rantiruway, aylluy kasqaykiraykum reclamanaykipaq derechoyuq kanki”, nispa.

⁸ Tayta Diospa niwasqanman hinam carcelpa patioman primoy Hanameel hamuruspan niwarqa: Benjamín allpapi kaq Anatot llaqtapi herencia chakraytayá rantiruway. Qamqa aylluy kasqaykiraykum chay herencia allpata reclamanaykipaq derechoyuq kachkanki, nispa. Chaynapim Tayta Diospa kamachikuynin kasqanpaq hapirqani.

⁹ Hinaspaymi Anatot llaqtapi kaq chakranta, yaqa iskay pachak gramo qollqewan rantirurqani.

¹⁰ Rantikuwasqan escriturata ruwaruptiykum sellarachispay testigokunawan firmachirqani, hinaspam mañakusqan qollqeta qorqani.

¹¹ Chaymantam kamachikuyman hina chaynataq costumbreman hina ruwanakusqayku escriturata, hukninta wichqasqata huknintañataq mana wichqasqata hapiykurqani,

¹² hinaspaymi primoy Hanameelpa qayllanpi, firmaq testigokunapa qayllanpi chaynataq carcelpa pationpi tiyaq Judá runakunapa qayllanpi, chay firmasqa papelta Neriaspa churin Barucman qoykurqani. Neriasqa karqa Maasiaspa churinmi.

¹³ Paykunapa qayllanpim Baructa kaynata kamachirqani:

¹⁴ Israelpa yupaychasqan Tukuy Atiyniyuq Tayta Diosmi kaynata nisunki: Kay wichqasqa qellqatawan kicharayachkaq copianta apaspayki allpa mankapi churamuy, chaynapi unay watakuna mana imanakunanpaq.

¹⁵ Israelpa yupaychasqan Tukuy Atiyniyuq Tayta Diosmi kaynata nin: Kay nacionpiqa yapatawanmi wasikunata, chakrakunata chaynataq uvas huertakunatapas rantinqaku, nispa.

Jeremiaspa mañakusqanmanta

¹⁶ Neriaspa churin Barucman escriturata qoykuspaymi Tayta Diosta kaynata mañakurqani:

¹⁷ ¡Dios Taytalláy! Qamqa hatun atiynikiwanmi cielokunatapas kay pachatapas unancharqanki, qampaqqa manam imapas sasachu.

¹⁸ Waranqantin runakunatam llakipayanki, tayta-mamanpa huchanmantam qepa wiñaykunata castiganki, hatun munaychakuq Diosnilláy. Sutikiqa Tukuy Atiyniyuq Tayta Diosmi.

¹⁹ Tanteasqaykikunaqa ancha hatunmi, ruwasqaykikunapas ancha atiyniyuqmi. Runakunapa imaynam kawsasqantam qawachkanki, kawsayninkuman hinaspa imam ruwayninkuman hina paganaykipaq.

²⁰ Egipto nacionpim señalkunatawan milagrokunata ruwarqanki; Israelpiwan wakin runakunapa chawpinpipas kunan punchawkamam hina chaynallata ruwachkanki, chaynapi ancha reqsisqa kanaykipaq.

²¹ Hatun atiynikiwan, hatun castigowan, admirakuypaq señalkunawanmi, Israel runaykikunata Egipto nacionmanta hurqomurqanki, chaykunawanmi llapa runakunata mancharichirqanki.

²² Ñawpaq taytaykuman juraspa prometesqayki allpatam, tukuy imapa qespinan chaynataq tukuy imapa kanan allpatam paykunaman qorqanki.

²³ Kay allpaman yaykumuspankum munaychakurqaku, ichaqa kamachikuynikitawan yachachikuynikitam mana kasukurqakuchu, kawsarqakupas manam kamachisqaykiman hinachu, chayraykum tukuy kay sasachakuykunata kachaykamurqanki.

²⁴ Caldea runakunam kay llaqtaman yaykumunankupaq perqapa qepanman allpata montoramunku; chaymi guerrawan, yarqaywan hinaspa peste onqoywan, kay llaqtata enemigonkunapa makinman qosqa kanqa. Dios Taytalláy, qawasqaykipi hinapas, nisqaykiman hinam cumplikuchkan.

²⁵ ¡Dios Taytalláy! Kay llaqtata Caldea runakunamanña qoykuchkaspaykipas, kay chakrata testigokunapa qayllanpi rantinaypaqraqmi kamachiwarqanki, nispa.

²⁶ Hinaptinmi Jeremiasta Tayta Dios nirqa:

²⁷ Ñoqaqa llapallan runakunapa yupay-chanan Tayta Diosmi kani. ¿Yaqachu ñoqapaq imapas mana ruway atinay kanman?

²⁸ Chayraykum niki: Kunanmi kay llaqtata Caldea runakunamanwan Babiloniapa reynin Nabucodonosorman qoykusaq.

²⁹ Caldea runakunam yaykuramuspanku kay llaqtata kañaykunqaku. Kañaykun-qakum Baal idolokunaman incien-sota kañananku chaynataq wakin idolokunaman vino tallinanku altosniyuq wasikunatapas, chaykunatam ruwarqaku ñoqata piñachiwanankupaq.

³⁰ Israelpa mirayninkunawan Judapa mirayninkunaqa warma kasqankumantapunim mana allinkunata qayllaypi ruwarqaku. Israelpa mirayninkunaqa, idolokunata ruwakuspankum piñachiwarqaku. Ñoqa Tayta Diosmi chaynata nini.

³¹ Kay llaqtaqa hatarichisqa kasqanmantapunim llumpay piñachiwaqniy llaqta karqa. Chayraykum qayllaymanta chinkachisaq.

³² Israel runakunawan Judá runa-kunaqa, reyninkuwan, kamachiqninkunawan, sacerdotenkunawan hinaspa profetankunawan kuskam piñachiwanankupaq tukuy mana allinkunata ruwarqaku.

³³ Qepanchakuruwaspankum manaña qawariwaqkuñachu. Mana samaykuspa yachachichkaptiypas manam kasuwarqakuchu, nitaqmi corregikuytapas munarqakuchu.

³⁴ Ñoqapaq sapaqchasqa temploytapas, millakuypaq idolokunata churaruspankum millakuypaqtaña ruwarunku.

³⁵ Ben-hinom wayqopipas Baal idolopaqmi altarkunata ruwapurqaku, chaypim churinkuta qaritapas warmitapas Moloc sutiyuq idoloman kañapurqaku. Chaynata ruwaspankum Judá nacionpi runakunata huchallichirqaku. Chay millakuypaq ruwasqankutaqa manam kamachirqanichu nitaqmi piensayllapas piensarqanichu, nispa.

Tayta Diospa prometesqanmanta

³⁶ Ñoqa Israelpa yupaychasqan Tayta Diosmi kaynata nini: Kay llaqtamantam nichkanki, guerrawan, yarqaywan hinaspa peste onqoymi Babilonia nacionpa reyninpa makinman wichichinqa, nispa.

³⁷ Chaywanpas anchata piñakuspay llapallan nacionkunaman presota apachisqaymantam huñumusaq, kay llaqtaman kutichimuspaymi hawkataña kawsachisaq.

³⁸ Paykunam llaqtay kanqaku, ñoqañataqmi Diosninku kasaq.

³⁹ Paykunatam tukuy tiempo kasuwaspa munasqayman hina kawsaqtaña ruwasaq, chaynataqa ruwasaq paykunapa chaynataq mirayninkunapa allinninkupaqmi.

⁴⁰ Paykunawanmi wiñaypaq pactota ruwasaq, hinaspaymi prometekusaq tukuy tiempo allinllata ruwanaypaq. Sonqonkumanmi manchakuyta churasaq, ñoqamanta mana haykapipas rakikuwanankupaq.

⁴¹ Paykunata bendecispaymi paykunawan kusikusaq. Cheqaptapunipas tukuy sonqoywan hinaspa kuyakuyniywanmi kay allpapi kawsachisaq.

⁴² Ñoqa Tayta Diosmi kaynata nini: Imaynam kay runakunaman hatun sasachakuykunata kachamurqani, chaynam rimarisqayman hina paykunapaq tukuy allin kaqkunata ruwasaq.

⁴³ “Kay nacionqa Caldea runakunapa makinpi kaspanmi manaña runayuq hinaspa manaña animalniyuq chunnichkan” nisqaykichik nacionpim kaqllamanta chakrakunata rantinkichik.

⁴⁴ Chakrakunata qollqewan rantispaykichikmi escrituratapas sellachispa testigokunawan firmachinkichik. Chay-natam ruwankichik Benjamín allpapi, Jerusalén llaqtapa muyuriqninkunapi, Judá nacionpi kaq llaqtakunapi, orqokunapi kaq llaqtakunapi, pampakunapi kaq llaqtakunapi chaynataq Neguev law llaqtakunapipas. Chaynaqa, kanqa Babiloniaman preso apasqakunata kutichimuptiymi. Ñoqa tayta Diosmi chaynata nini.