Jeremías 31 - CHUYA QELLQA La Biblia en Quechua de Ayacucho 2012

Israelpa mirayninkuna llaqtankuman kutimunankumanta

¹ Tayta Diosmi kaynata nin: Chay tiempopim Israelpa llapallan mirayninkunapa Diosnin kasaq, paykunañataqmi llaqtay kanqaku, nispa.

² Tayta Diosmi kaynata nin: “Guerrapi wañunankumanta lluptiqkunatam chunniqpi yanaparqani. Samanankupaq allpata maskaptinkum Israelta yanaparqani”, nispa.

³ Tayta Diosqa unayñam rikuriwarqa, hinaspam kaynata niwarqa: Wiñaypaq kuyakuywanmi kuyarqayki, chay kuyakuyniyman hinallam kuyapayachkayki.

⁴ Israelpa mirayninkuna, kaqmantam hatarichisqaykichik; sipasta hina pacharachiptiymi panderetaykichikta hapispa kusikuymanta tusuq lloqsinkichik.

⁵ Samaria waqtakunapim uvas chakrakunata musoqmanta hatarichinkichik, uvasta plantaqkunam rurunta mikunqaku.

⁶ Hamuchkanmi punchaw, Efrainpa orqonkunapi llaqta waqaychaqkuna qaparispa: ¡Llapallaykichik hamuychik, Sión llaqtaman hakuchik, Diosninchikpa llaqtanman risunchik! ninankupaq.

⁷ Tayta Diosmi kaynata nin: Jacobpa mirayninkunaraykuyá kusikuywan takiychik, nacionkunapa umanpaqyá kusikuymanta qapariychik. Qapariyllawanña alabaspa kaynata niychik: ¡Tayta Diosmi llaqtanta salvaykun, Israelmanta puchuqkunatam salvaykun! nispaykichik.

⁸ Norte lawpi nacionmantam kutichimusaq, kay pachapa cantonmantaraqmi huñumusaq; ñawsakunawan wistukunam paykunawan hamunqa, wiksayuq warmikunawan wachakuqkunam hamunqa; paykunaqa achkallañam kayman kutimunqaku.

⁹ Waqastin mañakustinmi hamunqaku, kallpaq yakukunapa patantam pusamusaq, mana mitkanankupaqmi pampallanta pusamusaq. Ñoqaqa Israelpa taytanmi kani, Efrainqa piwi churiymi.

¹⁰ Nacionkuna, Tayta Diospa Chuya siminta uyariychik, lamar qochapa waklawninpi kaqkunaman willamuychik: ¡Israelta cheqechiq Tayta Diosmi paykunata huñumunqa, ovejakunata michiq hinam paykunata waqaychanqa! nispa.

¹¹ Tayta Diosmi Jacobta libraykamun, paymantapas aswan atiyniyuq nacionmantam salvaykamun.

¹² Sión moqomanmi kusikuymanta qaparistin hamunqaku, Tayta Diosmi bendecinqa trigowan, vinowan, aceitewan, ovejankuwan hinaspa vacakunawan; chaymi llumpayta kusikunqaku. Paykunaqa parqosqa huerta hinañam kanqaku, manañam ima sasachakuytapas reqsinqakuñachu.

¹³ Sipaskunam kusikuymanta tusunqaku, Jovenkunawan machuchakunam kusikunqaku. Waqayninkutapas kusikuymanñam tikrasaq, consuelaspaymi nanayninkutapas kusikuymanña tikrasaq.

¹⁴ Sacerdotekunamanmi allinnin mikuykunata qosaq, llaqtaymi allinkuna qosqaywan saksasqa kanqa. Ñoqa Tayta Diosmi chaynata nini.

¹⁵ Ñoqa Tayta Diosmi nini: Ramá llaqtapim qapariy uyarikun, sinchi waqakuymi uyarikun, Raquelmi wawankunamanta waqachkan, wawankunam wañurun, chayraykum consuelaptinkupas mana upallayta munanchu, nispa.

¹⁶ Chaywanpas Tayta Diosmi kaynata nin: Raquel, amaña masta waqaychu, weqekitapas amaña usuchiychu, llamkasqaykimantaqa pagasqam kanki: Wawaykikunam enemigopa llaqtanmanta kutimunqa. Ñoqa Tayta Diosmi chaynata nini.

¹⁷ Ñoqa Tayta Diosmi nini: Allin punchawkunam qamkunapaq kanqa, wawaykikunam allpankuman kutimunqaku.

¹⁸ Efrainpa mirayninkunapa llakikuymanta kayna qaparisqantam uyarirqani: “Manaraq mansasqa toro hinam karqani, ichaqa qanmi mansaruwarqanki, qanman kutirichikuway, qamqa Tukuy Atiyniyuq Diosniymi kanki.

¹⁹ Qanmantam rakikururqani, ichaqa wanakunim; huchaykunatam reqsikuni, qasqoytam takakuni; joven kayniypi huchaykunamantam penqakuspay uchuychakuni”, nispa.

²⁰ Ñoqa Tayta Diosmi nini: Efraín llaqtaqa kuyasqay churiymi, payqa ancha kuyasqay churiymi; qaqcharuspaypas paytaqa manam qonqanichu, paymantaqa sonqoypas waqanmi, paymantaqa sinchitam llakikuni.

²¹ Ancha kuyasqay Israel llaqtalláy, ñanpiyá señalkunata churay, ñanta chaylla tariykuspa kutimunaykipaq; mayninmi risqaykitayá sumaqta qawariy. ¡Israel, kutimuy, llaqtaykikunaman kutimuy!

²² ¿Haykapikamataq mana kasukuq sipas hina kayman chayman purikuqlla kanki? Ñoqa Tayta Diosmi kay pachapi mana haykapipas rikusqaykichikta ruwaruni: Warmim qarita muyupayanqa.

Israel castakuna hamuq tiempopi favorecesqa kanankumanta

²³ Israelpa yupaychasqan Tukuy Atiy-niyuq Tayta Diosmi nin: Preso apasqa runakunata kutichimuptiymi kay Judá allpapi hinaspa llaqtankunapipas kaqllamanta ninqaku: “Tayta Diosyá bendecichun sapaqchakusqan moqota, allin ruwaypa kanan moqota”, nispanku.

²⁴ Judá runakunapas, llaqtankunapi yachaqkunapas, chakra llamkaqkunapas hinaspa uywa michiqkunapas chaypim yachanqaku.

²⁵ Pisipasqakunamanwan mana kallpayuqkunamanmi mikuykachispay achkanpi tomaykachisaq, nispa.

²⁶ Rikchariruspaymi qawaykacharikurqani, hinaspaymi mosqoyniy sumaq kasqanta qawaykurqani.

²⁷ Tayta Diosmi kaynata nin: Hamuchkanmi punchaw Israel naciontawan Judá nacionta runakunawan hinaspa animalkunawan huntachinaypaq.

²⁸ Imaynam paykunata tuñichirqani, plantata hina chutarqani, chinkachirqani, taqmarqani hinaspa ñakarichirqani; chaynam kunanpas paykunata hatarichispay plantata hina takyachisaq. Ñoqa Tayta Diosmi chaynata nini.

²⁹ Chay punchawkunapiqa manañam ninqakuchu: “Tayta-mamanku puchqo uvasta mikurusqanraykum wawa-churinkupa kirun uturun”, nispankuqa.

³⁰ Pipas puchqo uvasta mikuqpaqa kikinpa kirunmi utukurunqa, chaynataqmi haykam huchallikuqpas huchanmanta wañunqa.

³¹ Tayta Diosmi kaynata nin: Hamuchkanmi punchaw, Israelwanpas chaynataq Judawanpas musoq pactota ruwanaypaq.

³² Ichaqa manam Egipto nacionmanta hurqomuspay taytankuwan pacto ruwasqayta hinachu; paykunaqa chay pactotam yanqacharurqaku, qosanku hina kachkaptiypas manam kasukurqakuchu.

³³ Israelpa mirayninkunawan chay punchawkunapi pacto ruwasqayqa kaynam kanqa: Kamachikuyniytam sonqonkupi churasaq, yuyayninkupim qellqasaq. Ñoqam Diosninku kasaq, paykunañataqmi llaqtay kanqaku. Ñoqa tayta Diosmi chaynata nini.

³⁴ Ñoqa Tayta Diosmi kaynata nini: Ñoqata reqsiwanankupaqqa, ayllupurapas, reqsinakuqpurapas, manañam yachachinakunqakuñachu; aswanqa llapallankuñam warmakunapas chaynataq yuyayniyuqkunapas reqsiwanqaku. Mana allinkuna ruwasqankuta pampachaspaymi huchankutapas manaña mastaqa yuyarisaqñachu, nispa.

³⁵ Punchawpi achkinanpaq inti churaqmi, tuta achkinanpaq killatawan chaskakunata churaqmi, lamar qochata kuyuchispan olankunata qaparichiqmi, Tukuy Atiyniyuq Tayta Diosmi kaynata nin:

³⁶ Sichum hukkaqnin punchaw kay kamachikuyniykuna chinkarunqa, hinaptinqa Israelpa mirayninkunapas manañam llaqtayñachu kanqa.

³⁷ Sichum cielokunata tupuruptinkuqa, kay pachatapas cimientonkama hayparuptinkuqa, chay punchawmi Israelpa mirayninkunatapas tukuy ima ruwasqankumanta qepanchakurusaq. Ñoqa Tayta Diosmi chaynata nini.

³⁸ Ñoqa Tayta Diosmi kaynata nini: Hamuchkanmi punchaw, Hananeelpa torrenmanta qallaykuspa esquina punkukama llaqtayta musoqmanta hatarichinankupaq.

³⁹ Tupusqanku waskam derecholla pasanqa Gareb moqokama, hinaspam Goa lawman muyurinqa.

⁴⁰ Chaymantam ayakuna wischunanku lawninta hinaspa uchpa wischunanku wayqonta chutarikunqa Cedrón wayqonta intipa qespimunan lawpi Caballokunapa yaykunanwan sutichasqa punkukama. Tukuy chaykunam ñoqa Tayta Diospaq sapaqchasqa kanqa. Chay llaqtaqa manañam haykapipas tuñichisqachu nitaq purmachisqachu kanqa.