Jeremías 3 - CHUYA QELLQA La Biblia en Quechua de Ayacucho 2012

Tayta Diosmanta Israelpa karunchakurusqankumanta

¹ Ñoqa Tayta Diosmi kaynata nini: Sichum pipas warminmanta rakikuruptin warmiñataq hukwanña casarakurunman, hinaptinqa manañam punta qosanqa payman hukllawakunmanchu, sichum chayta ruwaptinqa llaqtam hatun penqaypi kanman. Israel runakuna, qamkunam ichaqa achkallaña waynaykichikkunawan qanrakuruchkaspapas ñoqamanraq kutirimuyta munachkankichik. Ñoqa Tayta Diosmi chaynata nini.

² Moqokunatayá qawariy, hinaspayá sumaqta yuyaymanariy: ¿Maypitaq mana qanrakurqankichu? Chunniqpi tiyaq árabe runa hinam, ñan patankunapi tiyaspayki waynaykikunata suyarqanki. Chuchumika kaynikiwanmi, mana allin ruwasqaykikunawanmi, kay pachata millakuypaqta ruwarunki.

³ Chayraykum tarpuy parawan poqoy parapas manaña chayamurqachu. Penqakunayki kachkaptinpas, chuchumika hina mana penqakuqñam rikurirunki.

⁴ Qaynakunallam niwarqanki: Kuyasqay Taytalláy, warma kayniymanta reqsiwaqniy.

⁵ ¿Wiñaypaqchu piñakurunki? ¿Wiñaypaqchu piñakuyniki kanqa? nispayki. Ichaqa chaynata niwachkaspapas, tukuy rikchaq mana allinkunatam ruwarqanki.

Wanakunankupaq Dios kamachisqanmanta

⁶ Rey Josiaspa munaychakusqan tiempopim Tayta Dios kaynata niwarqa: ¿Rikurqankichu mana kasukuq Israelpa ruwasqanta? Alto orqokunaman rispanmi chuchumika warmi hina qanrakurqa rapisapa sachakunapa sikinpi.

⁷ Ñoqam piensarqani: “Tukuy chaykunata ruwachkaspanpas kutirikamuwanqachiki”, nispay. Ichaqa manam kutirikamuwarqachu. Chay ruwasqankunatam mana kasukuq ñañan Judapas rikurqa.

⁸ Rikurqataqmi hukwan pierdesqanrayku mana kasukuq Israelmanta rakikusqaytapas; ichaqa paypas ñañan hinam mana kasukurqachu, aswanraqmi mana manchakuwaspan chuchumika warmi hina qanrakurqa.

⁹ Israelqa chay huchallikusqanta mana kaqpaqpas hapispanmi llaqtata qachacharurqa. Hukwan pierdekuq warmi hinam rumikunatawan sachakunata adorarqa.

¹⁰ Chaywanpas mana kasukuq ñañan Judapas manam tukuy sonqonwanchu ñoqaman kutirikamuwarqa, aswanqa hawa sonqollam. Ñoqa Tayta Diosmi chaynata nini.

¹¹ Tayta Diosmi niwarqa: Mana kasukuq Judamantaqa, mana kasukuq Israelraqmi allinpas.

¹² Chaynaqa, rispayki norte lawman qawaspa kaynata nimuy: Tayta Diosmi kaynata nin: Mana kasukuq Israel llaqta, ñoqaman kutirikamuway; manam piñasqachu chaskisqayki, nitaqmi piñakuyniyqa wiñaypaqchu kanqa, ñoqaqa ancha kuyapayakuqmi kani. Ñoqa Tayta Diosmi chaynata niki.

¹³ Mana allin ruwasqaykitayá reqsikuy, Tayta Diospa contranpim hoqarikurqanki; llaqesapa sachakunapa sikinpim mana reqsisqa runakunawan qanrakurqanki, kamachikuyniykunatapas manam kasukurqankichu. Ñoqa Tayta Diosmi chaynata nini.

¹⁴ Tayta Diosmi kaynata nin: Mana kasukuq churikuna kutirikamuwaychik, qosaykichikmi ñoqaqa kani. Sapa llaqtamantam hukta akllasaq, sapa castamantañataqmi iskayta akllasaq, Sión llaqtaman kutichimunaypaq.

¹⁵ Sonqoypa munasqanman hina michisuqnikichiktam qosqaykichik, paykunam yachaywan chaynataq yuyaywan michisunkichik.

¹⁶ Chay punchawkunapiqa, kay allpapi miraruspa achkallaña churiyuq kasqaykichikraykum, Tayta Diospa pacto ruwasqan Arcamantapas manaña rimankichikñachu, pasaypaqta qonqaruspam manaña watukunkichikñachu, nitaqmi huk Arcatapas ruwankichikñachu. Ñoqa Tayta Diosmi chaynata nini.

¹⁷ Chay tiempopim Jerusalén llaqtata “Tayta Diospa tronon” nispa sutichanqaku, chaymanmi llapa nacionkuna huñunakamunqaku ñoqa Tayta Diosta adorawanankupaq; paykunaqa manam rumi sonqo kayninkuman hinañachu kawsanqaku.

¹⁸ Chay punchawpiqa Judá nación runakunam Israel nación runakunawan hukllawanakunqaku, hinaspam ñawpaq taytankuman qosqay allpaman kuskanku norte lawmanta kutimunqaku.

Idolokunaman Israelpa qokurusqanmanta

¹⁹ Ñoqam tapukurqani: ¿Imaynataq churiypaq hapikichikman hinaspa kay pachapi aswan allinnin allpataraq qoykichikman? nispay. Ñoqam piensarqani, Taytalláy niwaspaykichik mana haykapipas ñoqamanta rakikunaykichikta.

²⁰ Ichaqa qosanta saqeruq warmi hinam rakikuruwankichik. Israelpa mirayninkuna, ñoqa Tayta Diosmi chaynata nikichik.

²¹ Chunniq orqokunapim qayakuy uyarikun, Israel runakunapa waqaspa mañakuyninkum uyarikun. Allin ñanmantam karunchakurunku, yupaychasqanku Tayta Diostam qonqarunku.

²² Mana kasukuq churikuna, ñoqaman kutirikamuychik, mana kasukuynikichikkunatam pampachasqaykichik. Dios Taytallayku, yupaychasqayku Diosmi qamqa kanki, qanmanmi kutirikamullaniku, qamllam Diosniykuqa kanki.

Israelpa mirayninkuna huchanku reqsikusqankumanta

²³ Alto moqokunaman riyqa yanqapaqmi, alto moqokunapi qapariyqa yanqapaqmi; cheqaptapunipas qam yupaychasqayku Diosllapim Israelpa mirayninkunaqa salvacionta tariniku.

²⁴ Llapa idolokunata penqakuypaq yupaychasqaykuraykum, warmallaraq kachkaptiyku taytaykupa armasqan ovejaykupas, vacaykupas hinaspa wawa-churiykupas manaña kanñachu.

²⁵ Ñoqaykupas ñawpaq taytaykupas, qampa contraykipim huchallikuruniku; warma kasqaykumanta kunan punchawkamam qamtaqa mana kasurqaykikuchu. Chayraykum penqakuymanta pasaypaqta uchuychakunayku.